ଅକ୍ଟୋବର ୨ରେ ଏଥର ଦେଖିବାକୁ ମିଳିବ କଙ୍କଣାକୃତି ସୂର୍ଯ୍ୟୋପରାଗ
ଚଳିତ ବର୍ଷର ଦ୍ବିତୀୟ ସୂର୍ଯ୍ୟୋପରାଗ ଆସନ୍ତା ୨ ତାରିଖରେ ପଡୁଛି । ଏଥର କଙ୍କଣାକୃତି ସୂର୍ଯ୍ୟୋପରାଦ ଦେଖିବାକୁ ମିଳିବ । ମହାଳୟା ଅମବାସ୍ୟା ଦିନ ଏହି ସୂର୍ଯ୍ୟୋପରାଗ ପଡୁଛି । ଭାରତ ସମୟ ରାତି ୯.୧୩ରୁ ସୂର୍ଯ୍ୟୋପରାଗ ଆରମ୍ଭ ହେବ ଏବଂ ଏହା ଭୋର ୩ ଟା ୧୭ରେ ସରିବ । ଅର୍ଥାତ ସୂର୍ଯ୍ୟୋପରାଗ ସମୟରେ ଭାରତରେ ରାତି ହୋଇଥିବ । ତେଣୁ ଭାରତରେ ସୂର୍ଯ୍ୟୋପରାଗ ଦୃଶ୍ୟମାନ ହେବ ନାହିଁ । ଏହି ମହାଜାଗତିକ ଦୃଶ୍ୟ ପ୍ରଶାନ୍ତ ମହାସାଗରର କିଛି ଅଂଚଳ, ଦକ୍ଷିଣ ଚିଲି ଓ ଦକ୍ଷିଣ ଆର୍ଜେଣ୍ଟିନାରେ ଦୃଶ୍ୟମାନ ହେବ।
ସୂର୍ଯ୍ୟୋପରାଗରେ ସୂର୍ଯ୍ୟ, ଚନ୍ଦ୍ର ଓ ପୃଥିବୀ ସରଳ ରେଖାରେ ରୁହନ୍ତି । ସୂର୍ଯ୍ୟ ଓ ପୃଥିବୀ ମଝି ଦେଇ ଚନ୍ଦ୍ର ଗତି କରିବା ସମୟରେ, ଚନ୍ଦ୍ରର ଛାଇ ଯୋଗୁଁ ସୂର୍ଯ୍ୟୋପରାଗ ହୁଏ । ଅକ୍ଟୋବର ୨ ମହାଜାଗତିକ ଘଟଣାରେ ଚନ୍ଦ୍ର, ସୂର୍ଯ୍ୟଙ୍କ ସାମ୍ନକୁ ଆସିବ । କିନ୍ତୁ ସୂର୍ଯ୍ୟଙ୍କ ଆଲୋକକୁ ସଂପୂର୍ଣ୍ଣ ଢାଙ୍କି ପାରିବ ନାହିଁ । ସୂର୍ଯ୍ୟଙ୍କ ମଝି କଳା ଦେଖାଯିବ ଏବଂ ଚାରିପାଖ ଏକ ଉଜ୍ଜ୍ୱଳ ମୁଦି ଭଳି ଦେବାଯିବ। ଏହାକୁ ରିଂ ଅଫ ଫାୟାର କୁହାଯାଏ ।
ଭାରତରେ ଦୃଶ୍ୟମାନ ହେଉ ନଥିବାରୁ ସୂତକ କାଳ ଲାଗୁ ହେବ ନାହିଁ । ସୂର୍ଯ୍ୟୋପରାଗ ଦେଖା ଦେଲେ ହିଁ ସୂତକ କାଳ ଲାଗୁ ହୁଏ । ଭାରତରେ ଦୃଶ୍ୟମାନ ହେଉ ନଥିବାରୁ କୌଣସି ଦେବ ନୀତି ବନ୍ଦ ହେବ ନାହିଁ । ଏହାସହ ମହାଳୟା ଅମାବାସ୍ୟା ଅବସରରେ ପିଣ୍ଡଦାନ, ଶ୍ରାଦ୍ଧ କରାଯିବ।
