ସର୍ବଭାରତୀୟ ସ୍ତରରେ ସ୍ଵର୍ଣ୍ଣ ପଦକ ହାସଲ କଲେ ସୁମନ, ସଫଳତା ପାଇଁ ଛୁଟୁଛି ପ୍ରଂଶସାର ସୁଅ
ତୁଳସୀ ଦୁଇ ପତ୍ରରୁ ବାସିଲା ପରି ଛୋଟ ବେଳୁ ହିଁ ସୁମନଙ୍କ ପ୍ରତିଭା ପ୍ରସ୍ଫୁଟିତ ହୋଇଥିଲା । ଆଜି ତାଙ୍କ ପାଇଁ ଗର୍ବିତ ବାପା ମା’ । ସର୍ବଭାରତୀୟ ସ୍ତରରେ ସ୍ଵର୍ଣ୍ଣ ପଦକ ହାସଲ କରିଛିି ପୁଅ । ଖୁସିରେ ବାପା ମାଙ୍କ ଛାତି ଫୁଲି ଉଠୁଛି । ଖାଲି ବାପା ମା’ ଗର୍ବିତ ହୋଇ ନାହାଁନ୍ତି ବରଂ ରାଜ୍ୟ ତଥା ଅଞ୍ଚଳ ପାଇଁ ଗୌରବ ଆଣିଛନ୍ତି ସୁମନ । ସ୍ୱର୍ଣ୍ଣ ପଦକ ହାସଲ କରିଛନ୍ତି ଓଡ଼ିଆ ପୁଅ ସୁମନ ।
ଜାତୀୟ ସ୍ତରୀୟ ପ୍ରତିଯୋଗିତାରେ ଅଂଶଗ୍ରହଣ କରି ସୁନାମ ଆଣିଲେ ଗଞ୍ଜାମ ଜିଲ୍ଲା ବୁଗୁଡା ପିପୁଲସ୍ କଲେଜର ଏନସିସି ଛାତ୍ର ସୁମନ ପ୍ରଧାନ । ସେ ସର୍ବଭାରତୀୟ ସ୍ତରୀୟ ସ୍ଥଳ ସେନା କ୍ୟାମ୍ପରେ ବନ୍ଧୁକ ଚାଳନାରେ ସ୍ଵର୍ଣ୍ଣ ପଦକ ହାସଲ କରି ରାଜ୍ୟ ତଥା ଅଞ୍ଚଳ ପାଇଁ ଗୌରବ ଆଣିଛନ୍ତି । ରାଜ୍ୟ ତରଫରୁ ୫୧ ଜଣ ଏନସିସି କ୍ଯାଡେଟ ଜାତୀୟ ସ୍ତରରେ ଅଂଶ ଗ୍ରହଣ କରିଥିଲେ । ସ୍ଵର୍ଣ୍ଣପଦକ ହାସଲ ପରେ ପିପୁଲସ୍ କଲେଜ କର୍ତ୍ତୁପକ୍ଷଙ୍କ ପକ୍ଷରୁ ସୁମନଙ୍କୁ ସ୍ୱାଗତ ସମ୍ବର୍ଦ୍ଧନା କରାଯାଇଛି । ଏପରିକି ସୁମନଙ୍କ ଉଜ୍ଜଳମୟ ଭବିଷ୍ଯତ ପାଇଁ କଲେଜ କର୍ତ୍ତୃପକ୍ଷ ଶୁଭେଛା ଜଣାଇଛନ୍ତି । ସରକାରୀ ପ୍ରୋତ୍ସାହନ ମିଳିଲେ ସୁମନ ପ୍ରଧାନ ସେନା କିମ୍ବା ପୋଲିସରେ ସାମିଲ ହେବାର ଲକ୍ଷ୍ୟ ରଖିଥିବା କହିଛନ୍ତି ।
ତେବେ ସୁମନ ପ୍ରଧାନଙ୍କ ଏହି ସଫଳତାକୁ ନେଇ ପରିବାର ଲୋକଙ୍କ ଠାରୁ ଆରମ୍ଭ କରି ସାଙ୍ଗସାଥୀ, ଗ୍ରାମବାସୀ ଓ ଅଞ୍ଚଳବାସୀ ବେଶ୍ ଖୁସି ଅଛନ୍ତି । ଭବିଷ୍ୟତରେ ସେ ଆହୁରି ଆଗକୁ ଯାଇ ରାଜ୍ୟ ତଥା ଦେଶ ପାଇଁ ଗୌରବ ଆଣିବେ ବୋଲି ସମସ୍ତେ ଆଶାବାଦୀ ଅଛନ୍ତି । ସୁମନ ପ୍ରଧାନଙ୍କ ଏଭଳି ସଫଳତା ପାଇଁ ବିଭିନ୍ନ ମହଲରୁ ତାଙ୍କୁ ପ୍ରଶଂସାର ସୁଅ ଛୁଟୁଛି । ତାଙ୍କର ଏହି ସଫଳତା ସ୍ଥାନୀୟ ଅଞ୍ଚଳର ଅନେକ ଯୁବକ ଯୁବତୀଙ୍କୁ ଅନେକ ପ୍ରେରଣା ଯୋଗାଇବ ନିଶ୍ଚୟ ।
