ଦିନ ରାତି ଏକ କରି ମୂର୍ତ୍ତି ଗଢିିଥିଲେ କାରିଗର, କିନ୍ତୁ ହାତୀ ଭାଙ୍ଗିଦେଲା ସବୁ ସ୍ୱପ୍ନ
ଭାବିଥିଲେ ଏଥର ଗଣେଶ ପୂଜାରେ ଭଲ ଦୁଇ ପଇସା ରୋଜଗାର କରିବେ। ସେଥିପାଇଁ ଦୀର୍ଘ ତିନି ମାସ ପୂର୍ବରୁ ମୂର୍ତ୍ତି ଗଢିବା ପାଇଁ କାରିଗରମାନେ ଜୋରଦାର ପ୍ରସ୍ତୁତି କରିଥିଲେ । ହେଲେ ହାତୀ ଆସି ଉଜାଡି ଦେଲା ମୂର୍ତ୍ତି କାରିଗରଙ୍କ ସ୍ବପ୍ନ । ଏଭଳି ଏକ ଘଟଣା ଦେଖିବାକୁ ମିଳିଛି ଢେଙ୍କାନାଳ ଜିଲ୍ଲା ହିନ୍ଦୋଳ ବ୍ଲକ୍ ଗାଲପଡ଼ା ଗାଁରେ। ସୁନ୍ଦର ସୁନ୍ଦର ମୂର୍ତ୍ତି ଗୁଡ଼ିକ ଭାଙ୍ଗି ରୁଜି ଯାଇଛି । ଦିନ ରାତି ଏକ କରି ମୂର୍ତ୍ତି ଗଢିିବାରେ ଲାଗିଥିଲେ । କିନ୍ତୁ ଗୋଟିଏ ରାତିରେ ହିଁ ଏମିତି ସବୁ ହେଇଗଲା ।
ଗାଲପଡ଼ା ଗାଁର ଶଙ୍କର ନାଏକ ଏବଂ ଚିନ୍ତାମଣି ନାଏକ ଆଜକୁ ପ୍ରାୟ ତିନି ମାସ ହେବ ଦିନରାତି ଏକ କରି ଲାଗି ପଡ଼ିଥିଲେ ମୂର୍ତ୍ତି ଗଢିବା କାମରେ । ଆଉ ମୂର୍ତ୍ତି ପାଇଁ କିଛି ଗ୍ରାହକମାନଙ୍କ ଠାରୁ ଆଡଭାନ୍ସ ମଧ୍ୟ ନେଇଥିଲେ । ହେଲେ ଗତ କାଲି ବିଳମ୍ୱିତ ରାତିରେ ପ୍ରାୟ ୧୫ ରୁ ୨୦ ଟି ହାତୀ ଆସି ଶଙ୍କର ଏବଂ ଚିନ୍ତାମଣିଙ୍କ ମୂର୍ତ୍ତି ସବୁ ଭାଙ୍ଗି ରୁଜି ଚୁର୍ ମାର୍ କରିଦେଇଛନ୍ତି । ଖବର ପାଇ ଉଭୟ ଶଙ୍କର ଏବଂ ଚିନ୍ତାମଣି ସଂଗେ ସଂଗେ ଘଟଣା ସ୍ଥଳକୁ ଆସିଥିଲେ । ହେଲେ ସତେବେଳକୁ ଆଉ କିଛି ବାକି ନଥିଲା । ତେବେ ଗଣେଶ ପୂଜା ଆଉ ମାତ୍ର ୨ ଦିନ ଥିବାବେଳେ ଗ୍ରାହକ ମାନଙ୍କୁ କିପରି ମୂର୍ତ୍ତି ଦେବେ ସଥେିପାଇଁ ଏବେ ଚିନ୍ତାରେ ଉଭୟ ମୂର୍ତ୍ତି କାରିଗର। ଖବର ପାଇ ଗ୍ରାହକମାନେ ଆସିଥିଲେ ଘଟଣା ସ୍ଥଳକୁ ଆଉ ଘଟଣା ଦେଖିବା ପରେ ଗ୍ରାହକ ମାନଙ୍କର ମଧ୍ୟ ଚିନ୍ତା ପଡିଗଲାଣି । ତେବେ ଦିନକୁ ଦିନ ହିନ୍ଦୋଳ ଉପଖଣ୍ଡରେ ବାରମ୍ୱାର ହାତୀ ଉପଦ୍ରବ ବଢୁଥିବା ବେଳେ ବନବିଭାଗ ଏଥିପ୍ରତି କେବେ ଦୃଷ୍ଟି ଦେଉଛି ତାହା ଦେଖିବାକୁ ବାକି ରହିଲା ।
