ଆସନ୍ତାକାଲିଠାରୁ ଆରମ୍ଭ ମେକ୍ ଇନ୍ ଓଡ଼ିଶା କନ୍କ୍ଲେଭର ଦ୍ୱିତୀୟ ସଂସ୍କରଣ, ଶେଷ ପର୍ଯ୍ଯାୟରେ ପ୍ରସ୍ତୁତି
ଭୁବନେଶ୍ବର(କେନ୍ଯୁଜ୍) : ମେକ୍ ଇନ୍ ଓଡ଼ିଶା କନ୍କ୍ଲେଭର ଦ୍ୱିତୀୟ ସଂସ୍କରଣ। ପ୍ରସ୍ତୁତି ପ୍ରାୟ ଶେଷ ପର୍ଯ୍ଯାୟରେ। ଏଥରର ଯାତ୍ରା, ପ୍ରଥମ ସଂସ୍କରଣଠାରୁ ଅଧିକ ରୋମାଞ୍ଚକର ଥିଲା। ୨୦୧୬ରେ ପ୍ରଥମ ସଂସ୍କରଣ ସଫଳ ଥିଲା। ଦେଢ଼ ଲକ୍ଷ କୋଟିରୁ ଅଧିକ ଟଙ୍କାର ନିବେଶ ସୁଯୋଗ ସୃଷ୍ଟି ହେଲା। ତେଣୁ ଦ୍ୱିତୀୟ ସଂସ୍କରଣକୁ ଅଧିକ ଆଗକୁ ବଢାଇବାର ଚାପ ଥିଲା ସରକାରଙ୍କ ଉପରେ। ପ୍ରଥମ ସଂସ୍କରଣରେ ମେକ୍ ଇନ୍ ଓଡ଼ିଶା ପାଇଁ ଇଣ୍ଡଷ୍ଟ୍ରି ପାର୍ଟନର ଥିଲା ସିଆଇଆଇ। କିନ୍ତୁ ଦ୍ୱିତୀୟ ସଂସ୍କରଣରୁ ଓହରିବା ପାଇଁ ଗତ ଏପ୍ରିଲରେ ଘୋଷଣା କରିଥିଲା ସିଆଇଆଇ। ଶେଷ ମୁହୂର୍ତ୍ତରେ ଏପରି ଘୋଷଣା ପରେ ଅନୁମାନ କରାଗଲା ସରକାରଙ୍କୁ ଶକ୍ତ ଧକ୍କା ଲାଗିଲା। କିନ୍ତୁ ଯାହା ହେଉ ପଛେ, ଆଗକୁ ବଢିବାକୁ ନିଷ୍ପତ୍ତି ନେଇଥିଲେ ସରକାର।
ସିଆଇଆଇ ଓହରିବା ପରେ ମେକ୍ ଇନ୍ ଓଡ଼ିଶା ସହ ଯୋଡ଼ି ହେଲା ଫେଡେରେସନ ଅଫ ଇଣ୍ଡିଆନ୍ ଚାମ୍ବର ଅଫ କମର୍ସ ଆଣ୍ଡ ଇଣ୍ଟଷ୍ଟ୍ରି, ଏଫଆଇସିସିଆଇ। କଣ୍ଟ୍ରି ପାର୍ଟନର ହୋଇଥିଲା ଜାପାନ। ବ୍ୟାଙ୍କିଙ୍ଗ୍ ପାର୍ଟନର ହେଲା ଏସ୍ବିଆଇ। ମେକ୍ ଇନ୍ ଓଡ଼ିଶା ଅଭିଯାନକୁ ମିଳିଲା ବଳ। ମୁମ୍ବାଇରେ ଅନୁଷ୍ଠିତ ହୋଇଥିଲା ପ୍ରଥମ ରୋଡ୍ ଶୋ। ଯୋଗ ଦେଇଥିଲେ ମୁକେଶ ଅମ୍ବାନୀଙ୍କ ଭଳି ବିଜନେସ୍ ଟାଇକୁନ୍। ଦିଲ୍ଲୀରେ ଅନୁଷ୍ଠିତ ହୋଇଥିଲା ଦ୍ୱିତୀୟ ରୋଡ୍ ଶୋ ଓ ଚେନ୍ନାଇରେ ଅନୁଷ୍ଠିତ ହୋଇଥିଲା ତୃତୀୟ ରୋଡ୍ ଶୋ। ଏବେ ଫାଇନାଲ ସୋ ଡାଉନ୍କୁ ଅପେକ୍ଷା। ଯାହା ଲାଗୁଛି, ସିଆଇଆଇ ଓହରିବା ପରେ ମେକ୍ ଇନ୍ ଓଡ଼ିଶା କନ୍କ୍ଲେଭ ଉପରେ କୌଣସି ପ୍ରଭାବ ପଡି ନାହିଁ।
ଏଥର ମେକ୍ ଇନ ଓଡ଼ିଶାର ଆକର୍ଷଣ ସାଜିବେ ବିଜିନେସ ଟାଇକୁନ ମୁକେଶ ଅମ୍ବାନୀ। ତାଙ୍କ ସହ କୁମାର ମଙ୍ଗଳମ ବିର୍ଲା, ଏନ.ଚନ୍ଦ୍ରଶେଖରନ, ଅନିଲ ଅଗ୍ରୱାଲଙ୍କ ଭଳି ପ୍ରତିଷ୍ଠିତ ଶିଳ୍ପପତି ମଧ୍ୟ ଭାଗ ନେବେ। ଗୁରୁତ୍ୱପୂର୍ଣ୍ଣ କଥା ହେଲା ମେକ୍ ଇନ ଓଡିଶାର ପ୍ରଥମ ସଂସ୍କରଣରେ ପୁଞ୍ଜିନିିବେଶ ପାଇଁ ୧୨୪ଟି ପ୍ରସ୍ତାବ ଆସିଥିଲା। ଏଭିତରେ ୬୪ଟି ଶିଳ୍ପସଂସ୍ଥାର ଭିତ୍ତିପ୍ରସ୍ତର ପଡ଼ିଛି।
