ଭଦ୍ରକ : ଗଛରେ ଝୁଲୁଥିବା ମୃତଦେହର ମିଳିଲା ପରିଚୟ, ମାଟି ଭିତରୁ ଶବକୁ ଖୋଳି ପରିବାର ଲୋକଙ୍କୁ ହସ୍ତାନ୍ତ କଲା ପୋଲିସ

ଭଦ୍ରକ (କେନ୍ୟୁଜ୍‌) : ୧୬ ନମ୍ବର ଜାତୀୟ ରାଜପଥର ଯଶୋଟିକିରି ମହନ୍ତ ପୋଲ ନିକଟରେ ଏକ ଗଛରେ ଝୁଲୁଥିବା ଜଣେ ଅଜଣା ବ୍ୟକ୍ତିର ମୃତ ଦେହ ୫ ଦିନ ପରେ ଚିହ୍ନଟ ହୋଇଛି। ମୃତ ବ୍ୟକ୍ତି ହେଲେ ଭଦ୍ରକ ଜିଲ୍ଲା ଆଗରପଡା ଥାନା କୁସୁନ ନଗର ଗାଁ ର ଚକ୍ରଧର ବେହେରା। ସେ ଗତ ୩୧ ତାରିଖ ଦିନ ଭୁବନେଶ୍ୱର ଚାଷୀ ସମାବେଶରେ ଯୋଗ ଦେବାକୁ ଯାଇ ଘରକୁ ଫେରି ନ ଥିଲେ। ତେବେ ଗତ ୨ ତାରିଖ ଦିନ ଏକ ମୃତ ଦେହ ସନ୍ଦେହ ଜନକ ଭାବେ ଜାତୀୟ ରାଜପଥ ପାର୍ଶ୍ଵ ଏକ ଗଛରେ ଝୁଲୁ ଥିଲା। ଏ ସମ୍ପର୍କରେ ଖବର ପରିବେଷଣ ପରେ ତାହା ସାମାଜିକ ଗଣ ମାଧ୍ୟମରେ ଭାଇରଲ ହୋଇଥିଲା। ଯାହାପରେ ମୃତଦେହ ମୋବାଇଲକୁ ମୋବାଇଲ୍‌ ଘୁରିବୁଲିଲା।

ଅନ୍ୟ ପକ୍ଷରେ ପୋଲିସ ମୃତ ବ୍ୟକ୍ତିର ପରିଚୟ ନ ପାଇଁ ୩ ଦିନ ରଖିବା ପରେ ଶବ ବ୍ୟବଛେଦ କରି ଏକ ଅପମୃତ୍ୟୁ ମାମଲା ରୁଜୁ କରି ଭଦ୍ରକ ସହର ନିକଟସ୍ଥ ଦକ୍ଷିଣେଶ୍ୱର କାଳି ମନ୍ଦିର ପାଖ ପଡିଆରେ ପୋତି ଦେଇ ଥିଲେ। ଅପର ପକ୍ଷରେ ଚକ୍ରଧର ନିଖୋଜ ଥିବା ତାଙ୍କ ପରିବାର ଲୋକେ ଅଗରପଡା ଥାନାରେ ୪ ତାରିଖରେ ଜଣାଇ ଥିଲେ। ସାମାଜିକ ଗଣମାଧ୍ୟମରୁ ଫୋଟ ଓ ଭିଡ଼ିଓ ଦେଖି ତାଙ୍କ ପରିବାର ଲୋକେ ଚକ୍ରଧରଙ୍କୁ ଚିହ୍ନିବା ପରେ ପୋଲିସକୁ ଜଣାଇ ଶବ ନେବା ପାଇଁ କହିଥିଲେ ଓ ଏକ ହତ୍ୟା ଅଭିଯୋଗ ଥାନାରେ ଜଣାଇଛନ୍ତି। ପୋଲିସ ସେହି ଅନୁଯାଇ ଆଜି ଶବଟିକୁ ମାଟି ଭିତରୁ ମେସିନ ଲଗାଇ ଖୋଳି ତାଙ୍କ ପରିବାର ଲୋକଙ୍କୁ ହସ୍ତାନ୍ତର କରି ପୁର୍ନବାର ତଦନ୍ତ ଆରମ୍ଭ କରିଛନ୍ତି। ଏହି ଘଟଣା ଦେଖିବା ପାଇଁ ଆଜି ବହୁ ଲୋକ ସେଠାରେ ଋଣ୍ଡିଭୂତ ହୋଇ ଥିଲେ।