ହକି ବିଶ୍ୱ କପ୍ ଉଦ୍ଘାଟନୀ ଉତ୍ସବ : ଦେଲା କିଏ ? ନେଲା କିଏ ?
ଭୁବନେଶ୍ୱର (କେ ନ୍ୟୁଜ୍) : ଆଜିର ଯୁଗରେ ଅନ୍ତତଃ ଭାରତରେ ଏମିତି କିଛି ନାହିଁ ଯେଉଁଥିରେ ଟିକେ ରାଜନୀତି ନହୁଏ । ଏଥିରୁ ବା ବାଦ୍ କେମିତି ପଡ଼ିଥାନ୍ତା ହକି ବିଶ୍ୱ କପ୍ । ଓଡ଼ିଶା ଭଳି ଏକ ରାଜ୍ୟ ବିଶ୍ୱର ସର୍ବବୃହତ୍ ହକି ଟୁର୍ଣ୍ଣାମେଣ୍ଟ ଆୟୋଜନ କରିବା କିଛି କମ୍ ଗୌରବର କଥା ନୁହେଁ । ଟୁର୍ଣ୍ଣାମେଣ୍ଟକୁ ଆଉ ଟିକେ ଆକର୍ଷଣୀୟ କରିବା ଲାଗି ଆୟୋଜକ ଓଡ଼ିଶା ସରକାର ଦୁଇ ଦୁଇଟି ଉଦ୍ଘାଟନୀ ଉତ୍ସବର ଆୟୋଜନ କଲେ । ଏହା ପଛର କାରଣ ଲୋକଙ୍କ ଡିମାଣ୍ଡ ବୋଲି କହିଲେ ଆୟୋଜକ । ତେଣୁ ଭୁବନେଶ୍ୱର କଳିଙ୍ଗ ଷ୍ଟାଡିୟମ୍ରେ ୨୭ ତାରିଖ ଏବଂ ୨୮ ତାରିଖରେ କଟକ ବାରବାଟୀ ଷ୍ଟାଡିୟମରେ ଝଲସିଲେ ବଲିଉଡ୍ ଷ୍ଟାର । ରାଜଧାନୀରେ ଶାହାରୁଖ ତ ପୁରାତନ ରାଜଧାନୀରେ ସଲମାନ୍ । ଲୋକେ ଭରପୂର ମଜା ଉଠାଇଲେ ।
ତେବେ ଏହା ପରେ ଏହାକୁ ନେଇ ଚାଲିଛି ରାଜନୀତି । ଆଗକୁ ନିର୍ବାଚନକୁ ଦେଖି ଏସବୁ କରାଯାଉଛି ବୋଲି ବିରୋଧୀ ଅଭିଯୋଗ ଆଣିଛନ୍ତି ଶାସକ ଦଳ ବିରୋଧରେ । ଏମିତିକି ସଲମାନ ଓ ଶାହାରୁଖ ଉତ୍ସବକୁ ଆସିବା ପାଇଁ ଯେଉଁ ଅର୍ଥ ନେଇଛନ୍ତି ତାହା ମଧ୍ୟ ରାଜ୍ୟ ସରକାର ଦେିଛନ୍ତି ବୋଲି ଚର୍ଚ୍ଚା ଚାଲିଛି । ଶେଷରେ ହକି ଇଣ୍ଡିଆକୁ ଏହା ଉପରେ ସ୍ପଷ୍ଟୀକରଣ ଦେବାକୁ ପଡ଼ିଛି । ହକି ଇଣ୍ଡିଆ ଟ୍ଵିଟ୍ କରି କହିଛି ‘ଓଡ଼ିଶା ସରକାର ନୁହେଁ ହକି ଇଣ୍ଡିଆର ସ୍ପନସର ଉଭୟ ଉଦଘାଟନୀ ଉତ୍ସବ ପାଇଁ ଖର୍ଚ୍ଚ କରିଛନ୍ତି’ । ଗଣମାଧ୍ୟମରେ ଅନେକ ନକାରାତ୍ମକ ରିପୋର୍ଟ ଲେଖା ଯାଉଛି । ଏହା ଠିକ୍ ନୁହେଁ । ହକିକୁ ଭଲ ପାଇ ସମର୍ଥନ ଜଣାଉଥିବା ଲୋକଙ୍କୁ ଆମେ ହୃଦୟର ସହ କୃତଜ୍ଞତା ଜଣାଉଛୁ ବୋଲି ହକି ଇଣ୍ଡିଆ କହିଛି ।
HI would like to heartily thank all who have supported us for love of Hockey. In response to some mischievous media reports, we clarify, that the opening ceremony in BBSR and celebrations in Cuttack are financially supported by sponsors of Hockey India and not by Govt. of Odisha.
— Hockey India (@TheHockeyIndia) November 29, 2018
ତେବେ ଦେଲା କିଏ ଓ ନେଲା କିଏ ସେଥିରେ ଫ୍ୟାନ୍ମାନଙ୍କର କିଛି ମତଲବ ନାହିଁ । ବଲିଉଡ୍ ଷ୍ଟାରଙ୍କ ସହ ବଢ଼ିଆ ହକି ମ୍ୟାଚ୍ ଦେଖି ମଜା ଉଠାଇବାରେ ଲାଗିଛନ୍ତି । ତଥାପି ଦେଖିବାର ଅଛି ଏଇ ହକି ରାଜନୀତିରେ କିଏ କାହାକୁ ମାତ୍ ଦେଉଛି ।
