ପୁରୀ(କେନ୍ୟୁଜ୍): ପୁରୀ ଜିଲ୍ଲାର ପିପିଲି ଥାନା ଅଞ୍ଚଳରେ ଜଣେ ବୋହୂକୁ ଶ୍ୱଶୁର ଅସଦାଚରଣ କରିଥିବାର ଘଟଣା ଏବେ ଚାଞ୍ଚଲ୍ୟ ଖେଳାଇଛି। ଏହି ଘଟଣାର ଭିଡିଓ ଏବେ ବିଭିନ୍ନ ମୋବାଇଲକୁ ଘୁରି ବୁଲୁଥିବାର ଜଣାଯାଇଛି। ଏହି ଘଟଣା ପିପିଲି ଥାନା ଅନ୍ତର୍ଗତ ସାତଶଙ୍ଖ ଗାଁର । ପୀଡ଼ିତାଙ୍କ ଅଭିଯୋଗ ଅନୁଯାୟୀ ତାଙ୍କ ଶ୍ୱଶୁର ପଞ୍ଚୁ ମଲ୍ଲିକ (୭୬)ତାଙ୍କୁ ନିୟମିତଭାବେ ଅସଦାଚରଣ କରିବାଲାଗି ଅଶ୍ଳୀଳ ଇଙ୍ଗିତ ଦେଉଥିଲେ। ଶେଷରେ ସେ ନିଜର କାମଲାଳସା ମେଣ୍ଟାଇବାରେ ସଫଳ ହୋଇଥିଲେ। ଆଉ ଏସବୁର ଭିଜୁଆଲକୁ ନିଜ ମୋବାଇଲରେ ରେକର୍ଡିଂ କରିଛନ୍ତି ପୀଡ଼ିତା ବୋହୂ । ଅଭିଯୋଗ ଅନୁଯାୟୀ ଘରେ ସ୍ୱାମୀ ରହୁ ନଥିବାର ସୁଯୋଗ ନେଇ ଶ୍ୱଶୁର ଜଣକ ପୂର୍ବରୁ ଅନେକ ଥର ବୋହୂଙ୍କୁ ଏଭଳି ନିର୍ଯ୍ୟାତନା ଦେଇଆସୁଥିଲେ । କିନ୍ତୁ ଏନେଇ ବୋହୂ ସ୍ୱାମୀ ଓ ପରବାରବର୍ଗଙ୍କୁ ଜଣାଇଥିଲେ ମଧ୍ୟ ଏହାକୁ କେହି ବିଶ୍ୱାସ କରିନଥିଲେ । ଶେଷରେ ପ୍ରମାଣ ପାଇଁ ଏକ ଭିଡିଓ ସୁଟ୍ କରିଛନ୍ତି ପୀଡ଼ିତା ।
ଅଭିଯୁକ୍ତ ପଞ୍ଚୁ ମଲ୍ଲିକ ଜଣେ ଅବସରପ୍ରାପ୍ତ ଆରପିଏଫ୍ ଇନସ୍ପେକ୍ଟର। ତାଙ୍କ ପୁଅ ତଥା ପୀଡ଼ିତାଙ୍କ ସ୍ବାମୀ ରେଳବାଇରେ ଚାକିରୀ କରୁଥିବା ହେତୁ ଓଡ଼ିଶା ବାହାରେ ରହନ୍ତି। ପୀଡ଼ିତାଙ୍କର ଏକ ୨ବର୍ଷର ପୁଅଟିଏ ଥିବା ସୂଚନା ମିଳିଛି। ଗତକାଲି ରାତି ପ୍ରାୟ ସାଢ଼େ ୧୦ଟାବେଳେ ପୀଡ଼ିତା ପିପିଲି ଥାନାରେ ଅଭିଯୋଗ କରିବାପରେ ଥାନାରେ ଏକ ମାମଲା ରୁଜୁ ହୋଇଛି। ପୁଲିସ ଏହି ଘଟଣାର ତଦନ୍ତ ଆରମ୍ଭ କରିଛି। ରିପୋର୍ଟ ଅନୁଯାୟୀ ବର୍ତ୍ତମାନ ଅଭିଯୁକ୍ତ ଶ୍ୱଶୁରଙ୍କୁ ଗିରଫ କରାଯାଇନାହିଁ।