ପୁରୀ ଏମାର ମଠରେ ପ୍ରତ୍ନତତ୍ତ୍ୱ ବିଭାଗର ସ୍ୱତନ୍ତ୍ର ଟିମ୍: ମାଟି ତଳୁ ଉଦ୍ଧାର ହେଲା ସିଂହ ମୂର୍ତ୍ତି, କୀର୍ତ୍ତିରାଜର କରୁଛନ୍ତି ଯାଞ୍ଚ
ପୁରୀ (କେନ୍ୟୁଜ): ପୁରୀରେ ଏଏସଆଇ ସୁପରିଟେଣ୍ଡେଣ୍ଟ ଅରୁଣ ମଲ୍ଲିକ । ଆଜି ଅପରାହ୍ନରେ ଏମାର ମଠ ପାଖରେ ହୋଇଥିବା ଖନନ ଅଞ୍ଚଳରେ ପହଞ୍ଚି ସେଠାରୁ ବାହାରିଥିବା ପଥରର ସିଂହ ମୂର୍ତ୍ତିର ଅନୁଧ୍ୟାନ କରିଛନ୍ତି । ଏହାସହ ସିଂହ ମୂର୍ତ୍ତିକୁ ସଫା କରିବା ସହ ସେଗୁଡିକର ଫଟୋଗ୍ରାଫି ମଧ୍ୟ କରିଛନ୍ତି । ଶ୍ରୀମନ୍ଦିର ପରିକ୍ରମା ପ୍ରକଳ୍ପ ନେଇ ମାଟି ଖନନ ବେଳେ ଏକ ସିଂହ ମୂର୍ତ୍ତି ବାହାରିଥିଲା । ତେବେ ସିଂହ ମୂର୍ତ୍ତିଟି ଭାଙ୍ଗି ଯାଇଥିବା ବେଳେ ଜିପିଆର ସର୍ଭେ ନହୋଇ ଖନନ କାର୍ଯ୍ୟ ଚାଲୁଥିବାରୁ ଶ୍ରୀମନ୍ଦିର ଚାରିପାଖରେ ଥିବା ଐତିହ କୀର୍ତ୍ତିରାଜି ନଷ୍ଟ ହୋଇଯାଉଛି ।
ଗତ ମେ ୭ ତାରିଖରେ ଏଏସ୍ଆଇ ହାଇକୋର୍ଟରେ ସତ୍ୟପାଠ ଦାଖଲ କରିଥିବା ବେଳେ ଅନେକ ଗୁମର ଖୋଲିବାରେ ଲାଗିଛି। ଦାଖଲ ହୋଇଥିବା ସତ୍ୟପାଠର ୪୦ ତମ ପୃଷ୍ଠାରେ ଖନନ ସମୟରେ ଗତ ଏପ୍ରିଲ ୨୯ ତାରିଖରେ ମାଟି ତଳୁ ର୍କିତ୍ତିରାଜି ମିଳିଥିବା କଥା ସ୍ପଷ୍ଟ ହୋଇଛି । ଏକ ପ୍ରାଚୀନ ସିଂହ ମୂର୍ତ୍ତିର ଫଟୋ ସଂଲଗ୍ନ କରି ASI ହାଇକୋର୍ଟଙ୍କୁ ଏନେଇ ଅବଗତ କରାଇଛି । ତେବେ ଏତେ ବଡ ଖନନ ହୋଇଥିବାରୁ ଆହୁରି ଅନେକ ଏପରି ପ୍ରାଚୀନ ମୂର୍ତ୍ତି ମିଳିପାରେ ବୋଲି ସନ୍ଦେହ କରାଯାଉଛି। ତେଣୁ ଏଏସଆଇର ସୁପରିଟେଣ୍ଡେଣ୍ଟ ଏବଂ ତାଙ୍କ ଟିମ୍ ଖନନ ସ୍ଥାନରେ ପହଞ୍ଚି ତନ୍ନ ତନ୍ନ କରି ଯାଞ୍ଚ କରୁଛନ୍ତି।