ମାନିଲେନି ନାଇଟ୍ ପାଟ୍ରୋଲିଂ, ଷ୍ଟପ୍ ବୋର୍ଡ ଭାଙ୍ଗି ପୋଲିସ ଆଡକୁ ମାଡିଗଲା ଗୋରୁ ବୋଝେଇ ଗାଡି

ଚନ୍ଦବାଲି : ମାନିଲେନି ନାଇଟ୍ ପାଟ୍ରୋଲିଂ । ଷ୍ଟପ୍ ବୋର୍ଡ ଭାଙ୍ଗି ପୋଲିସ ଆଡକୁ ମାଡି ଆସିଲା ଗୋରୁ ବୋଝେଇ ପିକଅପ୍ । ଅଳ୍ପକେ ବର୍ତ୍ତିଲେ ASI କମଳାକାନ୍ତ ଶତପଥୀ । ଭଦ୍ରକ ଜିଲ୍ଲା ତିହିଡି ଥାନା ସମ୍ମୁଖରେ ଘଟିଛି ଅଭାବନୀୟ ଘଟଣା ।

ଗତକାଲି ବିଳମ୍ବିତ ରାତିରେ ଏକ ଗୋରୁ ବୋଝେଇ ଗାଡି ଚାନ୍ଦବାଲିରୁ ବାହାରି ଭଦ୍ରକ ଦେଇ ଯାଉଥିବା ନେଇ ଖବର ପାଇଥିଲେ ତିହିଡି ଥାନା ଆଇଆଇସି । ପରେ ଜିଲ୍ଲା ଆରକ୍ଷୀ ଅଧିକ୍ଷକଙ୍କ ନିର୍ଦ୍ଦେଶରେ ଆଇଆଇସିଙ୍କ ସମେତ ASI କମଳାକାନ୍ତ ଶତପଥୀ,ଲକ୍ଷ୍ମଣ ମାରାଣ୍ଡି, ହାବିଲଦାର ବିଦ୍ୟାଧର ସୁତାର, କନେଷ୍ଟବଳ ହରେକୃଷ୍ଣ ଦୀକ୍ଷିତ ଓ ଅନ୍ୟ କର୍ମଚାରୀ ଥାନା ସମ୍ମୁଖରେ ଗାଡି ଅଟକାଇବାକୁ ଷ୍ଟପ୍ ବୋର୍ଡ ଲଗାଇ ଚେକିଂ କରୁଥିଲେ । କିଛି ସମୟ ମଧ୍ୟ ଏକ ନମ୍ବର ବିହୀନ ଧଳା ରଙ୍ଗର ପିକ୍ଅପ୍ ଭ୍ୟାନ ତିହିଡି ବଜାର ଆଡୁ ଭଦ୍ରକ ଯାଉଥିବାର ଦେଖି ଏଏସଆଇ ଶତପଥି ରାସ୍ତାର ଡାହାଣ ପାଖରେ ଏକ ଷ୍ଟପ୍ ବୋର୍ଡ ଲଗାଇ ଠିଆ ହୋଇଥିଲେ । ହଠାତ୍ ଗୋରୁ ବୋଝେଇ ଗାଡିଟି ଜାଣିଶୁଣି ତାଙ୍କ ଆଡକୁ ଖୁବ ଜୋରରେ ମାଡି ଆସିଥିଲା । ଏଏସଆଇ ଜଣଙ୍କ ଜୀବନ ବଞ୍ଚାଇବାକୁ ଯାଇ ରାସ୍ତାର ଡାହାଣ ପାଖକୁ ଡେଇଁ ପଡିବାରୁ ଅଳ୍ପକେ ତାଙ୍କର ଜୀବନ ରକ୍ଷା ହୋଇଯାଇଥିଲା । ଦୁଇଟି ଷ୍ଟପ୍ ବୋର୍ଡ ଭାଙ୍ଗିଥିବା ବେଳେ ଉକ୍ତ ଗାଡିର ପିଛା କରାଯାଇଥିଲା । ମାତ୍ର କୌଣସି ସନ୍ଧାନ ମିଳିନଥିଲା । ତେବେ ଘଟଣାର ତଦନ୍ତ କରିବା ସହ ଫେରାର ଗାଡିକୁ ଧରିବାକୁ ଉଦ୍ୟମ ଜାରି ରଖିଛି ପୋଲିସ ।