ବାଘ ଆକ୍ରମଣରେ ଶିଶୁ ଗୁରୁତର, ପୁଣି ମାତିଲା ନରହନ୍ତା ବାଘ
ଉମରକୋଟ : ବାଘ ଆକ୍ରମଣରେ ଶିଶୁ ଗୁରୁତର । କିଛି ଦିନ ବ୍ୟବଧାନରେ ପୁଣି ମାତିଲା ନରହନ୍ତା କଲରାପତରିଆ ବାଘ । ପୂର୍ବ ଭଳି ଶିକାର ଟାର୍ଗେଟ ରଖିଲା ଆଉ ଜଣେ ଛୋଟ ଛୁଆଙ୍କୁ । ଏହି ଘଟଣା ଘଟିଛି କାଙ୍କେର ଜିଲ୍ଲା ସାରୋନା ଜଙ୍ଗଲ ଅଞ୍ଚଳ ଦୁଧୁ୍ୱା ଗ୍ରାମ ଠାରେ । ୧୧ ବର୍ଷ ବୟସର ନିରଜ କୁମାର । ସଂଧ୍ୟା ସମୟରେ ନିଜ କକା ଘରକୁ ଯିବା ସମୟରେ ବାଘଟି ହଠାତ ଆକ୍ରମଣ କରିଥିଲା । ନିରଜ ପାଟି କରିବା ପରେ ନିକଟସ୍ଥ ଲୋକମାନେ ଏକତ୍ରିତ ହୋଇଥିଲେ ।
ଏହା ପରେ ବାଘଟି ନିରଜକୁ ଛାଡି ପଳାଇ ଯାଇଥିଲା । ଗୁରୁତର ଆହତ ହୋଇଥିଲା ନିରଜ ଏବଂ ବେକରେ ଗଭୀର ଆଘାତ ଲାଗିଥିଲା । ତୁରନ୍ତ କାଙ୍କେର ଜିଲ୍ଲା ଡାକ୍ତରଖାନାରେ ଭର୍ତ୍ତି କରାଯାଇଥିଲା । ଅବସ୍ଥା ଗୁରୁତର ହେବାରୁ ଉନ୍ନତ ଚିକିତ୍ସା ରାୟପୁର ପାଇଁ ପଠାଯାଇଥିଲା । ସେଠାରେ ନିରଜର ଚିକିତ୍ସା ଚାଲିଛି ।
ଜଙ୍ଗଲ କ୍ଷୟ ଓ ଖାଦ୍ୟର ଅଭାବ ଯୋଗୁଁ ଖାଦ୍ୟ ଅନ୍ବେଷଣରେ ଜଙ୍ଗଲୀ ଜନ୍ତୁ ଜନବସତି ମୁହାଁ ହୋଇଛନ୍ତି । ପୂର୍ବରୁ ଗୃହ ପାଳିତ ପଶୁଙ୍କୁ ଶିକାର କରୁଥିଲେ କିନ୍ତୁ ବିଗତ କିଛି ଦିନ ହେଲା ଦେଖା ଯାଉଛି କେବଳ କମ ବୟସ ଶିଶୁଙ୍କୁ ଶିକାର କରୁଛି ବାଘ । ବିଶେଷ କରି ସନ୍ଧ୍ୟା ସମୟରେ ଟାର୍ଗେଟ କରୁଛି ଏହି ନରହନ୍ତା ବାଘଟି । ତୁରନ୍ତ ଏହି ବାଘକୁ କାବୁ କରିବାକୁ ବିଭିନ୍ନ ମହଲରେ ଦାବୀ ଉଠିଛି ।
