ଦେବଗଡ ଜିଲ୍ଲାରେ ଉତ୍ତମ ସ୍ବାସ୍ଥ୍ୟ ସେବା ଯୋଗଇ ଦେବା ଲକ୍ଷ୍ୟରେ ପୂର୍ବ ସରକାର ସମୟରେ ନୂଆ ବାଲିରୋଇଠାରେ ନୂତନ କୋଠା ନିର୍ମାଣ ପାଇଁ ମଞ୍ଜୁରି ଦିଆଯାଇଥିଲା । ୪୦ ଏକର ପରିମିତ ଜମିରେ ୧୪୩ କୋଟି ଟଙ୍କା ବ୍ୟୟ ଅଟଳଳରେ ୭ମହଲା ବିଶିଷ୍ଠ ନୂତନ କୋଠା ନିର୍ମାଣ ପାଇଁ ମିଳିଥିଲା ମଞ୍ଜୁରି । ଏକ ଠିକା କମ୍ପାନୀ ଦ୍ଵାରା ୩ଶହ ଶଯ୍ୟା ବିଶିଷ୍ଠ ନୂତନ ଚିକିତ୍ସାଳୟ କୋଠା ନିର୍ମାଣ କାର୍ଯ୍ୟ କରା ଯିବା ପରେ ଗତ ୨୦୨୪ଏପ୍ରିଲ ମାସରେ ସ୍ଵାସ୍ଥ୍ୟ ବିଭାଗକୁ ଉକ୍ତ କମ୍ପାନୀ ହସ୍ତାନ୍ତର କରିଥିଲା । ହେଲେ ହସ୍ତାନ୍ତର କରିବାର ପ୍ରାୟ ବର୍ଷେ ହେବାକୁ ବସିଥିବା ବେଳେ ସରକାର ପରିବର୍ତ୍ତନ ଯୋଗୁଁ ଲୋକାର୍ପଣ ହୋଇପାରୁ ନାହିଁ ଜିଲ୍ଲା ମୁଖ୍ୟ ଚିକିସାଳୟର ନୂତନ କୋଠା ।
ନୂତନ ଅତ୍ୟାଧୁନିକ କୋଠାରେ ଅମ୍ଲଜାନ ପ୍ଲାଣ୍ଟ, ଅଟୋ ପେସେଣ୍ଟ କଲିଂ ସିଷ୍ଟମ, ଜରୁରୀ କାଳୀନ ୱାର୍ଡ, ଇଣ୍ଟିଗ୍ରେଟେଡ ଲ୍ୟାବ, ମଲଟି ଜିମ , ଲାଇବ୍ରେରୀ, ବ୍ୟାଟେରୀ ଚାଳିତ ଯାନ, ଥଣ୍ଡା ଓ ଗରମ ପାନୀୟ ଜଳର ବ୍ୟବସ୍ଥା ସହ ଅନ୍ୟାନ୍ୟ ସୁବିଧା ରହିଥିବା ବେଳେ ଆମ ହସପିଟାଲ ଯୋଜନାରେ ପ୍ରାୟ ୬କୋଟି ଟଙ୍କା ବ୍ୟୟରେ ମୁଖ୍ୟ ତୋରଣ ରାସ୍ତା ଓ ଶିଶୁ ଏବଂ ହର୍ବାଲ ଉଦ୍ୟାନ ନିର୍ମାଣ କରାଯାଇଛି ।
ସେହିପରି ୧୪୩ କୋଟି ଟଙ୍କା ବ୍ୟତିତ ଅନ୍ୟାନ୍ୟ ସୂତ୍ରରୁ ଆଟେଣ୍ଡାଣ୍ଟ ବିଶ୍ରାମ ଗାର, ମିଶନ ଶକ୍ତି କାଫେ , ଔଷଧ ସଂଗ୍ରାହଳୟ,ଆଇଟି ସେଲ ଭଳି ବିଭନ୍ନ କୋଠା ନିର୍ମାଣ କରାଯାଇଛି । ଅନ୍ୟ ପକ୍ଷରେ ପୁରୁଣା ଜିଲ୍ଲା ମୁଖ୍ୟ ଚିକିତ୍ସାଳୟ କୋଠାରୁ ନୂତନ ଜିଲ୍ଲା ମୁଖ୍ୟ ଚିକିତ୍ସାଳୟ କୋଠାକୁ ସମସ୍ତ ସାମଗ୍ରୀ ସ୍ଥାନାନ୍ତର ପାଇଁ ଟେଣ୍ଡର ପ୍ରକ୍ରିୟା ସରିଥିଲେ ମଧ୍ୟ ଏ ଯାଏଁ ସ୍ଥାନାନ୍ତର କରାଯାଇପାରି ନାହିଁ। ଏହି କୋଠା ନିର୍ମାଣ ଓ ହସ୍ତାନ୍ତର ପରେ ନିର୍ବାଚନ ଆଚରଣ ବିଧି ଲାଗୁ ହେବା କାରଣରୁ ତତକାଳିନ ସରକାର ଲୋକାର୍ପଣ କରିପାରି ନଥିଲେ । ତେବେ ନିର୍ବାଚନ ଫଳାଫଳ ଘୋଷଣା ପରେ ସରକାର ପରିବର୍ତ୍ତନ ହେବା ଯୋଗୁ ଉକ୍ତ ନୂତନ କୋଠାର ରଙ୍ଗ ପରିବର୍ତ୍ତନ ହୋଇ ନପାରିବା କାରଣରୁ ଲୋକାର୍ପଣ ହୋଇପାରୁ ନଥିବା ବିଭାଗୀୟ ମହଲରେ ଆଲୋଚନା ହେଉଛି ।
ସବୁଠୁ ବଡ଼ କଥା ହେଉଛି ଗତ ପ୍ରାୟ ୧୦ ମାସରେ ପ୍ରାୟ ୪ କୋଟି ଟଙ୍କାର ବିଦ୍ୟୁତ ବିଲ ପୈଠ କରାଯାଉଛି ମାତ୍ର ଦେଢ ଶହ କୋଟି ଟଙ୍କାର ଜିଲ୍ଲା ମୁଖ୍ୟ ଚିକିତ୍ସାଳୟ କୋଠା ଲୋକଙ୍କ ସେବାରେ ଲାଗିପାରୁ ନାହିଁ । ତେବେ ନେତା ମନ୍ତ୍ରୀ ଓ ଅଧିକାରୀ ଙ୍କ ମଧ୍ୟରେ ପ୍ରଶଂସା ସାଉଁଟିବାର ପ୍ରତିଯୋଗୀତା ଭିତରେ ନୂତନ ଚିକିତ୍ସାଳୟ କୋଠା ନିର୍ମାଣର ୧୦ ମାସ ପରେ ମଧ୍ୟ ଜିଲ୍ଲାବାସୀ ଉନ୍ନତ ସ୍ଵାସ୍ଥ୍ୟ ସେବାରୁ ବଞ୍ଚିତ ରହିଛନ୍ତି। ତେବେ ଦେଖିବାକୁ ବାକି ରହିଲା ଏହି ସେବା ଲୋକମାନେ କେବେ ପାଉଛନ୍ତି ?