ବଜ୍ରାଘାତରେ ଜଣେ ମୃତ, ତିନି ଗୁରୁତର
ବଣାଇ : ସୁନ୍ଦରଗଡ଼ ଜିଲ୍ଲା ଲହୁଣୀପଡା ଥାନା ଠାକୁରପାଲି ଗ୍ରାମରେ ବଜ୍ରାଘାତରେ ଜଣଙ୍କର ମୃତ୍ୟୁ ହୋଇଥିବାବେଳେ ୩ ଜଣ ଆହତ ହୋଇଛନ୍ତି । ଠାକୁରପାଲି ଗ୍ରାମରେ ଏକସଙ୍ଗରେ ୪ ଜଣ ବିଲରେ କାମ କରୁଥିଲେ । ଏହି ସମୟରେ ହଠାତ ମେଘ ଆସିବାରୁ କାମ ଛାଡି ସେମାନେ ଘରକୁ ବାହାରିଥିଲେ । ଏହି ସମୟରେ ବଜ୍ରାଘାତ ହୋଇଥିଲା ।
ଯାହାଫଳରେ ଘଟଣା ସ୍ଥଳରେ ମିନାମଞ୍ଜରୀ କିଷାନ ନାମକ ଯୁବତୀ ଟଳି ପଡ଼ିଥିଲେ ଓ ଅନ୍ୟ ତିନି ଜଣ ଗୁରୁତର ହୋଇପଡିଥିଲେ । ନିକଟରେ କାମ କରୁଥିବା ଆଉ କିଛି ବ୍ୟକ୍ତି ଦୌଡ଼ି ଆସି ସମସ୍ତଙ୍କୁ ଉଦ୍ଧାର କରିଥିଲେ । ହେଲେ ଘଟଣା ସ୍ଥଳରେ ମୀନାଙ୍କର ମୃତ୍ୟୁ ହୋଇଥିବା ବେଳେ ବଣାଇ ଡାକ୍ତର ଖାନାରେ ଆହତଙ୍କୁ ଚିକିତ୍ସା କରାଯାଉଛି । ଆହତମାନେ ହେଲେ ଠାକୁରପାଲି ଗ୍ରାମର କୌଶଲ୍ୟା ଗଟଛାତ୍ରୀ, ବର୍ଷାରାଣୀ ଗଟଛାତ୍ରୀ ଓ ଯସବାନ୍ତି କିଷାନ । ମୃତକଙ୍କ ଶବ ବ୍ୟବଚ୍ଛେଦ ପାଇଁ ପଠାଯାଇଛି ।
