ସାଲେପୁର : ଫିଲ୍ମ ଷ୍ଟାଇଲରେ ଡକାୟତ ଗିରଫ । କଟକ ଜିଲ୍ଲା ମାହାଙ୍ଗା ଥାନା କୁଣ୍ଡି ବଡପୋଲ ନିକଟରେ ଲୁଟେରାଙ୍କୁ ଧରିଛି ମାହାଙ୍ଗା ପୋଲିସ । ଗିରଫ ଲୁଟେରାଙ୍କ ନିକଟରୁ ବନ୍ଧୁକ, ମାରାଣାସ୍ତ୍ର ଜବତ । ଏମାନଙ୍କ ନାଁରେ ଛିନ୍ତାଇ ମାମଲା ରହିଛି ।
ଖବର ଅନୁଯାୟୀ, ଜୟପୁର ଫାଣ୍ଡିର ସାଲେପୁର-ଛତିଆ ରାସ୍ତାର କୋଠପଦା ବଡ଼ ପୋଲ ପାଖରେ ଫାଇନାନ୍ସ କମ୍ପାନୀର ଦୁଇ ଜଣ ଯୁବକଙ୍କୁ ବାଇକରେ ଆସି ବନ୍ଧୁକ ଦେଖାଇ ରାସ୍ତା ମଝିରେ ଲୁଟୁଥିଲେ ୩ ଦୁର୍ବୃତ୍ତ । ସଂଯୋଗବଶତଃ ପୋଲିସ ସେହି ସମୟରେ ଆସି ପହଞ୍ଚି ଯାଇଥିଲା । ତାପରେ ଫିଲ୍ମ ଷ୍ଟାଇଲରେ ଆରମ୍ଭ ହୋଇ ଯାଇଥିଲା ଗୋଡ଼ାଗୋଡି । ଜଣକୁ ରାସ୍ତା ଉପରେ କାବୁ କଲା ପୋଲିସ । ଏହି ସମୟରେ ଆଉ ଦୁଇଜଣ ବିଲ ଆଡକୁ ଦଉଡି ପଳାଇ ଯାଉଥିବା ବେଳେ ସେମାନଙ୍କୁ ମଧ୍ୟ ସ୍ଥାନୀୟ ଲୋକଙ୍କ ସହାୟତାରେ କାବୁ କଲା ପୋଲିସ । ୩ ଲୁଟେରାଙ୍କ ଠାରୁ ବାଇକ ସହ ଗୋଟିଏ ବନ୍ଧୁକ, ଗୋଟିଏ ଛୁରୀ ଓ ଗୋଟିଏ କଟୁରି ଜବତ କରିଛି ପୋଲିସ । ଆଜି ୩ ଡକାୟତଙ୍କୁ କୋର୍ଟ ଚାଲାଣ କରାଯିବ । ଏମାନଙ୍କ ନାଁରେ କେଉଁ କେଉଁ ଥାନାରେ ମାମଲା ରହିଛି, ତାହାର ତଦନ୍ତ କରୁଛି ମାହାଙ୍ଗା ଥାନା ପୋଲିସ ।