ଇଡକୋ ଜୁନିଅର ମ୍ୟାନେଜରଙ୍କ ସମ୍ପତ୍ତି ଦେଖି ତାଜୁବ ଭିଜିଲାନ୍ସ, ଗେଟଠୁ ଆରମ୍ଭ କରି ଘର ଯାଏ ପୂରା ଡିଜିଟାଲ
ଭୁବନେଶ୍ୱର : ଘରୁ ମିଳିଲା ପୁଳା ପୁଳା ଟଙ୍କ ଓ ସୁନା ଗହଣା । ଇଡକୋ ଜୁନିଅର ମ୍ୟାନେଜର ବିଜୟ କୁମାର ଉଦୟସିଂହଙ୍କ ଆଲିସାନ ବଙ୍ଗଳା । ଗେଟଠୁ ଆରମ୍ଭ କରି ଘର ଯାଏ ପୂରା ଡିଜିଟାଲ । ରିମୋଟ ଟିପିଲେ ଗେଟ ଖୋଲେ । ବାବୁଙ୍କ ବିପୁଳ ସଂପତ୍ତି ଦେଖି ଭିଜିଲାନସ ଅଧିକାରୀ ତାଜୁବ । ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଇଡକୋ ଜୁନିଅର ମ୍ୟାନେଜର ବିଜୟ କୁମାର ଉଦୟସିଂହଙ୍କ ଘରେ ଚଢ଼ାଉ । ଖୋର୍ଦ୍ଧା, ଭୁବନେଶ୍ବର ଓ ପୁରୀ ସମେତ ୬ଟି ସ୍ଥାନରେ ଏକକାଳୀନ ରେଡ୍ କରାଯାଉଛି।
ବିଜୟ କୁମାର ଉଦୟସିଂହଙ୍କ ଭୁବନେଶ୍ବର ସ୍ଥିତ ଇଡକୋ ଅଫିସରେ ବି ଚାଲିଛି ଚଢ଼ାଉ। ଭୁବନେଶ୍ୱର ରାଜାରାଣୀ ମୌଜାର ଆବାସିକ ଘର, ପୁରୀ ବାଲୁଖଣ୍ଡ ମୌଜାରେ ଥିବା ଫ୍ଲାଟ, ଖୋର୍ଦ୍ଧା ଜଙ୍କିଆରେ ଥିବା ପୈତୃକ ଘରେ ଚାଲିଛି ରେଡ । ତାଙ୍କ ଘରୁ ପୁଳା ପୁଳା ଟଙ୍କା, ସୁନା ଗହଣା ଓ ଦାମୀ ହାତ ଘଣ୍ଟା ଜବତ ହୋଇଛି। ଜଙ୍କିଆରେ ଥିବା କ୍ରସର ୟୁନିଟ ଓ ଭୁବନେଶ୍ୱର ସାମନ୍ତରାପୁର ସମ୍ପର୍କୀୟଙ୍କ ଘରେ ମଧ୍ୟ ଚାଲିଛି ରେଡ। ଭୁବନେଶ୍ୱରରେ ୩ କୋଟି ୨୨ ଲକ୍ଷ ଟଙ୍କାର ଚାରି ମହଲା ଘର ରହିଛି । ପୁରୀ ବାଲୁଖଣ୍ଡ ମୌଜାରେ ରହିଛି ଫ୍ଲାଟ। ଭୁବନେଶ୍ୱରର ପ୍ରାଇମ ଲୋକେସନରେ ରହିଛି ଦୁଇଟି ପ୍ଲଟ। ଖୋର୍ଦ୍ଧାରେ ରହିଛି ଗୋଟିଏ ପ୍ଲଟ। ୩୩ ଲକ୍ଷ ଟଙ୍କାର ବ୍ୟାଙ୍କ ଜମା ସହ ନଗଦ ୪ ଲକ୍ଷ ୫୦ ହଜାର ଟଙ୍କା ଜବତ ହୋଇଛି । ରେଡରେ ୨ ଜଣ ଡିଏସପି, ୪ ଇନ୍ସପେକ୍ଟର, ୩ ଏଏସଆଇଙ୍କ ସମେତ ମୋଟ୧୧ ଅଧିକାରୀ ସାମିଲ ଅଛନ୍ତି ।