ସମାଜସେବୀ ଆଦିତ୍ୟଙ୍କୁ ଧକ୍କା ଦେଇନି କୌଣସି ଟ୍ରେନ, ଆଉ ଦୁଇ ମାଲବାହୀ ଟ୍ରେନ୍ ଲୋକପାଇଲଟଙ୍କ ବୟାନ ମୋଡିଲା ତଦନ୍ତର ଦିଗ
କେନ୍ୟୁଜ୍(ବ୍ୟୁରୋ): ମାନବ ପ୍ରେମୀ ଆଦିତ୍ୟ ଦାସ ମୃତ୍ୟୁ ମାମଲାରେ ନୂଆ ଟ୍ଵିଷ୍ଟ। ମୃତ୍ୟୁର ମାସେ ପୁରିବାକୁ ବସିଲାଣି ହେଲେ ଏପର୍ଯ୍ୟନ୍ତ କୌଣସି ନିର୍ଣ୍ଣାୟକ ମୋଡରେ ପହଞ୍ଚି ପାରିନାହିଁ ଜିଆରପି।ତଥାପି ତଦନ୍ତ ଜାରି ରଖିଛି ଜିଆରପି ପୋଲିସ। ଏହାରି ଭିତରେ ଆଜି ୨ ମାଲବାହୀ ଟ୍ରେନ୍ ଲୋକ ପାଇଲଟଙ୍କ ବୟାନ ରେକର୍ଡ କରିଛି ରେଳବାଇ ପୋଲିସ । ଆଦିତ୍ୟ ପ୍ରାଣ ହରାଇଥିବା ଦିନ ଟ୍ରେନ ଆଗରେ କେହି ଆତ୍ମହତ୍ୟା କରିନଥିବା ଉଭୟ ଲୋକପାଇଲଟ କହିଛନ୍ତି ।
ପୂର୍ବରୁ ଜିଆରପି ପୁରୁଷୋତ୍ତମ ଏକ୍ସପ୍ରେସ ଟ୍ରେନ୍ର ଲୋକ ପାଇଲଟଙ୍କ ବୟାନ ରେକର୍ଡ ହୋଇଥିଲା । ଏହି ୩ଟି ଟ୍ରେନ ଲୋକ ପାଇଲଟ ବୟାନ ରେକର୍ଡ ବେଳେ ଘଟଣା ଦିନ ଟ୍ରେନ ଆଗରେ କେହି ଆତ୍ମହତ୍ୟା କରିନଥିବା କହିଛନ୍ତି । ଗତ ୭ ତାରିଖ ଦିନ ଭୁବନେଶ୍ୱର ଲିଙ୍ଗରାଜ ଷ୍ଟେସନ ନିକଟ ରେଳ ଧାରଣାରୁ ଆଦିତ୍ୟଙ୍କ ମୃତଦେହ ଉଦ୍ଧାର କରାଯାଇଥିଲା । ଏହି ଘଟଣାକୁ ଅନେକ ଦିନ ବିତିଲାଣି । ବର୍ତ୍ତମାନ ସୁଦ୍ଧା ଅନେକ ଲୋକଙ୍କୁ ଜେରା କରିସାରିଲାଣି ଜିଆରପି । ତଥାପି ପୋଲିସର ହାତ ଖାଲି । ଦିନ ଗଡିବା ସହ ଆଦିତ୍ୟଙ୍କ ମୃତ୍ୟୁ ରହସ୍ୟକୁ ନେଇ ସସପେନସ୍ ବଢୁଛି ।