ଦିନିକିଆ ବ୍ରହ୍ମପୁର ଓ ଗୋପାଳପୁର ଗସ୍ତରେ ମୁଖ୍ୟମନ୍ତ୍ରୀ
ବ୍ରହ୍ମପୁର (କେନ୍ୟୁଜ୍) : ଶିକ୍ଷା, ସ୍ୱାସ୍ଥ୍ୟ, କୃଷି ଓ ଶିଳ୍ପକ୍ଷେତ୍ରରେ ଆଗଉଛି ଓଡ଼ିଶା । ହକି ବିଶ୍ୱକପ ଆୟୋଜନ କରି ଓଡ଼ିଶା ସ୍ୱତନ୍ତ୍ର ପରିଚୟ ସୃଷ୍ଟି କରିଛି । କ୍ରୀଡ଼ାର ପ୍ରସାର ପାଇଁ ଓଡ଼ିଶାକୁ ବିଶ୍ୱ ଧନ୍ୟବାଦ ଦେଉଛି । ଦକ୍ଷତା ବିକାଶ କ୍ଷେତ୍ରରେ ବ୍ୟାପକ ବ୍ୟୟବରାଦ ହୋଇଛି । ଏଥିରେ ୫ ଲକ୍ଷରୁ ଅଧିକ ନିଯୁକ୍ତି ସୃଷ୍ଟି ହୋଇପାରିଛି ବୋଲି ମୁଖ୍ୟମନ୍ତ୍ରୀ କହିଛନ୍ତି । ଦିନିକିଆ ବ୍ରହ୍ମପୁର ଓ ଗୋପାଳପୁର ଗସ୍ତରେ ଆସି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ୩୦୦ କୋଟିରୁ ଅଧିକ ଟଙ୍କା ବ୍ୟୟରେ ବିଭିନ୍ନ ପ୍ରକଳ୍ପର ଉଦଘାଟନ ଓ ଶୁଭ ଦେଇଛନ୍ତି । ଗଞ୍ଜାମ ପାଲୁର୍ ହିଲ୍ରେ ମୁଖ୍ୟମନ୍ତ୍ରୀ ଆଦର୍ଶ ବିଦ୍ୟାଳୟକୁ ଉଦ୍ଘାଟନ କରିଛନ୍ତି ।
ବ୍ରହ୍ମପୁର ବିଶ୍ୱବିଦ୍ୟାଳୟ ମାନବ ସମ୍ବଳ ବିକାଶ କେନ୍ଦ୍ରର କୋଠା ଉଦଘାଟନ କରିବା ସହ ସଂପ୍ରସାରିତ ପାଠାଗାର କୋଠା ଏବଂ ଗୋପାଳପୁର ନିର୍ବାଚନ ମଣ୍ଡଳୀର ବିଭିନ୍ନ ଉନ୍ନୟନମୂଳକ ପ୍ରକଳ୍ପର ଉଦଘାଟନ ଓ ଶିଳାନ୍ୟାସ କରିଛନ୍ତି ମୁଖ୍ୟମନ୍ତ୍ରୀ । ବ୍ରହ୍ମପୁର-ଗୋପାଳପୁର ଓଭରବ୍ରିଜ ଉଦଘାଟନ କରିଛନ୍ତି । ପାଲୁର ହିଲରେ ୪୫ କୋଟି ଟଙ୍କା ବ୍ୟୟରେ ନିର୍ମିତ ରାଜ୍ୟର ପ୍ରଥମ ମେଗା ଅର୍ବାନ ଏଜୁକେସନ ହବ କଂପ୍ଲେକ୍ସକୁ ଉଦଘାଟନ କରିଛନ୍ତି ।
ବ୍ରହ୍ମପୁର ସ୍ଥିତ ନୂତନ ଜିଲ୍ଲା ପର୍ୟ୍ୟଟନ କାର୍ୟ୍ୟାଳୟ, ଆଇଟିଆର ନୂତନ କୋଠା, ବ୍ରହ୍ମପୁର ବୈଷୟିକ ତଥା କର୍ମଶାଳା କୋଠା, ମହିଳା ଥାନା ଉଦଘାଟନ କରିଛନ୍ତି ନବୀନ । ମୁଖ୍ୟମନ୍ତ୍ରୀଙ୍କ ସହ ମନ୍ତ୍ରୀ ରମେଶ ମାଝୀ, ସାଂସଦ ସିଦ୍ଧାନ୍ତ ମହାପାତ୍ର, ଗୋପାଳପୁର ବିଧାୟକ ପ୍ରଦୀପ ପାଣିଗ୍ରାହୀ ପ୍ରମୁଖ ଉପସ୍ଥିତ ଅଛନ୍ତି । ମୁଖ୍ୟମନ୍ତ୍ରୀଙ୍କ ଗସ୍ତକୁ ଦୃଷ୍ଟିରେ ରଖି ପୋଲିସ୍ ପ୍ରଶାସନ ପକ୍ଷରୁ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି ।
