ଭଦ୍ରକ ସାଂପ୍ରଦାୟିକ ଅଶାନ୍ତି ରାଜ୍ୟର ଛବିକୁ ମଳିନ କରୁଛି : ନବୀନ
ଭଦ୍ରକ : ସାଂପ୍ରଦାୟିକ ଅଶାନ୍ତି ରାଜ୍ୟର ଛବିକୁ ମଳିନ କରୁଛି । ଶାନ୍ତି ଓ ସଦଭାବ ଓଡ଼ିଶାର ପରିଚୟ । ଏହାକୁ ବଜାୟ ରଖିବାକୁ ସମସ୍ତେ ଏକଜୁଟ ହୋଇ କାମ କରିବାକୁ ପଡ଼ିବ । ଭଦ୍ରକରେ ଗତ ୩ଦିନ ଧରି ସାଂପ୍ରଦାୟିକ ଅଶାନ୍ତି ମଧ୍ୟରେ ପ୍ରତିକ୍ରିୟା ରଖି ଏହା କହିଛନ୍ତି ବିରୋଧୀ ଦଳ ନେତା ନବୀନ ପଟ୍ଟନାୟକ । ଭଦ୍ରକ ଜିଲ୍ଲା ବିଜେଡିର ସାଂଗଠନିକ ସ୍ଥିତି ସମୀକ୍ଷା ବେଳେ ଏହା କହିଛନ୍ତି ନବୀନ ପଟ୍ଟନାୟକ ।
ବିଜେଡି ସରକାରର ୨୪ବର୍ଷ ଶାସନରେ ରାଜ୍ୟର ସବୁ ଅଞ୍ଚଳ ଓ ସବୁ କ୍ଷେତ୍ରର ବିକାଶକୁ ପ୍ରାଥମିକତା ଦିଆଯାଇଥିଲା । କିନ୍ତୁ ଗତ ତିନି ମାସ ଭିତରେ ରାଜ୍ୟର ବିଭିନ୍ନ ଅଞ୍ଚଳରେ ସାମ୍ପ୍ରଦାୟିକ ଅଶାନ୍ତି ଓଡିଶାର ଛବିକୁ ମଳିନ କରିଛି । ପ୍ରଥମେ ବାଲେଶ୍ୱର ପରେ ପରେ ଖୋର୍ଦ୍ଧା, ଧାମନଗର ଓ ଭଦ୍ରକରେ ସାମ୍ପ୍ରଦାୟିକ ଅଶାନ୍ତି ସରକାରଙ୍କ କାର୍ଯ୍ୟଦକ୍ଷତାକୁ ନେଇ ପ୍ରଶ୍ନ ବାଚୀ ସୃଷ୍ଟି କରିଛି ବୋଲି ସେ କହିଛନ୍ତି । ଶାନ୍ତି ଓ ସଦଭାବ ଓଡିଶାର ପରିଚୟ । ଏହାକୁ ବଜାୟ ରଖିବା ପାଇଁ ସମସ୍ତେ ଏକଜୁଟ ହୋଇ କାମ କରିବାକୁ ସେ ସମସ୍ତଙ୍କୁ ପରାମର୍ଶ ଦେଇଛନ୍ତି ।
