ଗଞ୍ଜାମରେ ବୁଲୁଛି ମହାବଳ: ଟ୍ରାକ୍ କରିବାକୁ ଗଠିତ ହୋଇଛି ସ୍ୱତନ୍ତ୍ର ମନିଟରିଂ ଗ୍ରୁପ୍

ଗଞ୍ଜାମ:  ମହାରାଷ୍ଟ୍ରରୁ ଆସିଛି ମହାବଳ । ବାଘର ଗତିବିଧି ଉପରେ ନଜର ରଖାଯାଇଥିବା ସୂଚନା ଦେଇଛନ୍ତି ବ୍ରହ୍ମପୁର DFO ।  ବାଘଟି ବର୍ତ୍ତମାନ ଗଞ୍ଜାମ ଜିଲ୍ଲାର ବିଭିନ୍ନ ବନାଞ୍ଚଳରେ ଘୁରି ବୁଲୁଛି । ବାଘର ଗତିବିଧି ଉପରେ ନଜର ରଖିବା ପାଇଁ ଏସିଏଫଙ୍କ ନେତୃତ୍ୱରେ ତିନୋଟି ଟିମ୍ ଗଠନ କରାଯାଇଛି ।  ଦିଗପହଣ୍ଡି ବନାଞ୍ଚଳ ପକ୍ଷରୁ ବିଭିନ୍ନ ବନାଞ୍ଚଳରେ ଲାଗିଛି ଟ୍ରାପ କ୍ୟାମେରା ।  ଜନବସତିଠାରୁ ଦୂରରେ ଥିବାରୁ ଭୟଭୀତ ହେବାର ନାହିଁ ବୋଲି DFO କହିଛନ୍ତି ।

ବର୍ତ୍ତମାନ ସୁଦ୍ଧା ମହାବଳ ବାଘଟି କୌଣସି ମଣିଷକୁ ଆକ୍ରମଣ କରିନାହିଁ ।  ବର୍ତ୍ତମାନ ସୁଦ୍ଧା ବାଘ ୬ଟି ଗୃହପାଳିତ ପଶୁକୁ ଆକ୍ରମଣ କରି ମାରିଛି । ସେହି ଗୃହପାଳିତ ପଶୁର ମାଲିକ ମାନଙ୍କୁ ୫୮ ହଜାର ୫୦୦ ଟଙ୍କା କ୍ଷତିପୂରଣ ପ୍ରଦାନ କରିବା ନେଇ ପଦକ୍ଷେପ ନିଆଯାଇଛି ।  ବାଘକୁ ନେଇ ଫେକ ଭିଡ଼ିଓ ସୋସିଆଲ ମିଡ଼ିଆରେ ଭାଇରଲ ନ କରିବାକୁ ବନବିଭାଗ ନିବେଦନ କରିଛି ।