ନୂତନ ଶିକ୍ଷକ ନିଯୁକ୍ତି ଦାବି, ସ୍କୁଲ ଗେଟରେ ତାଲା ପକାଇ କଲେ ଆନ୍ଦୋଳନ
ପ୍ରଧାନ ଶିକ୍ଷକଙ୍କ ବଦଳି ଏବଂ ନୂତନ ଶିକ୍ଷକ ନିଯୁକ୍ତି ଦାବି । ସ୍କୁଲ ଗେଟରେ ତାଲା ପକାଇ ଆନ୍ଦୋଳନ । ବାଲେଶ୍ୱର ଜିଲ୍ଲା ଖଇରା ବ୍ଲକ ସୁନ୍ଦରପୁର ନିଳସୁନ୍ଦର ଜିଉ ନବକିଶୋର ଉଚ୍ଚ ବିଦ୍ୟାଳୟ ସାମ୍ନାରେ ଛାତ୍ରଛାତ୍ରୀଙ୍କ ପ୍ରତିବାଦ । ଗେଟରେ ତାଲା ପକାଇ ଆନ୍ଦୋଳନ କରିଛନ୍ତି ଛାତ୍ରଛାତ୍ରୀ ଏବଂ ଅଭିଭାବକ ।
ସ୍କୁଲରେ ପ୍ରଥମରୁ ଅଷ୍ଟମ ଶ୍ରେଣୀର ୨୭୧ ଜଣ ଛାତ୍ରଛାତ୍ରୀଙ୍କୁ ମାତ୍ର ୪ଜଣ ଶିକ୍ଷକ ପାଠ ପଢ଼ାଉଛନ୍ତି । ଫଳରେ ଛାତ୍ରଛାତ୍ରୀମାନେ ଠିକରେ ପାଠ ପଢି ପାରୁନଥିବା ଅଭିଯୋଗ ହୋଇଛି । ଅନ୍ୟପଟେ ସ୍କୁଲର ପ୍ରଧାନ ଶିକ୍ଷକ ଗଗନ ଚନ୍ଦ୍ର ଧରଙ୍କ ଅନ୍ୟତ୍ର ବଦଳି ହୋଇଯାଇଛି ।
ଶିକ୍ଷକ ନିଯୁକ୍ତି କରିବା ପରିବର୍ତ୍ତେ ପ୍ରଧାନ ଶିକ୍ଷକଙ୍କୁ ଅନ୍ୟତ୍ର ବଦଳି କରାଯାଇଥିବାରୁ ଆଜି ସ୍କୁଲର ଛାତ୍ରଛାତ୍ରୀ,ଅଭିଭାବକ ଏବଂ ପରିଚାଳନା କମିଟିର ସଦସ୍ୟମାନେ ସ୍କୁଲ ଗେଟରେ ତାଲା ପକାଇ ଗେଟ ଆଗରେ ଆନ୍ଦୋଳନ କରିଛନ୍ତି । ତୁରନ୍ତ ଶିକ୍ଷକଙ୍କ ବଦଳି ବାତିଲ କରିବା ସହ ନୂତନ ଶିକ୍ଷକ ନିଯୁକ୍ତି କରାନଗଲେ ଏହି ଆନ୍ଦୋଳନ ଜରିରହିବ ବୋଲି ଚେତାବନୀ ଦେଇଛନ୍ତି ।
