ଆଜି ମୋଦିଙ୍କ ମାରାଥନ ପ୍ରଚାର, ପ୍ରଥମେ ଫୁଲବାଣୀରେ ବିଜୟ ସଂକଳ୍ପ ସମାବେଶରେ ଯୋଗ ଦେବେ

ଭୁବନେଶ୍ୱର (କେନ୍ୟୁଜ): ଆଜି ଓଡ଼ିଶାରେ ମୋଦିଙ୍କ ମାରାଥନ ପ୍ରଚାର ।  ଫୁଲବାଣୀ, ବଲାଙ୍ଗିର ଓ ବରଗଡ଼ରେ ପ୍ରଚାର କରିବେ ମୋଦି  । ପ୍ରଥମେ ଫୁଲବାଣୀରେ ବିଜୟ ସଂକଳ୍ପ ସମାବେଶରେ ଯୋଗ ଦେବେ ।  ଏହା ପରେ ବଲାଙ୍ଗିର ଓ ପରେ ବରଗଡ଼ ସମାବେଶ ।  ଦୁଇ ଦିନିଆ ଓଡ଼ିଶା ଗସ୍ତରେ ଆସି ଗତକାଲି ଭୁବନେଶ୍ବରରେ ରୋଡ ସୋ କରିଥିଲେ ମୋଦି ।  ରାଜ୍ୟ ବିଜେପି କାର୍ଯ୍ୟାଳୟରୁ ବାଣୀବିହାର ପର୍ଯ୍ୟନ୍ତ ରୋଡ୍ ସୋ କରିଥିଲେ । ପ୍ରଧାନମନ୍ତ୍ରୀଙ୍କ ଗାଡିରେ ଭୁବନେଶ୍ୱର ବିଜେପି ସାଂସଦ ପ୍ରାର୍ଥୀ ଅପରାଜିତା ଷଡଙ୍ଗୀ, ରାଜ୍ୟ ବିଜେପି ସଭାପତି ମନମୋହନ ସାମଲ ରହିଥିଲେ ।  ଏହାସହ ବିଧାୟକ ପ୍ରାର୍ଥୀ ଓ ଦଳୀୟ କର୍ମୀମାନେ ପ୍ରଧାନମନ୍ତ୍ରୀଙ୍କ ଗାଡି ପାଖେ ପାଖେ ଚାଲିଥିଲେ । ଏସବୁ ଭିତରେ ପ୍ରଧାନମନ୍ତ୍ରୀଙ୍କ ରୋଡ ସୋ ବିଜେପିକୁ ବଳ ଯୋଗାଇଛି ।

ରୋଡ୍ ସୋ ପରେ ଟ୍ବିଟ୍ କରି ମୋଦି କହିଛନ୍ତି ଓଡ଼ିଶାବାସୀଙ୍କ ପାଇଁ ଉନ୍ନତିମୂଳକ କାର୍ଯ୍ୟ ଜାରି ରଖିବ ବିଜେପି ।  ବନ୍ଦେ ଭାରତ ଟ୍ରେନ, ଜାତୀୟ ରାଜପଥ ଏବଂ ଶିକ୍ଷା ଆଦି କ୍ଷେତ୍ରରେ ଓଡ଼ିଶା ପାଇଁ କେନ୍ଦ୍ର ସକରକାର ବିକାଶମୂଳକ କାର୍ଯ୍ୟ କରୁଛନ୍ତି ।  ବିଶେଷ କରି ଗତ ୫ ବର୍ଷରେ କେନ୍ଦ୍ର ସରକାର କଣ କରିଛନ୍ତି ତା ଉପରେ ଫୋକସ କରିଛନ୍ତି ମୋଦି । ତେବେ ଜୁନ ୧୦ରେ ବିଜେପି ସରକାର ଶପଥ ପାଠ କରିବା ନେଇ କିଛି ଉଲ୍ଲେଖ କରି ନାହାନ୍ତି । ଆଜି ତାଙ୍କର ୩ଟି ସଭା ଥିବା ବେଳେ କଣ କହିବେ ତାକୁ ଅପେକ୍ଷା ରହିଛି ।