ଚାଷୀ ମୃତ୍ୟୁ ପ୍ରସଙ୍ଗରେ ତାତିଲା ବିଧାନସଭା, ରାଜ୍ୟ ଓ କେନ୍ଦ୍ର ସରକାରଙ୍କୁ ଟାର୍ଗେଟ କଲେ କଂଗ୍ରେସ ବିଧାୟକ ଦଳ ନେତା

ଚାଷୀ ମୃତ୍ୟୁ ପ୍ରସଙ୍ଗରେ ତାତିଲା ବିଧାନସଭା। ଅରୁଣ-ନରସିଂହ କଥା କଟାକଟି । ଆଜି ବିଧାନସଭାରେ କଂଗ୍ରେସ ଆଣିଥିବା ମୁଲତବୀ ପ୍ରସ୍ତାବ ଆଲୋଚନା ବେଳେ ଏମିତି ସ୍ଥିତି ଦେଖିବାକୁ ମିଳିଛି। ଚାଷୀ ମୃତ୍ୟୁ ପ୍ରସଙ୍ଗରେ ଉଭୟ ରାଜ୍ୟ ଓ କେନ୍ଦ୍ର ସରକାରଙ୍କୁ ଟାର୍ଗେଟ କରିଛନ୍ତି କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର । କହିଥିଲେ, ସଂସଦରେ ବିଜେଡି ସାଂସଦ ପ୍ରସନ୍ନ ଆଚାର୍ଯ୍ୟ କହିଛନ୍ତି, ଚାଷଜନିତ କାରଣ ପାଇଁ ଚାଷୀ ଆତ୍ମହତ୍ୟା କରୁଛନ୍ତି । ପ୍ରତି ଚାଷୀ ମୃତ୍ୟୁ ତଦନ୍ତ ରିପୋର୍ଟ ଜିଲ୍ଲାସ୍ତରରୁ ଆସିଥାଏ । ସରକାର ସମସ୍ତ ରିପୋର୍ଟ ବିଧାନସଭାରେ ଉପସ୍ଥାପନ କରନ୍ତୁ ବୋଲି ଦାବି ରଖିଛନ୍ତି ନରସିଂହ । ଅନ୍ୟପକ୍ଷରେ କୃଷିମନ୍ତ୍ରୀ ଅରୁଣ ସାହୁ କହିଛନ୍ତି, ଯେଉଁଠି ଚାଷୀଙ୍କ ସହ ଅଘଟଣ ଘଟୁଛି, ଜିଲ୍ଲାସ୍ତରରୁ ରିପୋର୍ଟ ମଗାଯାଉଛି। ହେଲେ ଏଥିରୁ କିଛି ବ୍ୟକ୍ତି ରାଜନୈତିକ ଫାଇଦା ନେବାକୁ ଚାହୁଁଛନ୍ତି । ସେପଟେ ବିଜେପି କହିଛି, ଚାଷୀ ମୃତ୍ୟୁକୁ ନେଇ ବିଭ୍ରାନ୍ତିକର ତଥ୍ୟ ଦେଉଛନ୍ତି ରାଜ୍ୟ ସରକାର । ଗତକାଲି ରାଜ୍ୟ ଆକସ୍ମିକ ପାଣ୍ଠି ନେଇ ଅତିରିକ୍ତ ଖର୍ଚ୍ଚ ଦାବି ବିନା ଆଲୋଚନାରେ କାହିଁକି ଗୃହୀତ ହେଲା ତାହାକୁ ନେଇ ବିଜେପି ଗୃହରେ ହଟ୍ଟଗୋଳ କରିଥିଲା। ଏଭିତରେ କୃଷି ସମ୍ପର୍କିତ ମୁଲତବୀ ପ୍ରସ୍ତାବ ଆଲୋଚନା ଶେଷ ହୋଇଥିଲା।