ପୁଣି ଚର୍ଚ୍ଚାରେ ସ୍ଵାଧୀନ ବିଧାୟୀକା ପ୍ରାର୍ଥିନୀ ସୋନାଲୀ, ଶଗଡ ଗାଡିରେ ଯାଇ ନାମାଙ୍କନ ଭରିଲେ 

ସୁବର୍ଣ୍ଣପୁର(କେନ୍ୟୁଜ): ପୁଣି ଚର୍ଚ୍ଚାରେ ସ୍ଵାଧୀନ ବିଧାୟୀକା ପ୍ରାର୍ଥିନୀ ସୋନାଲୀ ବିଶି । ଏହି ସ୍ଵାଧୀନ ବିଧାୟୀକା ପ୍ରାର୍ଥିନୀଙ୍କ ନିଆରା ନାମାଙ୍କନ ଶୋଭାଯାତ୍ରା ଦେଖିବାକୁ ମିଳିଛି ସୁବର୍ଣ୍ଣପୁର ସହରରେ । ସୋନପୁର ବିଧାନସଭା ନିର୍ବାଚନ ମଣ୍ଡଳୀରୁ ସ୍ଵାଧୀନ ଭାବେ ନିର୍ବାଚନ ଲଢୁଥିବା ଚାଷୀ ପ୍ରତିନିଧି ସୋନାଲୀ ବିଶି ତାଙ୍କ ନାମାଙ୍କନ ପତ୍ର ଦାଖଲ କରିସାରିଛନ୍ତି । ଚାଷୀ ସରକାର ନାରା ଦେଇ ନିର୍ବାଚନ ଲଢୁଥିବା ସୋନାଲୀ ବିଭିନ୍ନ ସମୟରେ ନିଆରା କାର୍ଯକ୍ରମ କରି ଚର୍ଚ୍ଚାରେ ରହି ଆସୁଥିବା ସୋନାଲୀ ଏକ ନିଆରା ଶୋଭାଯାତ୍ରା କରିଥିବା ଦେଖିବାକୁ ମିଳିଛି ।

ପ୍ରଦୂଷଣ ମୁକ୍ତ ସମାଜର ବାର୍ତ୍ତା ଦେବା ସହିତ ଚାଷୀଙ୍କ ଅତି ଆପଣାର ଶଗଡ ଗାଡିରେ ନିଜର ଶୋଭାଯାତ୍ରା କରିଛନ୍ତି । ୧୨ ଟି ଶଗଡ ଗାଡି ଗାଡିରେ ଶତାଧିକ ଚାଷୀଙ୍କ ସହିତ ସ୍ଥାନୀୟ ରୟାଲ ପଡିଆରୁ ଶୋଭାଯାତ୍ରା ବାହାରି ବ୍ଲକ ଛକ, ଆମ୍ବେଦକର ଛକ ଦେଇ ଉପ ଜିଲ୍ଲାପାଳଙ୍କ କାର୍ଯ୍ୟଳୟକୁ ପହଞ୍ଚିଥିଲେ । ସେଠାରେ ନିଜ ପଣତରେ ନାମାଙ୍କନ ଖର୍ଚ୍ଚ ପାଇଁ ଲୋକଙ୍କ ଠାରୁ ସହାୟତା ରାଶି ମାଗିଥିଲେ ।

ତେବେ ଚାଷୀଙ୍କ ସହ ସାଧାରଣ ଲୋକ ଯିଏ ଯାହା ପାରିଲା ତାଙ୍କୁ ସହାୟତା ମଧ୍ୟ ଦେଇଥିଲେ । ଏହି ଟଙ୍କାରେ  ନାମାଙ୍କନ ଦାଖଲ କରିବା ସହିତ ଆଗାମୀ ଦିନରେ ଚାଷୀମାନଙ୍କ ଆଶୀର୍ବାଦରେ ବିଜୟୀ ହେବାର ସେ ଆଶା ରଖିବା ସହିତ ଚାଷୀଙ୍କ ପାଇଁ ସଂଘର୍ଷ ଜାରି ରହିବ ବୋଲି ପ୍ରତିକ୍ରିୟା ଦେଇଛନ୍ତି । ସୋନପୁର ବିଧାନସଭା ନିର୍ବାଚନ ମଣ୍ଡଳୀରୁ ସ୍ଵାଧୀନ ଭାବେ ନିର୍ବାଚନ ଲଢୁଥିବା ସୋନାଲୀ ବିଶିଙ୍କୁ ଆଗାମୀ ଦିନରେ ସ୍ଥାନୀୟ ଜନସାଧାରଣ କେତେ ସହଯୋଗ କରିବେ ତାହା ସମୟ କହିବ ।