ଛାଡି ଚାଲିଗଲା ପେଟ ଚିହ୍ନୁଥିବା ମଣିଷଟିଏ, ଦୁଃଖରେ କାନ୍ଦୁଛି ଛୋଟୁ

ଭୁବନେଶ୍ବର(କେନ୍ୟୁଜ୍): ମଣିଷ ସିନା ବୁଝିପାରେ ନାହିଁ ସମ୍ପର୍କର ମୂଲ୍ୟ, କିନ୍ତୁ ପଶୁ ପକ୍ଷୀମାନଙ୍କୁ ଟିକିଏ ସ୍ନେହ ଦେଲେ ସେ ଜୀବନର ଶେଷ ପର୍ଯ୍ୟନ୍ତ ଆମକୁ ଭଲ ପାଉଥିବେ । ଏହାର ଜ୍ଵଳନ୍ତ ଉଦାହରଣ ଦେଖିବାକୁ ମିଳିଛି ସହିଦନଗର ସ୍ଥିତ ଭବାନୀ ମଲ୍ ସାମ୍ନାରେ ଖାଇବା ଷ୍ଟଲ ପକେଇ ପରିବାର ଚଳଉଥିବା ଜଣେ ମାଉସୀଙ୍କ ଠାରେ,ନାଁ ତାଙ୍କର ସୁଲୋଚନା ମହାନ୍ତି(୫୬ବର୍ଷ) । ପରିବାର କହିଲେ ତାଙ୍କର ଏକ ମାତ୍ର ଝିଅ, ଯାହାଙ୍କ ସହ ସେ ଭୁବନେଶ୍ୱର ସତ୍ୟକାଳୀ ବିଜୁ ଆଦର୍ଶ କଲୋନୀରେ ରହୁଥିଲେ । ଯେବେ, ସୁଲୋଚନାଙ୍କର ଷ୍ଟଲରେ ବଳକା ଖାଦ୍ୟ ବଳି ପଡ଼ୁଥିଲା, ସେ ସବୁବେଳେ ତାଙ୍କ ପାଖରେ ଜଗି ରହୁଥିବା ଗୋଟିଏ କୁକୁରକୁ ଦେଉଥିଲେ ।

ସ୍ନେହରେ ନାଁ ଦେଇଥିଲେ ତା’ର ଛୋଟୁ । ସେଥିରୁ ହିଁ ଗଢି ଉଠିଥିଲା ଚିକେନ ମାଉସୀ ଆଉ ଛୋଟୁର ସମ୍ପର୍କ, ଗତ କିଛିଦିନ ତଳେ ସୁଲୋଚନା ଲିଭର ଶିରୋସିସ ରୋଗରେ ଆକ୍ରାନ୍ତ ହୋଇଥିଲେ । ଏଭଳି ଭୟଙ୍କର ରୋଗରେ ପୀଡ଼ିତ ହୋଇ ଜୀବନ ମୃତ୍ୟୁ ବାଜିରେ ହାରିଯାଇଥିଲେ ସୁଲୋଚନା । ଗତ କାଲି ରାତିରେ ସେ ଶେଷ ନିଃଶ୍ଵାସ ତ୍ୟାଗ କରିଥିଲେ ।

ଛୋଟୁକୁ ମା’ ପରି ଭଲ ପାଉଥିବା ସେହି ମାଉସୀ ଯେ ତାକୁ ସବୁଦିନ ପାଇଁ ଛାଡ଼ି ଚିର ନିଦ୍ରାରେ ଶୋଇଯିବ ସେ କଥା ଛୋଟୁ ବୁଝି ପାରି ନଥିଲା । ମଣିଷ ପରି ବଳବାନ ଥିଲେ ସିନା ପୁଅ ପରି ସୁଲୋଚନାଙ୍କ କୋକେଇରେ କାନ୍ଧ ଲଗେଇ ଥା’ନ୍ତା । ବୋଧ ହୁଏ ତା’ ଦୁଃଖ ସ୍ଥାନୀୟ ଲୋକ ମାନଙ୍କ ପାଖରେ ପହଞ୍ଚି ପାରିଥିଲା ।

ସ୍ଥାନୀୟ ବାସିନ୍ଦାଙ୍କ ମଧ୍ୟରୁ ଯୁବ ସମାଜସେବୀ ଦୀପକ ଛୋଟରାୟ ଘଟଣା ସମ୍ପର୍କରେ ବିଜୁ ଜନତା ଦଳ ତଥା ଓଡ଼ିଶା-ମୋ ପରିବାର ଯୁଗ୍ମ ସମ୍ପାଦକ ରୁଦ୍ର ନାରାୟଣ ସାମନ୍ତରାୟଙ୍କୁ ଜଣାଇବା ପରେ ତୁରନ୍ତ ପଦକ୍ଷେପ ନିଆଯାଇ ସୁଲୋଚନାଙ୍କର ମୃତଶରୀରକୁ ଜୟ ଓଡ଼ିଶାର ଶବ ପରିବହନ ଯାନ ‘ଶେଷ ସାଥୀ’ ମାଧ୍ୟମରେ । ସତ୍ୟନଗର ଶ୍ମଶାନକୁ ନେଇ ସସମ୍ମାନେ ଶେଷକୃତ୍ୟ ସମ୍ପନ୍ନ କରାଯାଇଥିଲା । ଏହି ସମୟରେ ରୁଦ୍ର ସାମନ୍ତରାୟଙ୍କ ସମେତ ପୂର୍ବତନ କର୍ପୋରେଟର ଭାନୁପ୍ରିୟା ଦାସ, ସ୍ଵେଚ୍ଛାସେବୀ ଅନସୂୟା ମ୍ୟାଡ଼ମ ଏବଂ ଧିରେନ୍ଦ୍ର ସ୍ଵାଇଁ ଉପସ୍ଥିତ ଥିଲେ ଏବଂ ସୁଲୋଚନାଙ୍କୁ ଅତି ଭଲ ପାଉଥିବା ଛୋଟୁ ମଧ୍ୟ ଉପସ୍ଥିତ ରହି ମନରୁ ଅଶ୍ରୁଳ ଶ୍ରଦ୍ଧାଞ୍ଜଳୀ ଦେଉଥିଲା । ଶେଷ ମୁହୂର୍ତ୍ତରେ ସୁଲୋଚନାଙ୍କୁ ଜଗି ରହିଥିବା ଛୋଟୁର ଭାବାବେଗ ଦେଖଣାହାରୀଙ୍କ ଆଖିରେ ଲୁହ ଆଣି ଦେଇଥିଲା ।