ଦେବଗଡ ଜିଲ୍ଲା ରିଆମାଳ ଥାନା ଅନ୍ତର୍ଗତ ବୁଚା କଟେଇଠାରେ ଟ୍ରକରେ ଧକ୍କା ଦେଇ ଆଲୋକ ନାମକ ଜଣେ ଯୁବକଙ୍କୁ ହତ୍ୟା କରାଯାଇଥିବା ନେଇ ଅଭିଯୋଗ ହୋଇଛି । ଆଲୋକ ଗାଁରେ କୁକୁଡ଼ା ମାଂସ ବିକ୍ରି କରି ପରିବାର ଚଳାନ୍ତି । ତେବେ ମିଳିଥିବା ସୂଚନା ଅନୁସାରେ କତରାପାଲି ଗାଁର ଆଲୋକ ସାହୁ ଓ ସେହି ଗାଁର ଟ୍ରକ ଡ୍ରାଇଭର ସୁଗ୍ରୀ ମାଝୀଙ୍କ ମଧ୍ୟରେ ଗତ ୩ ମାସ ତଳେ କୁକୁଡା ମାଂସର ଟଙ୍କା ଦିଆନିଆକୁ ନେଇ ପାଟି ତୁଣ୍ଡ ହୋଇଥିଲା ।
ସେ ଦିନ ହୋଇଥିବା ସେହି ଘଟଣାକୁ ଆଲୋକ ଭୁଲି ଯାଇଥିଲେ । କିନ୍ତୁ ଟ୍ରକ ଡ୍ରାଇଭର ସୁଗ୍ରୀ ମନରୁ ଲିଭି ନଥିଲା ପ୍ରତିଶୋଧର ନିଆଁ । ତେବେ ଗତକାଲି ସନ୍ଧ୍ୟାରେ ବୁଚା କଟେଇ ଛକ ନିକଟରେ ଥିବା ତ୍ରିନାଥ ମନ୍ଦିର ପ୍ରତିଷ୍ଠା ଉତ୍ସବ ପାଇଁ ହେଉଥିବା ପ୍ରସ୍ତୁତି ବୈଠକରେ ଯୋଗ ଦେବାକୁ ଯାଇଥିଲେ ଆଲୋକ । ରାତ୍ରୀରେ ବୈଠକ ସରିବା ପରେ ଘରକୁ ଫେରିବା ପାଇଁ ନିଜ ବାଇକରେ ବସୁଥିବା ବେଳେ ପୂର୍ବରୁ ଅନତି ଦୂରରେ ଟ୍ରକ ସହ ଛକି ରହିଥିବା ସୁଗ୍ରୀ ମାଝୀ ଦ୍ରୁତ ଗତିରେ ଆସି ଅଲୋକଙ୍କୁ ଧକ୍କା ଦେଇଥିଲା । ପରେ ସେଠାରୁ ଟ୍ରକ ସହ ଫେରାର ହୋଇଯାଇଥିଲା ସୁଗ୍ରୀ ମାଝୀ । ବୈଠକରେ ଥିବା ତ୍ରିନାଥ କମିଟିର ସଦସ୍ୟମାନେ ଗୁରୁତର ଆଲୋକଙ୍କୁ ଉଦ୍ଧାର କରି ତୁରନ୍ତ ଛତାବର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତି କରିଥିଲେ । ମାତ୍ର ଚିକିତ୍ସାଧିନ ଅବସ୍ଥାରେ ହିଁ ଆଲୋକଙ୍କର ମୃତ୍ୟୁ ଘଟିଥିବା ଡାକ୍ତର ସୂଚନା ଦେଇଥିଲେ ।
ଅଭିଯୋଗ ପାଇବା ପରେ ରିଆମାଳ ପୋଲିସ ତତ୍ପରତା ଦେଖାଇ ଅନୁଗୁଳ ପୋଲିସ ସହ ଯୋଗାଯୋଗ କରି ଅଭିଯୁକ୍ତ ସୁଗ୍ରୀକୁ ଅଟକ ରଖିବା ସହ ଟ୍ରକକୁ ଜବତ କରିଛି । ତେବେ ଏହି ଘଟଣାରେ ପୋଲିସର ପ୍ରତିକ୍ରିୟା ମିଳିପାରି ନାହିଁ । ଅନ୍ୟପଟେ ସୁଗ୍ରୀଙ୍କ ପରିବାର ପକ୍ଷରୁ ମଧ୍ୟ ପ୍ରତିକ୍ରିୟା ମିଳିପାରି ନାହିଁ । ପୋଲିସର ତଦନ୍ତ ପରେ ହିଁ ଏ ଘଟଣାର ରହସ୍ୟ ଖୋଲିବ । ଏପଟେ ଆଲୋକଙ୍କ ମ୍ରୁତ୍ୟୁ ପରେ ବେସାହାରା ହୋଇପଡ଼ିଛି ପୂରା ପରିବାର ।