୧ କୋଟି ଟଙ୍କା ପାଇବା ଆଶାରେ ହରାଇଲେ ୨୦ ଲକ୍ଷ, ଏବେ ପୋଲିସ ହିଁ ସାହା ଭରଷା

ଭଦ୍ରକ: ସବୁଠି ମାତିଛନ୍ତି ଅନଲାଇନ୍‌ ଲୁଟେରା । ବଢ଼ି ଚାଲିଛି ସାଇବର ଫ୍ରଡଙ୍କ ଠକାମୀ । ଠକାମୀର ଶିକାର ହୋଇ ଲକ୍ଷ ଲକ୍ଷ ଟଙ୍କା ହରାଉଛନ୍ତି ସାଧାରଣ ଲୋକେ । ଆଉ ସେଇମାନଙ୍କ ପାଲରେ ପଡ଼ି ଯାଇଛନ୍ତି ଜଣେ ବିଶିଷ୍ଟ ବ୍ୟକ୍ତି । ଆଜି ଆମେ ଯେଉଁ ଘଟଣା ବିଷୟରେ ଜଣାଇବାକୁ ଯାଉଛୁ ଟିକେ ଅଲଗା । କାହିଁକି ନା ଏଥର ସାଇବର ଠକାମୀର ଶିକାର ଜଣେ ସାଧାରଣ ଲୋକ ହୋଇନାହାନ୍ତି, ଠକଙ୍କ ହାବୁଡ଼ରେ ପଡ଼ିଛନ୍ତି ଜଣେ ବିଧାୟକ ପ୍ରାର୍ଥୀ । ପୁଣି ଲକ୍ଷେ କି ଦୁଇ ଲକ୍ଷ ନୁହେଁ ଏକା ଥରକେ ହରାଇଛନ୍ତି ୨୦ ଲକ୍ଷ ଟଙ୍କା ।

ନିର୍ବାଚନ ସମୟରେ ତାଙ୍କୁ ଫସାଇଥିଲେ ଅଭିଯୁକ୍ତମାନେ । କୋଟିଏ ଟଙ୍କାର ଲୋଭ ଦେଖାଇଥିଲେ । ତାହା ପୁଣି ଏକଦମ ଚାଲାକିରେ । ଆଉ ସେହି କୋଟିଏ ଟଙ୍କା ପାଇବା ଆଶାରେ ୨୦ ଲକ୍ଷ ହରାଇଛନ୍ତି ଜଣେ ବିଧାୟକ ପ୍ରାର୍ଥୀ । ଠକାମୀର ଶିକାର ହେବା ପରେ ସେ ଏବେ ଥାନାର ଦ୍ୱାରସ୍ଥ ହୋଇଛନ୍ତି । ଏ ଘଟଣା ଘଟିଛି ଭଦ୍ରକ ଜିଲ୍ଲା ଭଣ୍ଡାରିପୋଖରୀ ନିର୍ବାଚନ ମଣ୍ଡଳୀରେ । ଗତ ନିର୍ବାଚନରେ ବିଧାୟକ ପ୍ରାର୍ଥୀ ହୋଇଥିବା ଡା. ସୁଧାଂଶୁ ନାୟକଙ୍କ ଠାରୁ ଠକି ନେଇଛନ୍ତି ଲୁଟେରା । ଗତ ମେ ମାସ ୨୮ ତାରିଖ ଦିନ ସୁନୀତ ମୁଣ୍ଡୁ ନାମକ ଜଣେ ମହିଳା ବନ୍ତ ଆସି ସୁଧାଂଶୁଙ୍କୁ ଭେଟିଥିଲେ । ସେ ଯାଦବ ସମ୍ପ୍ରଦାୟର ହୋଇଥିବାରୁ ତାଙ୍କୁ ଜଣେ ବଦାନ୍ୟ ବ୍ୟକ୍ତି ୧ କୋଟି ଟଙ୍କାର ସାହାଯ୍ୟ ଦେବାକୁ ଚାହୁଁଥିବା କହିଥିଲେ । ମହିଳା ଜଣକ ସୁଧାଂଶୁଙ୍କୁ ଏଭଳି ଭାବେ ବୁଝାଇ ଦେଲେ ଯେ ସେ ତାଙ୍କ କଥାରେ ଭଳି ଗଲେ । ମହିଳା ଜଣକ ଯୋଗୀ ଓରଫ ଯୋଗେନ୍ଦ୍ର ନାମକ ଜଣେ ବ୍ୟକ୍ତିଙ୍କୁ ଫୋନ କରି ଡା. ସୁଧାଂଶୁ ନାୟକଙ୍କୁ ୧ କୋଟି ଟଙ୍କା ଦେବା କଥା କହିଥିଲେ । ପରେ ଡା. ନାୟକ ଯୋଗେନ୍ଦ୍ରଙ୍କ ସହିତ କଥା ହୋଇଥିଲେ । ଯୋଗେନ୍ଦ୍ର କହିଥିଲେ ଆପଣଙ୍କ କଥା ବହୁତ ଡେରି ହୋଇ ଯାଇଛି, ମୁଁ ଚେଷ୍ଟା କରୁଛି ସାହାଯ୍ୟ ଦେବା ପାଇଁ । ତେବେ ମୁଁ ଆପଣଙ୍କୁ ୨ଟି ଆକାଉଣ୍ଟ ନମ୍ବର ଦେଉଛି ସେଥିରେ ଆପଣ ୧୦ ଲକ୍ଷ ୧୦ ଲକ୍ଷ କରି ୨୦ ଲକ୍ଷ ଟଙ୍କା ପଠାନ୍ତୁ ଏବଂ ଆପଣଙ୍କ ଆକାଉଣ୍ଟକୁ ୧ କୋଟି ଟଙ୍କା ପହଞ୍ଚିବ ।

ତେଣୁ ଡା. ନାୟକ ନିର୍ବାଚନ ସମୟରେ ବହୁ ଅସୁବିଧାରେ ଥାଇ ମଧ୍ୟ ଉଭୟ ଆକାଉଣ୍ଟରେ ୧୦ ଲକ୍ଷ ଲେଖାଏଁ ଟଙ୍କା ଜମା କରି ଥିଲେ । ୧ କୋଟି ଟଙ୍କା ପାଇବା ଆଶାରେ ତାଙ୍କର ଦୁଇ ଜଣ ସମ୍ପର୍କୀୟଙ୍କ ଆକାଉଣ୍ଟରୁ ଏହି ୨୦ ଲକ୍ଷ ଟଙ୍କା ପଠାଇଥିଲେ । କିନ୍ତୁ ଦିନ ବିତିଲା ଏବଂ ମେ ୩୦ ତାରିଖ ମଧ୍ୟ ଅତିକ୍ରମ କରିଗଲା ନା ତାଙ୍କୁ ଆକାଉଣ୍ଟକୁ ଟଙ୍କା ଆସିଲା ନା ସୁନିତ ଓ ଯୋଗେନ୍ଦ୍ର ଫୋନ ଉଠାଇଲେ । ଏପରିକି ମେସେଜ ସବୁ ଡିଲିଟ କରି ଦେଲେ ଅଭିଯୁକ୍ତ । ଶେଷରେ ନିରୁପାୟ ହୋଇ ଠକାମୀର ଶିକାର ହୋଇଥିବା ଡା. ସୁଧାଂଶୁ ନାୟକ ବନ୍ତ ଥାନାରେ ଅଭିଯୋଗ କରିଛନ୍ତି । ଗତ ୮ ତାରିଖ ଦିନ ଅଭିଯୋଗ ପାଇବା ପରେ ପୋଲିସ ଏ ସମ୍ପର୍କରେ ଏକ ମାମଲା ରୁଜ୍ଜୁ କରି ତଦନ୍ତ ଆରମ୍ଭ କରିଛି ।

ସାଇବର ଫ୍ରଡକୁ ନେଇ ସବୁବେଳେ ଲୋକଙ୍କୁ ସଚେତନ କରାଯାଉଛି । କିନ୍ତୁ ତଥାପି ସତର୍କ ହେଉ ନାହାନ୍ତି ଲୋକେ । ଏହା ତ ନିଶ୍ଚତ କଥା ଯେ ଜଣେ ବିଜ୍ଞବ୍ୟକ୍ତି ହୋଇ କିଭଳି ଡା. ସୁଧାଂଶୁ ଏହି ଠକମାନଙ୍କ କଥାରେ ପଡ଼ିଗଲେ । ଅଭିଯୁକ୍ତମାନଙ୍କର କେବଳ ଫୋନ୍‌ ନମ୍ବର ନୁହେଁ ସେମାନଙ୍କ ବିଷୟରେ ଅଧିକ ତଥ୍ୟ ମଧ୍ୟ ରଖିବାର ଥିଲା । ତେବେ ବର୍ତ୍ତମାନ କେବଳ ପୋଲିସ୍‌ ଭରସା । ଯଦି ଆପଣ ଏଭଳି ଠକାମୀର ଶିକାର ହେବାକୁ ଚାହୁଁ ନାହାନ୍ତି ତାହା ହେଲେ ଅତ୍ୟନ୍ତ ସତର୍କ ରୁହନ୍ତୁ । କୌଣସି ଲୋକ ଆପଣଙ୍କୁ ମାଗଣାରେ ଗୁଡ଼ାଏ ଟଙ୍କା ଯଦି ଯାଚୁଛି ତାର ଉଦ୍ଦେଶ୍ୟକୁ ଭଲ ଭାବେ ବୁଝନ୍ତୁ । ପୁଣି ଲୋକଟି ଅଚିହ୍ନା ହୋଇଥିଲେ ଆଦୌ ବିଶ୍ୱାସ କରନ୍ତୁ ନାହିଁ । ସେହିଭଳି ମୋବାଇଲକୁ ଆସୁଥିବା ଓଟିପିକୁ ଭୁଲରେ ମଧ୍ୟ କାହାକୁ ସେୟାର କରନ୍ତୁ ନାହିଁ । ଅନଲାଇନ୍‌ ଆକାଉଣ୍ଟରେ କାରବାର କଲା ବେଳେ ବିଶେଷ ଭାବେ ସତର୍କ ରୁହନ୍ତୁ ।

You might also like