ଘରେ ଅର୍ଦ୍ଧଦଗ୍ଧ ଅଵସ୍ଥାରେ ଏକା ପଡ଼ିଥିଲେ ବୃଦ୍ଧା, ଉଦ୍ଧାର କଲେ ସ୍ୱେଚ୍ଛାସେବୀ

ବରଗଡ଼ (କେନ୍ୟୁଜ୍‌) : ରୋଷେଇ କଲା ବେଳେ କେମିତି କେଜାଣି ଘରେ ନିଆଁ ଲାଗିଗଲା । ଘରେ ଥିବା ଜିନିଷପତ୍ର ପୋଡ଼ିଗଲା । ଆଉ ତା ସହିତ ନିଜେ ପୋଡ଼ିଗଲେ ୭୦ ବର୍ଷର ବୃଦ୍ଧା ବସନ୍ତ ସାହୁ । ଶରୀରର ବହୁ ଅଂଶ ପୋଡ଼ି ଯାଇଥିଲା ବସନ୍ତ ମା’ଙ୍କର । ପୋଡ଼ା ଯନ୍ତ୍ରଣା ସମ୍ଭାଳିବା ଭାରି କଷ୍ଟ । ସେହି ଯନ୍ତ୍ରଣାରେ ଛଟପଟ ହେଉଥିଲେ ବସନ୍ତ ମା । ଏ ଘଟଣା ହେଉଛି ବରଗଡ ବ୍ଲକ ଅନ୍ତର୍ଗତ ପଥର୍ଲା ଗ୍ରାମର ମୁନସୀ ପଡ଼ାର ।

ଏ ଖବର ପାଇବା ପରେ ତାଙ୍କ ପାଖରେ ପହଞ୍ଚିଥିଲେ ସ୍ଥାନୀୟ ଅଙ୍ଗନୱାଡ଼ି ଦିଦି ରୀନା ସାହୁ । ପଡ଼ାବାସୀ ଏବଂ ରୀନା ଦିଦି ମା ବସନ୍ତଙ୍କୁ ଖୁଆଇ ପିଆଇ ଦେଉଥିଲେ । ତାଙ୍କର କେହି ନାହାନ୍ତି । ଯିଏବି ସମ୍ପର୍କୀୟ ଥିଲେ ଖାଲି ଆସି ଦେଖି ଦେଇ ନିଜ କାମ ସାରି ବୃଦ୍ଧାଙ୍କୁ ସେହି ଅବସ୍ଥାରେ ଛାଡ଼ି ଚାଲିଗଲେ । ତେବେ ବସନ୍ତ ମା’ଙ୍କର ଏଭଳି ଅବସ୍ଥା ସମ୍ପର୍କରେ ଖବର ପାଇଲେ ନିଷ୍ଠା ପରିବାର । ଏହାର ସଦସ୍ୟ ସୁଜିତ ସାହୁ ଓ ଅଶ୍ୱିନୀ ତ୍ରିପାଠୀ ତୁରନ୍ତ ଆସି ପହଞ୍ଚିଲେ ଗରିବ, ଅସହାୟ ବସନ୍ତଙ୍କ ଘରେ । ବୃଦ୍ଧାଙ୍କ ଅଵସ୍ଥା ଅତ୍ୟନ୍ତ ଶୋଚନୀୟ ଥିଲା। ଗୋଟିଏ ଜାଗାରେ ଦୀର୍ଘ ତିନି ଦିନ ଧରି ପଡ଼ି ରିହି ଥିବାରୁ ଘର ଭିତର ଦୁର୍ଗନ୍ଧ ମଧ୍ୟ ହେଉଥିଲା। ୧୦୮ ଆମ୍ବୁଲାନ୍ସ ଡକାଇ ନିଷ୍ଠାର ସଦସ୍ୟମାନେ ବୃଦ୍ଧାଙ୍କୁ ବରଗଡ଼ ମୁଖ୍ୟ ଚିକିତ୍ସାଳୟକୁ ପଠାଇ ଥିଲେ । ସେ ସମ୍ପୂର୍ଣ୍ଣ ଭାବରେ ସୁସ୍ଥ ହେବା ପର୍ଯ୍ୟନ୍ତ ସବୁ ଦାୟିତ୍ଵ ନିଷ୍ଠା ପରିବାର ବହନ କରିବ ବୋଲି ସଂସ୍ଥାର ଉପଦେଷ୍ଟା ଅଶ୍ୱିନୀ ତ୍ରିପାଠୀ କହିଛନ୍ତି ।

ବସନ୍ତଙ୍କର କେହି ସଂପର୍କୀୟ ତାଙ୍କ ପାଖରେ ରୁହନ୍ତି ନାହିଁ । ସେ । ଘରେ ସେ ଏକା ରୁହନ୍ତି। ସରକାରୀ ଭତ୍ତା ଓ ଏଣେ ତେଣେ କାମ କରି ଚଳି ଯାଆନ୍ତି ବୃଦ୍ଧା ମା ଜଣକ। ହେଲେ ଏବେ ସେ ଦୁଃସମୟରେ । ଆଉ ଏହି ସମୟରେ ତାଙ୍କ ପାଖରେ ଠିଆ ହୋଇଛନ୍ତି ସ୍ୱେଚ୍ଛାସେବୀମାନେ ।