ଭୁବନେଶ୍ୱର ଭୀମଟାଙ୍ଗି ହତ୍ୟା ମାମଲା, ପ୍ରିୟଙ୍କାକୁ ହତ୍ୟା କରିଛି ଜଗନ୍ନାଥ: ଡିସିପି
ଭୁବନେଶ୍ୱର(କେନ୍ଯୁଜ): ଭୁବନେଶ୍ୱର ଭୀମଟାଙ୍ଗୀ ପ୍ରିୟଙ୍କା ପ୍ରିୟଦର୍ଶିନୀ ସାହୁ ହତ୍ୟା ମାମଲାରେ ଅଭିଯୁକ୍ତ ଜଗନ୍ନାଥ ପ୍ରଧାନର ବୟାନ । ଜେରା ବେଳେ ପୋଲିସକୁ ଚାଞ୍ଚଲ୍ୟକର ବୟାନ ଦେଇଛି ଅଭିଯୁକ୍ତ । ପ୍ରିୟଙ୍କାଙ୍କୁ ହତ୍ୟା କରିଥିବା ସେ ସ୍ୱୀକାର କରିଛି । ଘଟଣାଦିନ ୯ଟାରେ ପ୍ରିୟଙ୍କାଙ୍କ ଘରକୁ ଯାଇଥିଲା । ତାଙ୍କୁ ସାଙ୍ଗରେ ନେବାକୁ ବାଧ୍ୟ କରିଥିଲା । ଏହାକୁ ନେଇ ଉଭୟଙ୍କ ମଧ୍ୟରେ ପ୍ରବଳ ପାଟିତୁଣ୍ଡ ହୋଇଥିଲା । ହତ୍ୟାକାଣ୍ଡ ଯୋଜନାବଦ୍ଧ ଥିଲା । ଏନେଇ ପୋଲିସ ହାତରେ ଯଥେଷ୍ଟ ପ୍ରମାଣ ମିଳିଛି ବୋଲି ଭୁବନେଶ୍ୱର ଡିସିପି ଉମାଶଙ୍କର ଦାଶ ସୂଚନା ଦେଇଛନ୍ତି । ଆଜି ଅଭିଯୁକ୍ତ ଜଗନ୍ନାଥକୁ ଭୁବନେଶ୍ୱର ଏମ୍ସରୁ ଡିସଚାର୍ଜ ପରେ ତାକୁ ଏୟାରଫିଲ୍ଡ ଥାନାରେ ଜେରା କରିଛି ପୋଲିସ । ହତ୍ୟାକାଣ୍ଡ ସଂପର୍କରେ ଜଗନ୍ନାଥକୁ ଅଧିକ ପଚରାଉଚରା କରାଯାଇଛି।
ମିଳିଥିବା ସୂଚନା ଅନୁଯାୟୀ, ଅଭିଯୁକ୍ତ ଜଗନ୍ନାଥ ପ୍ରଧାନ ଘଟଣାର ୪ ଦିନ ପୂର୍ବରୁ ସୁଇସାଇଡ ନୋଟ ଲେଖିଥିଲା । ଘଟଣାଦିନ ସେ ଭୀମଟାଙ୍ଗିରେ ପ୍ରିୟଙ୍କା ରହୁଥିବା ଭଡ଼ାଘରକୁ ଆସିବା ସମୟରେ ତାଙ୍କ ଛୋଟ ପୁଅ ଘରେ ଥିଲା । ଘର ମାଲିକ ସେହି ସମୟରେ ଆସି ଦହିବରା ଦେଇଥିଲେ । ସେତେବେଳେ ଜଗନ୍ନାଥ ବାଥରୁମରେ ଲୁଚି ଯାଇଥିଲା । ଘର ମାଲିକ ପୁଅକୁ ଆସି ନେଇଯାଇଥିଲେ । ଫଳରେ ସେ ବଞ୍ଚିଯାଇଥିଲା । ଏଭିତରେ ପ୍ରିୟଙ୍କା ପ୍ରିୟଦର୍ଶିନୀଙ୍କ ବ୍ୟବଛେଦ ରିପୋର୍ଟ ପୋଲିସ ହାତରେ ଲାଗିଛି । ପ୍ରିୟଙ୍କାଙ୍କ ଶରୀରରେ ଏକାଧିକ ଆଘାତ ଥିବା ରିପୋର୍ଟରୁ ଜଣାପଡିଥିଲା। ଗତ ୫ ତାରିଖରେ ପ୍ରିୟଙ୍କାଙ୍କୁ ଅତି ନିର୍ମମ ଭାବେ ହତ୍ୟା କରିଥିଲା ଜଗନ୍ନାଥ। ଏହାପରେ ଆତ୍ମହତ୍ୟା ଉଦ୍ୟମ କରିଥିଲା। ଘଟଣା ପରଠାରୁ ଚିକିତ୍ସା ପାଇଁ ଜଗନ୍ନାଥକୁ ପ୍ରଥମେ କ୍ୟାପିଟାଲ ହସ୍ପିଟାଲ ପରେ ଏକ ଶିର କଟିଥିବାରୁ ଏମ୍ସରେ ଭର୍ତ୍ତି କରାଯାଇଥିଲା।
