ଥାନା ସମ୍ମୁଖରେ କିରୋସିନ ଢାଳି ବୃଦ୍ଧ ଦମ୍ପତିଙ୍କ ଆତ୍ମହତ୍ୟା ଉଦ୍ୟମ

ବାଲେଶ୍ଵର : ବାଲେଶ୍ଵର ବାଲିଆପାଳ ଥାନା ସମ୍ମୁଖରେ ବୃଦ୍ଧ ଦମ୍ପତିଙ୍କ କିରୋସିନ ଢାଳି ଆତ୍ମହତ୍ୟା ଉଦ୍ୟମ । ରାଉତୁରା ଗାଁର ଗୌରାଙ୍ଗ ପାଣିଗ୍ରାହୀଙ୍କ ବ୍ୟକ୍ତିଗତ ଜମିରେ ଗ୍ରାମର ଅନନ୍ତ ଗିରି ଏବଂ ଅର୍ଜୁନ ଗିରି ଜୋର ଜବରଦସ୍ତ ପ୍ରଧାନମନ୍ତ୍ରୀ ଆବାସ ଯୋଜନାରେ ଗୃହ ର୍ନିମାଣ କରୁଛନ୍ତି । ଏନେଇ ଗୌରାଙ୍ଗ ବାଲିଆପାଳ ତହସିଲଦାର ଏବଂ ପୋଲିସ ନିକଟରେ ବାରମ୍ବାର ଅଭିଯୋଗ କରିଥିଲେ ମଧ୍ୟ ତାଙ୍କୁ କୌଣସି ନ୍ୟାୟ ମିଳୁନି । ଏପରିକି କୋର୍ଟରେ ରହିତାଦେଶ ଜାରି କରାଯାଇଥିଲେ ମଧ୍ୟ କୋର୍ଟ ଆଦେଶକୁ ଅବମାନନା କରି ସେମାନେ ଗୃହ ର୍ନିମାଣ କରୁଛନ୍ତି ।

ଏହାର ପ୍ରତିବାଦ କରିବାରୁ ବୃଦ୍ଧ ଦମ୍ପତ୍ତି ଙ୍କୁ ଜୀବନରେ ମାରି ଦେବାକୁ ଧମକ ଦିଆଯାଉଥିବା ସେମାନେ କହିଛନ୍ତି । ଘଟଣାକୁ ନେଇ କିଛି ଦିନ ପୂର୍ବରୁ ବାଲିଆପାଳ ଥାନା ଏବଂ ତହସିଲଦାରଙ୍କ ନିକଟରେ ଲିଖିତ ଅଭିଯୋଗ କରିଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ନଥିବାରୁ ଆଜି ବାଧ୍ୟ ହୋଇ ଥାନା ସମ୍ମୁଖରେ ଆତ୍ମହୁତି ଉଦ୍ୟମ କରିଛନ୍ତି ବୃଦ୍ଧ ଦମ୍ପତି । ପୋଲିସ ବୃଦ୍ଧ ଦମ୍ପତିଙ୍କୁ ଉଦ୍ଧାର କରି ତଦନ୍ତ ଚଳାଇଛି । ଏନେଇ ବସ୍ତା ଏସ ଡି ପି ଓ ଙ୍କୁ ଯୋଗାଯୋଗ କରିବାରୁ ଘଟଣାର ତଦନ୍ତ କରି କାର୍ଯ୍ୟାନୁଷ୍ଠାନ ନିଆଯିବ ବୋଲି ସେ କହିଛନ୍ତି ।