ନଳକୂପ ବ୍ୟବହାରକୁ ନେଇ ଯୁବକଙ୍କୁ ଗଛରେ ବାନ୍ଧି ନିସ୍ତୁକ ମାଡ଼, ଭିଡିଓ ଭାଇରାଲ ପରେ ତଦନ୍ତ ଆରମ୍ଭ

ନୟାଗଡ଼ : ନଳକୂପ ବ୍ୟବହାରକୁ କେନ୍ଦ୍ର କରି ଯୁବକଙ୍କୁ ଗଛରେ ବାନ୍ଧି ନିସ୍ତୁକ ମାଡ଼ । ଭାଇରଲ୍ ହେଉଛି ଅମାନୁଷିକ ମାଡ଼ର ମାରିବା ଭିଡ଼ିଓ। ନୟାଗଡ଼ ଜିଲ୍ଲା ଫତେଗଡ ଥାନା ବଡ଼ସହରା ଗାଁର ଜଣେ ଯୁବକଙ୍କ ହାତକୁ ଗଛରେ ବାନ୍ଧି ଅତି ଅମାନୁଷିକ ଭାବେ କିଛି ଲୋକ ମାଡ଼ ମାରୁଥିବା ଭିଡିଓ ଭାଇରାଲ୍ ହୋଇଛି। ଆକ୍ରମଣର ଶିକାର ଯୁବକ ଜଣକ ହେଲେ ଅରୁଣ ମୂଳି । ତାଙ୍କ ମୁହଁ ଓ ମୁଣ୍ଡରେ ଗଭୀର ଆଘାତ ଲାଗିଥିବା ବେଳେ ସେ ଅର୍ଦ୍ଧଉଲଗ୍ନ ଅବସ୍ଥାରେ ରାସ୍ତା କଡ଼ରେ ପଡ଼ିରହିଥିବା ଦେଖିବାକୁ ମିଳିଛି। ତାଙ୍କ ହାତ ବାନ୍ଧି ଦିଆ ଯାଇଥିବା ବେଳେ ସେ ଆକ୍ରମଣକାରୀ ମାନଙ୍କୁ ପ୍ରତିରୋଧ କରିପାରୁ ନାହାନ୍ତି।

ଜଣେ ମହିଳା ଓ ପୁରୁଷ ହାତରେ କାଠ ଫାଳିଆ ଧରି ତାଙ୍କୁ ମାଡ଼ ମାରୁଥିବା ଭିଡିଓରୁ ସ୍ପଷ୍ଟ ଭାବେ ଦେଖିବାକୁ ମିଳିଛି । ଭିଡିଓ ଭାଇରାଲ ପରେ ପୋଲିସ ତଦନ୍ତ କରିଛି ।  ପୋଲିସ ସୂଚନା ମୁତାବକ,୨ ପରିବାରର ପୂର୍ବ ଶତ୍ରୁତା ଯୋଗୁଁ ଏପରି ଘଟଣା ଘଟିଛି । ଅରୁଣ ଜଣେ ଗାଡି ଚାଳକ ହୋଇଥିବା ବେଳେ ସେ ଭୁବନେଶ୍ଵରରେ ରୁହନ୍ତି । ନଳକୂପ ବ୍ୟବହାର କରିବାକୁ ନେଇ ୨ ପରିବାର ଝଗଡା ହୋଇଥିଲେ।  ଗୁରୁବାର ଦିନ ଅରୁଣ ଗାଁରେ ପହଞ୍ଚି ଜୋର ଜବରଦସ୍ତ ନଳକୂପ ବ୍ୟବହାର କରିଥିବାରୁ ଏମିତି ଘଟଣା ଘଟିଥିବା ପୋଲିସ କହିଛି । ଗୁରୁତର ଅବସ୍ଥାରେ ତାଙ୍କୁ ଉଦ୍ଧାର କରାଯାଇ ଭାପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ପରେ ଭୁବନେଶ୍ଵରସ୍ଥିତ ଏମ୍ସ ହସ୍ପିଟାଲ୍ ପଠାଯାଇଛି ।