ଆଜି ଭାରତ ବନ୍ଦ, ରାଜ୍ୟରେ ସମସ୍ତ ସରକାରୀ ଅଫିସ ସହ ବସ ଓ ଟ୍ରେନ ଚଳାଚଳ ବାଧାପ୍ରାପ୍ତ
କେନ୍ୟୁଜ ବ୍ୟୁରୋ : ଆଜି ଭାରତ ବନ୍ଦ । ଚାଷୀଙ୍କ ୪ ଘଣ୍ଟିଆ ପ୍ରତିକାତ୍ମକ ଆନ୍ଦୋଳନ ଡାକରା । ଏଥିପାଇଁ ରାଜ୍ୟର ସମସ୍ତ ସରକାରୀ କାର୍ଯ୍ୟାଳୟ ବନ୍ଦ ରହିବ । ଏନେଇ ସରକାରଙ୍କ ପକ୍ଷରୁ ସୂଚନା ଦିଆଯାଇଛି । ବନ୍ଦ ଯୋଗୁଁ ଗମନାଗମନ ଓ ପରିବହନ ବ୍ୟବସ୍ଥା ଅଧିକ ପ୍ରଭାବିତ ହେବା ସମ୍ଭାବନା ରହିଛି । ଏହା କରୋନା ସଂକ୍ରମଣ ଉପରେ ପ୍ରତିକୂଳ ପ୍ରଭାବ ପକାଇପାରେ । ଏହାକୁ ଦୃଷ୍ଟିରେ ରଖି ସମସ୍ତ ସରକାରୀ କାର୍ଯ୍ୟାଳୟ ବନ୍ଦ ପାଇଁ ନିଷ୍ପତି ହୋଇଛି । ତେବେ ବନ୍ଦ ବେଳେ ସମସ୍ତ ଅତ୍ୟାବଶ୍ୟକ ଜରୁରୀ ସରକାରୀ ସେବା ଜାରି ରହିବ ।
କୃଷକ ସଂଗଠନର ୪ ଘଣ୍ଟିଆ ଭାରତ ବନ୍ଦ । ଦିନ ୧୧ଟାରୁ ଅପରାହ୍ନ ୩ଟା ପର୍ଯ୍ୟନ୍ତ ଚକାଜାମ୍ କରିବାକୁ ନିଷ୍ପତ୍ତି ନେଇଛନ୍ତି ଚାଷୀ । ବନ୍ଦକୁ ସମର୍ଥନ ଜଣାଇଛନ୍ତି କଂଗ୍ରେସ, ଆପ୍, ଏସ୍ପି, ବାମଦଳ ସମେତ ବିଭିିନ୍ନ ରାଜନୈତିକ ଦଳ । ବନ୍ଦ ସମୟ ଭିତରେ ରାସ୍ତା ଅବରୋଧ କରି ପାରନ୍ତି ଆନ୍ଦୋଳନକାରୀ । ବ୍ୟାଙ୍କିଂ ଓ ପରିବହନ ସେବା ପ୍ରଭାବିତ ହୋଇପାରେ । ସ୍ୱାସ୍ଥ୍ୟସେବା, ଆମ୍ବୁଲାନ୍ସ ଓ ବରଗାଡ଼ିକୁ ଅଟକାଯିବ ନାହିଁ । ଜନସାଧାରଣଙ୍କୁ ସମସ୍ୟାରେ ପକାଇବାକୁ ଚାହୁଁ ନଥିବା ଚାଷୀ ସଂଗଠନ କହିଛି । ଅନ୍ୟପଟେ ଭାରତ ବନ୍ଦ ଡାକରାକୁ ଦୃଷ୍ଟିରେ ରଖି ସବୁ ରାଜ୍ୟକୁ ଗାଇଡ୍ଲାଇନ୍ ଜାରି କରିଛନ୍ତି କେନ୍ଦ୍ର ସରକାର । ଭାରତ ବନ୍ଦ ବେଳେ କୋଭିଡ ଗାଇଡ୍ଲାଇନ୍ ଯେଭଳି କଡ଼ାକଡ଼ି ଭାବେ ପାଳନ କରାଯାଏ, ତାହା ନିଶ୍ଚିତ କରିବାକୁ କୁହାଯାଇଛି । ସେହିପରି ସୁରକ୍ଷା ବ୍ୟବସ୍ଥା ମଧ୍ୟ ବଢ଼ାଇବାକୁ ନିର୍ଦ୍ଦେଶ ଦିଆଯାଇଛି । କେନ୍ଦ୍ରର ନୂଆ କୃଷି ଆଇନ୍ ଉଚ୍ଛେଦ ଜିଦ୍ରେ ଦୀର୍ଘ ୧୩ ଦିନ ଧରି ଆନ୍ଦୋଳନ ଜାରି ରଖିଛନ୍ତି ଶତାଧିକ ଚାଷୀ ।