ସ୍ୱର୍ଗତ ରଘୁନାଥଙ୍କ ପରେ କରୋନା ସଂକ୍ରମିତ ତାଙ୍କର ଦୁଇ ପୁଅ ଅସୁସ୍ଥ

ଭୁବନେଶ୍ୱର : ଏଥର ଯେମିତି କରୋନା ଟାର୍ଗେଟ୍‌ କରିଛି ପୂରା ପରିବାରକୁ । ଅନେକ ସ୍ଥାନରେ ପରିବାରର ଜଣକୁ ହେଲେ ଅନ୍ୟ ସଦସ୍ୟମାନେ ମଧ୍ୟ କରୋନାରେ ସଂକ୍ରମିତ ହେଉଛନ୍ତି । ସେହିଭଳି ଅବସ୍ଥାରେ ଅଛନ୍ତି ପଦ୍ମ ବିଭୂଷଣ ସ୍ୱର୍ଗତ ସ୍ଥପତି ରଘୁନାଥ ମହାପାତ୍ରଙ୍କ ପରିବାର । ଗତ ୯ ତାରିଖରେ ବିଶିଷ୍ଟ ପ୍ରସ୍ତର ଶିଳ୍ପୀ ଗରୁ ରଘୁନାଥଙ୍କର ପରଲୋକ ହୋଇଥିଲା । ସେ କୋଭିଡ୍‌ରେ ଆକ୍ରାନ୍ତ ହେବା ପରେ ଭୁବନେଶ୍ୱର ଏମ୍‌ସରେ ଚିକିତ୍ସାଧୀନ ଥିଲେ । ରାଜ୍ୟସଭା ସାଂସଦ ରଘୁନାଥଙ୍କ ପରଲୋକ ପରେ ରାଷ୍ଟ୍ରୀୟ ମର୍ଯ୍ୟାଦା ସହ ତାଙ୍କର ଶେଷକୃତ୍ୟ ସମ୍ପନ୍ନ କରାଯାଇଥିଲା ।

ହେଲେ ଏପଟେ ସମସ୍ତଙ୍କୁ ଜଣା ନଥିଲା ଯେ ତାଙ୍କର ଦୁଇ ପୁଅ ଯଶୋବନ୍ତ ଓ ପ୍ରଶାନ୍ତ ମଧ୍ୟ କରୋନାରେ ଆକ୍ରନ୍ତ ହୋଇ ସେହି ଏମ୍‌ସରେ ଚିକିତ୍ସାଧୀନ ଥିଲେ । ଏଯାଏ ଏ ଦୁହେଁ ସୁସ୍ଥ ହୋଇ ନାହାନ୍ତି । ଗତକାଲି ପ୍ରଶାନ୍ତଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ ଆଇସିୟୁରେ ରଖା ଯାଇଛି । ତାଙ୍କ ପ୍ରତି ଡାକ୍ତରମାନେ ବିଶେଷ ଧ୍ୟାନ ଦେଉଛନ୍ତି ।

ପ୍ରଶାନ୍ତ ହେଉଛନ୍ତି ସ୍ୱର୍ଗତ ରଘୁନାଥ ମହାପାତ୍ରଙ୍କ ମଝିଆ ପୁଅ । ସେ ଜଣେ ପୂର୍ବତନ ରଣଜୀ ଟ୍ରଫି ଖେଳାଳି । ଜଣେ ଦକ୍ଷ ଓପ୍ନର ଭାବେ ଖୁବ୍ ଖ୍ୟାତି କମାଇଥିଲେ । ବର୍ତ୍ତମାନ ସେ ବିସିସିଆଇ ମ୍ୟାଚ୍‌ ରେଫରୀ ଭାବେ କାର୍ଯ୍ୟ କରୁଥିଲେ । ୧୯୯୦ରେ ବିହାର ବିପକ୍ଷରେ ଖେଳି ନିଜର ପ୍ରଥମ ଶ୍ରେଣୀ କ୍ରିକେଟ୍ ଜୀବନ ଆରମ୍ଭ କରିଥିଲେ । ସେ ରଣଜୀ ଟ୍ରଫି ସହ ଦଲୀପ ଟ୍ରଫି ଓ ଦେଓଧର ଟ୍ରଫିରେ ମଧ୍ୟ ଖେଳିଥିଲେ ।

୧୯୯୦ରୁ ୨୦୦୩ ଯାଏ ରାଜ୍ୟ ପାଇଁ ଖେଳିଥିବା ପ୍ରଶାନ୍ତ ୪୫ଟି ପ୍ରଥମ ଶ୍ରେଣୀ ମ୍ୟାଚ୍ ଖେଳି ୨୧୯୬ ରନ୍ ସ୍କୋର କରିଥିଲେ । ଏଥିରେ ୫ଟି ଶତକ ଏବଂ ୧୧ଟି ଅର୍ଦ୍ଧଶତକ ରହିଛି । ତାଙ୍କର ସର୍ବାଧିକ ସ୍କୋର ହେଉଛି ଅପରାଜିତ ୧୫୭ ରନ୍ ।

ଚାରି ବର୍ଷ ତଳେ ରଘୁନାଥଙ୍କ ସାନ ପୁଅଙ୍କର ଏକ ଦୁର୍ଘଟଣାରେ ମୃତ୍ୟୁ ଘଟିଥିଲା । ଆଉ ଏବେ ରଘୁନାଥଙ୍କ ପରେ କୋଭିଡ୍‌ ସହ ଯୁଝୁଥିବା ତାଙ୍କ ପରିବାର ପାଇଁ ସମସ୍ତେ ସମବେଦନା ଜ୍ଞାପନ କରିଛନ୍ତି । ପ୍ରଶାନ୍ତ ଓ ଯଶୋବନ୍ତ ଶୀଘ୍ର ସୁସ୍ଥ ହୁଅନ୍ତୁ ବୋଲି ରାଜ୍ୟର ଅନେକ ବୁଦ୍ଧିଜୀବୀ, କ୍ରୀଡ଼ାବିତ୍‌ ଓ କ୍ରୀଡ଼ା ସଂଗଠକ କାମନା କରିଛନ୍ତି ।