ଓଡ଼ିଶାକୁ ଉତ୍ତରପ୍ରଦେଶ ଯାଏ ଲମ୍ବିଛି ନକଲି ଔଷଧର ଚେର, କାରବାରକୁ ରୋକିବାକୁ ଚିଠି ଲେଖିଲେ ସ୍ୱାସ୍ଥ୍ୟ ସଚିବ

(କେନ୍ୟୁଜ): ଓଡ଼ିଶାକୁ ଉତ୍ତରପ୍ରଦେଶ ଯାଏ ଲମ୍ବିଛି ନକଲି ଔଷଧର ଚେର । ଆଗକୁ କଡ଼ା ଆକ୍ସନ ହେବ । ଜୋରଦାର ହେବ ତଦନ୍ତ । ଏଥିପାଇଁ ଉତ୍ତରପ୍ରଦେଶ ସ୍ୱାସ୍ଥ୍ୟ ସଚିବଙ୍କୁ ଚିଠି ଲେଖିଛନ୍ତି ରାଜ୍ୟ ସ୍ୱାସ୍ଥ୍ୟ ସଚିବ ଶାଳିନୀ ପଣ୍ଡିତ । ଆନ୍ତଃରାଜ୍ୟ ନକଲି ଔଷଧ କାରବାର ରୋକିବା ଦିଗରେ ପଦକ୍ଷେପ ନେବାକୁ ସହଯୋଗ ଲୋଡିଛନ୍ତି । ଚିଠିରେ ଶାଳିନୀ ପଣ୍ଡିତ ଲେଖିଛନ୍ତି, ବରଗଡ଼ ଓ ଝାରସୁଗୁଡ଼ାର ଦୁଇଟି ଔଷଧ ଦୋକାନ ଓ ଏଜେନ୍ସୀ ଉତ୍ତରପ୍ରଦେଶ ବାରଣାସୀର ଦୁଇଟି ଏଜେନ୍ସୀଠାରୁ ଔଷଧ ଆଣୁଥିଲେ ।

ଏହାର ସୁରାକ ମିଳିବା ପରେ ଡ୍ରଗ୍ସ ଏନଫୋର୍ସମେଣ୍ଟର ଏକ ସ୍ପେଶାଲ୍‌ ଟାକ୍ସ ଫୋର୍ସ ଟିମ୍‌ ତଦନ୍ତ କରିଥିଲା । ତଦନ୍ତରୁ ଜଣା ପଡିଥିଲା ନକଲି ଔଷଧର ଆନ୍ତଃରାଜ୍ୟ ଲିଙ୍କ । ବରଗଡ଼ର ଅଶୋକ ମେଡିକାଲ୍‌ ହଲ୍‌ ଓ ଝାରସୁଗୁଡ଼ାର ଅମିତ ମେଡିକାଲ୍‌ ହଲ୍‌ ବାରଣାସୀର ୩ଟି ଏଜେନ୍ସୀରୁ ଆଣୁଥିଲେ ନକଲି ଔଷଧ । ତଦନ୍ତ ପାଇଁ ପୋଲିସର ଏକ ତିନି ଜଣିଆ ଟିମ୍‌ ଗଠନ କରାଯାଇଥିଲା ।