ଖୋର୍ଦ୍ଧା ଟାଙ୍ଗୀରେ ଦୁଇ ବାଇକ ମୁହାଁ ମୁହିଁ ଧକ୍କା, ଶିକ୍ଷକ ମୃତ ଅନ୍ୟ ଜଣ ଗୁରୁତର
ଟାଙ୍ଗୀ(କେନ୍ୟୁଜ୍): ଖୋର୍ଦ୍ଧା ଜିଲ୍ଲା ଟାଙ୍ଗୀ ବଡପାରୀ ଛକରେ ବାଇକ୍ ସହ ସ୍କୁଟିର ମୁହାଁମୁହିଁ ଧକ୍କା । ଘଟଣାସ୍ଥଳରେ ଶିକ୍ଷକଙ୍କ ମୃତ୍ୟୁ ଘଟିଛି । ଏହି ଦୁର୍ଘଟଣାରେ ଜଣେ ଯୁବକ ଗୁରୁତର ହୋଇଛନ୍ତି । ମୃତ ଶିକ୍ଷକ ଜଣକ ହେଉଛନ୍ତି ସନ୍ତୋଷ କୁମାର ରାଉତରାୟ (୩୮) ଘର ନୟାଗଡ ଜିଲ୍ଲା ଚାନ୍ଦପୁର ଥାନା ଅନ୍ତର୍ଗତ ବୃନ୍ଦାବନବିହାରୀପୁର ଗ୍ରାମରେ । ଗୁରୁତର ଯୁବକ ଟାଙ୍ଗୀ ମାନପୁର ପାଟଣାର ରାଜ କୁମାର ବେହରା ବୋଲି ଜଣା ପଡିଛି ।
ନିଜ ସ୍କୁଟିରେ ଟାଙ୍ଗୀରୁ ଏକ ବିବାହରେ ଯୋଗଦେଇ ନିଜ ଗାଁକୁ ଫେରୁଥିବା ବେଳେ ସାମ୍ନା ପଟୁ ଏକ ଦୃତଗାମୀ ବାଇକ୍ ତାଙ୍କ ସ୍କୁଟିକୁ ଶକ୍ତଧକ୍କା ଦେଇଥିଲା । ଫଳରେ ସ୍କୁଟି ଆରୋହୀ ସହ ବାଇକ୍ ଆରୋହୀ ଉଭୟ ଗୁରୁତର ଭାବେ ଆହତ ହୋଇଥିଲେ । ଉଭୟଙ୍କୁ ସ୍ଥାନୀୟ ଲୋକେ ଟାଙ୍ଗୀ ମେଡିକାଲରେ ଭର୍ତ୍ତି କରିଥିଲେ । ତେବେ ମେଡିକାଲରେ ଉପସ୍ଥିତ ଡାକ୍ତର ଶିକ୍ଷକ ସନ୍ତୋଷ କୁମାର ରାଉତରାୟଙ୍କୁ ମୃତ ଘୋଷଣା କରିଛନ୍ତି । ଗୁରୁତର ଯୁବକଙ୍କୁ ଭୁବନେଶ୍ବର ସ୍ଥାନାନ୍ତର କରାଯାଇଛି।
