ଭୁବନେଶ୍ବର : ସୋସିଆଲ ମିଡିଆରେ ଘୂରି ବୁଲୁଛି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସହ ବିଧାୟକ ନବ ଦାସ ଓ ତାଙ୍କ ପରିବାରଙ୍କ ଫଟୋ । ଗତ ୨୨ ତାରିଖରେ ଝାରସୁଗୁଡ଼ା ବିମାନବନ୍ଦର ଉଦଘାଟନୀ ଉତ୍ସବ ବେଳେ ନବୀନଙ୍କୁ ନବ ଦାସ ଭେଟିଥିବା ବେଳେ ଫଟୋଟି ସେହି ସମୟର । ଆଉ ଏହାକୁ ନେଇ ଝାରସୁଗୁଡ଼ା କଂଗ୍ରେସ ବିଧାୟକ ନବ ଦାସ ବିଜେଡି ଆଡ଼କୁ ଢଳୁଥିବା ନେଇ ପୁଣି ଚର୍ଚ୍ଚା ବଢ଼ିଛି । ନବ ବାବୁ କହିଛନ୍ତି, ଓଡ଼ିଶା ରାଜନୀତି ଇତିହାସରେ ଜଣେ ଅନ୍ୟ ଦଳକୁ ଡେଇଁବା କିଛି ନୂଆ ନୁହେଁ । ତେବେ ଝାରସୁଗୁଡ଼ାବାସୀ ଯେଉଁ ନିଷ୍ପତ୍ତି ନେବେ ତାକୁ ସେ ମାନିନେବେ ।
ଝାରସୁଗୁଡ଼ାରୁ ଦୁଇ ଦୁଇ ଥର କଂଗ୍ରେସ ଟିକେଟରେ ବିଧାୟକ ହୋଇଛନ୍ତି ନବ ଦାସ । ୨୦୧୯ ନିର୍ବାଚନ ପାଖେଇ ଆସୁଥିବା ବେଳେ ଏବେ ନବ ବିଜେଡିରେ ମିଶିପାରନ୍ତି ବୋଲି କୁହାଯାଉଛି । ଏହାକୁ ନେଇ ଝାରସୁଗୁଡ଼ା ରାଜନୀତି ସରଗରମ ହୋଇଥିବା ବେଳେ ଉଭୟ କଂଗ୍ରେସ ଓ ବିଜେଡି ପ୍ରତିକ୍ରିୟା ରଖିଛନ୍ତି ।
ପୂର୍ବରୁ କିଛି ମାସ ତଳେ ଝାରସୁଗୁଡ଼ାରେ ବିଜୁ ଏକ୍ସପ୍ରେସ ୱେ ଉଦଘାଟନୀରେ ମୁଖ୍ୟମନ୍ତ୍ରୀଙ୍କୁ ବିକାଶର ଅନ୍ୟ ନାମ କହି ପ୍ରଶଂସାରେ ପୋତି ପକାଇଥିଲେ ନବ ଦାସ । ଆଉ ନବୀନଙ୍କ ସହ ନବଙ୍କ ସପରିବାର ଫଟୋ ପରେ ଆଗାମୀ ଦିନରେ ତାଙ୍କ ରଣନୀତି ଉପରେ ନଜର ରହିଛି।