ବିଦେଶକୁ ଯାଇଥିଲେ ରୋଜଗାର ପାଇଁ ହେଲେ ମୃତ୍ୟୁର ୫୪ ଦିନ ପରେ ଆସି ପହଞ୍ଚିଲା ଶବ
ଟାଙ୍ଗୀ (କେନ୍ୟୁଜ୍) : ଭଲରେ ପରିବାର ଚଳାଇବେ, ଅଧିକ ରୋଜଗାର କରିବେ । ଏଇ ଆଶା ନେଇ ଯାଇଥିଲେ ସୁଦୂର ଆରବର ଜେହାଦକୁ । ହେଲେ ସେଇଠି ତାଙ୍କର ମୃତ୍ୟୁ ହୋଇଗଲା । ତେବେ ମୃତକଙ୍କ ଶବ ଆସି ନିଜ ଜନ୍ମ ମାଟିରେ ପହଞ୍ଚିଲା ୫୪ ଦିନ ପରେ । ଅତ୍ୟନ୍ତ ଶୋକାକୁଳ ପରିବେଶରେ ଗାଁ ଶ୍ମଶାନରେ ଶବ ସଂସ୍କାର କରାଯାଇଛି ।
ଖୋରଧା ଜିଲ୍ଲା ବାଣପୁର ବ୍ଲକ ଭେଟେଶ୍ୱର ପଞ୍ଚାୟତ ବାଁଳେଇ ଗାଁର ଦାମୋଦର ପ୍ରଧାନ । ନଟବର ପ୍ରଧାନଙ୍କ ସାନ ପୁଅ । ସାଉଦି ଆରବର ଜେଦା ସହରରେ ଥିବା ଏକ କମ୍ପାନୀରେ ଗାଡି ଡ୍ରାଇଭର ଭାବେ କାମ କରୁଥିଲେ। ଗତ ନଭେମ୍ବର ମାସର ୬ ତାରିଖରେ ଦାମୋଦରଙ୍କ ଦେହ ଖରାପ ହେବାରୁ ତାଙ୍କୁ ନିକଟସ୍ଥ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା। ତେବେ ଏ ସମ୍ପର୍କରେ କମ୍ପାନୀ ପକ୍ଷରୁ ପରିବାର ଲୋକଙ୍କୁ କୌଣସି ସଠିକ ସୂଚନା ଦିଆଯାଇ ନଥିଲା । ଯାହାଫଳରେ ପରିବାରବର୍ଗ ଅନେକ ଦୁଶ୍ଚିନ୍ତାରେ ଥିଲେ । ଗତ ଡିସେମ୍ବର ୯ ତାରିଖରେ ହସ୍ପିଟାଲରେ ତାଙ୍କର ମୃତ୍ୟୁ ହୋଇଥିବା ଖବର କମ୍ପାନୀ ତରଫରୁ ପରିବାର ଲୋକଙ୍କୁ ଦିଆଯାଇଥିଲା । ମୃତଦେହକୁ ବିଦେଶରୁ ଜନ୍ମ ମାଟିକୁ ଫେରାଇ ଆଣିବା ସମ୍ଭବ ନଥିବାରୁ ଦାମୋଦରଙ୍କ ପତ୍ନୀ ବବିତା କମ୍ପାନୀ କର୍ତ୍ତୃପକ୍ଷଙ୍କୁ ମୃତ ଶରୀରକୁ ପଠାଇବା ପାଇଁ ବ୍ୟବସ୍ଥା କରିବାକୁ ଅନୁରୋଧ କରିଥିଲେ।
ହେଲେ କମ୍ପାନୀ କର୍ତ୍ତୃପକ୍ଷ ସେହିଠାରେ ଶବ ପୋତିଦେବା ପାଇଁ ଧମକ ଦେଇଥିବା ଅଭିଯୋଗ କରିଥିଲେ । ତେବେ ସ୍ଥାନୀୟ ଚମ୍ପାଦେଇପୁର ଗ୍ରାମର ବାବୁଲି କୁମାର ସାହୁ ବୈଦେଶିକ ମନ୍ତ୍ରାଳୟ ସହ ଯୋଗଯୋଗ କରିଥିଲେ । ସେଠାକାର ଭାରତୀୟ ରାଷ୍ଟ୍ରଦୂତ କାର୍ଯ୍ୟାଳୟର ଭାଇସ କନସୁଲାର ସାହାବୁଦ୍ଦିନ ଖାନ ଓ କମ୍ପାନୀର ମାନବ ସମ୍ବଳ ଅଧିକାରୀ ଅହମଦ ରଜାକଙ୍କ ସହଯୋଗରେ ମୃତଦେହ ନିଜ ଗାଁରେ ଆସି ପହଁଚିଲା । ଏହା ପରେ ଦାମୋଦରଙ୍କ ଶବ ସଂସ୍କାର କରାଯାଇଛି ।
ତେବେ ସ୍ବାମୀଙ୍କ ବକେୟା ପ୍ରାପ୍ୟ, ଦରମା ସମେତ ମୃତ୍ୟୁ କାଳୀନ ସହାୟତା ମିଳି ନାହିଁ । ଏସବୁ ପାଇବା ପାଇଁ ପତ୍ନୀ ବବିତା ସ୍ଥାନୀୟ ଜନପ୍ରତିନିଧି ଓ ଜିଲ୍ଲା ପ୍ରଶାସନିକ ଅଧିକାରୀଙ୍କୁ ଆକୁଳ ନିବେଦନ କରିଛନ୍ତି।
