ମହାପ୍ରଭୁଙ୍କ ପାଇଁ ଅନେକ ଭକ୍ତ ନିଜର ଭକ୍ତିକୁ ଭିନ୍ନ ଭିନ୍ନ ଢଙ୍ଗରେ ପ୍ରକାଶ କରନ୍ତି । କିଏ ତୁଳସୀ ଓ ଫୁଲ ଦେଇ ଶ୍ରୀଜିଉଙ୍କୁ ଭକ୍ତି ଦେଖାନ୍ତି ତ କିଏ ସୁନା ଓ ରୂପା ଜିନିଷ ଦେଇ କାଳିଆ ଆଗରେ ଭାବ ପ୍ରକାଶ କରନ୍ତି । ତେବେ ଗୋଟିଏ ରୁପା ଶଙ୍ଖକୁ ଜଣେ ଭକ୍ତ ମହାପ୍ରଭୁଙ୍କ ଉଦ୍ଦେଶ୍ୟରେ ମନ୍ଦିର ପ୍ରଶାସନକୁ ହସ୍ତାନ୍ତର କରିଛନ୍ତି ।
ଏହି ରୁପା ଶଙ୍ଖର ଓଜନ ୧,୬୧୯ ଗ୍ରାମ ରହିଛି । ସମ୍ବଲପୁର ନନ୍ଦପଡାର ମୃତ୍ୟୁଞ୍ଜୟ ସାହୁଙ୍କ ପରିବାର ପକ୍ଷରୁ ଶ୍ରୀମନ୍ଦିର ପ୍ରଶାସନ କାର୍ଯ୍ୟାଳୟରେ ଏହି ଶଙ୍ଖ ପ୍ରଦାନ କରାଯାଇଛି । ମହାପ୍ରଭୁ ସୁବର୍ଣ୍ଣ ବେଶରେ ପରିଧାନ କରୁଥିବା ରୁପା ଶଙ୍ଖ ପରି ଅବିକଳ ଓଜନ ଓ ମାପର ଏହି ଶଙ୍ଖ ପ୍ରସ୍ତୁତ କରାଯାଇଛି । ଦଇତାପତି ସେବୟତଙ୍କ ସହାୟତାରେ ଶ୍ରୀମନ୍ଦିର ପ୍ରଶାସନକୁ ଏହା ପ୍ରଦାନ କରାଯାଇଛି । ସମ୍ବଲପୁରର ଜଣେ ଭକ୍ତ ନଳିନୀ ପ୍ରଭା ଦାସ ମହାପ୍ରଭୁଙ୍କ ଉଦ୍ଦେଶ୍ୟରେ ଶ୍ରୀମନ୍ଦିର କାର୍ଯ୍ୟାଳୟରେ ଏହି ରୁପା ଶଙ୍ଖ ଦାନ କରିଛନ୍ତି ।
କୌଣସି ମାନସିକ ନଥିଲେ ମଧ୍ୟ ରୁପା ଶଙ୍ଖ ଦାନ କରିବା ପାଇଁ ନଳିନୀ ପ୍ରଭା ଆଶା ରଖିଥିଲେ । ଆଜି ତାଙ୍କର ଏହି ଆଶା ପୂରଣ ହୋଇଥିବାରୁ ନଳିନୀ ପ୍ରଭା ଓ ତାଙ୍କ ପରିବାର ସଦସ୍ୟ ନିଜକୁ ଭାଗ୍ୟବାନ ମନେ କରୁଛନ୍ତି । ବିଶ୍ବ ପ୍ରସିଦ୍ଧ ରଥଯାତ୍ରା ସମୟରେ ସୁନାବେଶ ଅବସରରେ ମହାପ୍ରଭୁ ବାମ ହସ୍ତରେ ଶଙ୍ଖ ଧାରଣ କରିଥାନ୍ତି । ଏଣୁ ମହାପ୍ରଭୁଙ୍କ ଉଦ୍ଦେଶ୍ୟରେ ଭକ୍ତ ଜଣକ ଏହି ଶଙ୍ଖ ଦାନ କରିଥିବାବେଳେ ବରିଷ୍ଠ ଦଇତାପତି ସେବାୟତ ଏହାକୁ ସ୍ବାଗତ କରିଛନ୍ତି । ଭକ୍ତମାନେ ଯାହା କିଛି ମହାପ୍ରଭୁଙ୍କ ଉଦ୍ଦେଶ୍ୟରେ ଦାନ କରୁଛନ୍ତି ତାହା ଠାକୁରଙ୍କ କାର୍ଯ୍ୟରେ ଲାଗିବା ଆବଶ୍ୟକ ବୋଲି କହିଛନ୍ତି ସେବାୟତ। ତେବେ ମହାପ୍ରଭୁଙ୍କୁ ଏହି ଶଙ୍ଖ ଭକ୍ତିର ସହ ଦାନ କରି ବେଶ ଆନନ୍ଦିତ ହୋଇଛନ୍ତି ଭକ୍ତ ।
ଏହି ପରିବାର ସୁଦୂର ସମ୍ବଲପୁରରୁ ଆସି ମହାପ୍ରଭୁଙ୍କ ଉଦ୍ଦେଶ୍ୟରେ ଶଙ୍ଖ ପ୍ରଦାନ କରିଛନ୍ତି । ତାଙ୍କର ଏ ଶଙ୍ଖଟି ମହାପ୍ରଭୁଙ୍କ ନିକଟରେ ଲାଗି ହେବ ବୋଲି ଆଶ୍ବାସନା ଦିଆଯାଇଛି ।