ଅଣ୍ଡା ବୋଝେଇ ପିକ୍ ଅପ୍ ଧକ୍କାରେ ଯୁବକ ମୃତ, ରାସ୍ତା ଅବରୋଧ
ମୋହନା : ରାସ୍ତାରେ ପୁଅର ଶବ ଥୋଇ ଛାତି ଫଟାଇ କାନ୍ଦୁଛି ମା’ । ଖାଲି ମା’ ନୁହେଁ ପୁରା ପରିବାର କାନ୍ଦୁଛନ୍ତି । ଲୋକେ ରୁଣ୍ଡ ହୋଇଛନ୍ତି । ହୋ ହାଲ୍ଲାରେ ଫାଟି ପଡ଼ୁଛି ପୁରା ପରିବେଶ । ଏ ଦୃଶ୍ୟ ଦେଖିଲେ କେହି ବି ଧୈର୍ଯ୍ୟ ଧରି ରହିପାରିବେନି । କାରଣ ହସଖୁସିରେ ଜୀବନ ବିତାଉଥିବା ଭେଣ୍ଡଆ ପୁଅଟା ଦୁର୍ଘଟଣାରେ ଚାଲିଗଲା । ଯେଉଁଥି ପାଇଁ ପୁରା ପରିବାର ଦୁଃଖରେ ଭାଙ୍ଗି ପଡ଼ିଛନ୍ତି । ଆଜି ରାସ୍ତା ଅବରୋଧ କରି ପୁଅ ମୃତ୍ୟୁ ପାଇଁ ନ୍ୟାୟ ମାଗିଛନ୍ତି ।
ଆଜି ଅପରାହ୍ନ ସମୟରେ । ଗଜପତି ଜ଼ିଲ୍ଲା ମୋହନା ଥାନା ଅନ୍ତର୍ଗତ ମୁକ୍ତି ନଗର ଠାରେ ଏକ ଅଣ୍ଡା ବୋଝେଇ ପିକ ଅପ୍ ଭ୍ୟାନ୍ ଏବଂ ବାଇକ ମଧ୍ୟରେ ମୁହାଁ ମୁହିଁ ଧକ୍କା ହୋଇଥିଲା । ଦୁର୍ଘଟଣା ଏତେ ଭୟଙ୍କର ହୋଇଥିଲା ଯେ ବାଇକ୍ ଚାଳକ ଛିଟିକି ପଡ଼ିଥିଲେ । ଫଳରେ ଘଟଣା ସ୍ଥଳରେ ହିଁ ବାଇକ ଚାଳକଙ୍କ ମୃତ୍ୟୁ ଘଟିଛି ।
ମୃତକ ଜଣକ ହେଉଛନ୍ତି ମୋହନା ହିଲ୍ ଟପ୍ ସ୍ନାତକ ମହାବିଦ୍ୟାଳୟ ରେ ଅଧ୍ୟୟନରତ ଛାତ୍ର ଅଡବା ଗ୍ରାମର ସୁଜିତ ନାୟକ । କୌଣସି କାର୍ଯ୍ୟ ରେ ମୋହନା ଆସି ବାଇକ ଯୋଗେ ସୁଜିତ ଅଡବା ଫେରୁଥିଲେ । ହେଲେ ତାଙ୍କ ଫେରିବା ବାଟରେ ଛକି ବସିଥିଲା ଯମ । ସେ ବାଇକରେ ଯାଉଥିବା ବେଳେ ମୁକ୍ତି ନଗର ବୁଲାଣି ରାସ୍ତା ରେ ବିପରୀତ ଦିଗରୁ ଆସୁଥିବା ପିକ୍ ଅପ୍ ଭ୍ୟାନ୍ ସହ ଧକ୍କା ହୋଇଥିଲା l ଘଟଣା ସ୍ଥଳରେ ସୁଜିତଙ୍କ ମୃତ୍ୟୁ ହୋଇଥିବା ବେଳେ ପିକ୍ ଅପ୍ ଭ୍ୟାନ୍ ଚାଳକ ଘଟଣା ସ୍ଥଳରୁ ଫେରାର ହୋଇଯାଇଛି l କ୍ଷତି ପୂରଣ ଦାବି ରେ ଉତ୍ତ୍ୟକ୍ତ ଲୋକେ -ବ୍ରହ୍ମପୁର -ରାୟଗଡା କୁ ସଂଯୋଗ କରୁଥିବା 326 ନଂ ଜାତୀୟ ରାଜପଥକୁ ମୁକ୍ତି ନଗର ଠାରେ ଅବରୋଧ କରି ରଖିଥିଲେ । ଫଳରେ ଉକ୍ତ ରାସ୍ତାଦେଇ ଯାତାୟତ ଠପ୍ ହୋଇପଡିଥିଲା l
ପରେ ଖବର ପାଇ ଘଟଣାସ୍ଥଳରେ ମୋହନା ପୋଲିସ ଘଟଣା ର ତଦନ୍ତ କରି ଉତ୍ୟକ୍ତ ଲୋକମାନଙ୍କୁ ବୁଝାସୁଝା କରିଥିଲେ । ଏହାସହ ପରିବାର ଲୋକଙ୍କୁ ସାନ୍ତ୍ୱନା ଦେଇ ପ୍ରତିଶୃତି ଦେଇଥିଲେ । ନିଶ୍ଚୟ ତାଙ୍କୁ ନ୍ୟାୟ ମିଳିବ । ଏହାପରେ ରାସ୍ତା ଅବରୋଧ ହଟାଇଥିଲେ ଲୋକେ ।
