ହୃଦୟବିଦାରକ ଘଟଣା, ପାରିବାରିକ କଳହରୁ ବିଷ ପିଇ ଆଗପଛ ହୋଇ ଚାଲିଗଲେ ଦମ୍ପତି
କେନ୍ଦୁଝର : ପାରିବାରିକ କଳହର କରୁଣ ପରିଣତି । ବିଷ ପିଇ ଆଗପଛ ହୋଇ ଚାଲିଗଲେ ଦମ୍ପତି । କେନ୍ଦୁଝର ଜିଲ୍ଲା ଆନନ୍ଦପୁର ଥାନା ଷଡଙ୍ଗୀ ଗାଁରେ ଏଭଳି ଅଭାବନୀୟ ଘଟଣା ଘଟିଛି । ଗତ ଗୁରୁବାର ଦିନ ଷଡ଼ଙ୍ଗୀ ଗାଁର ମୋହନ ହୋ ବାଉଁଶଗଡ ଗାଁରେ ବାପ ଘରେ ରହୁଥିବା ସ୍ତ୍ରୀ ରଜନୀଙ୍କ ନିକଟକୁ ଯାଇଥିଲେ । ସେଠାରେ ଉଭୟ ସ୍ବାମୀସ୍ତ୍ରୀଙ୍କ ମଧ୍ଯରେ କୌଣସି କାରଣକୁ ନେଇ ଝଗଡ଼ା ହୋଇଥିଲା । ଏହା ପରେ ରଜନୀ ବିଷପିଇ ଦେଇଥିଲେ।
ଗୁରୁତର ଅବସ୍ଥାରେ ତାଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ସେଠାରେ ତାଙ୍କୁ ମୃତ ଘୋଷଣା କରିଥିଲେ ଡାକ୍ତର । ସ୍ତ୍ରୀଙ୍କ ମୃତ୍ଯୁକୁ ସହିନପାରି ଗତକାଲି ସ୍ବାମୀ ମୋହନ ବିଷ ପିଇଦେଇଥିଲେ । ଗୁରୁତର ଅବସ୍ଥାରେ ତାଙ୍କୁ ଆନନ୍ଦପୁର ଡାକ୍ତରଖାନାରେ ଭର୍ତ୍ତି କରାଯାଇଥିଲା । ତେବେ ତାଙ୍କ ଅବସ୍ଥା ସଙ୍କଟାପନ୍ନ ହେବାରୁ କଟକ ସ୍ଥାନାନ୍ତର ପାଇଁ ଉଦ୍ୟମ ହେଉଥିବା ବେଳେ ମୋହନଙ୍କର ମୃତ୍ୟୁ ହୋଇଛି । ବିଷ ପିଇ ଦମ୍ପତିଙ୍କ ମୃତ୍ୟୁ ପରେ ଗାଁରେ ଶୋକାକୂଳ ପରିବେଶ ସୃଷ୍ଟି ହୋଇଛି ।
