କିଟ ଇଣ୍ଟରନ୍ୟାସନାଲ ସ୍କୁଲର ଛାତ୍ରଛାତ୍ରୀଙ୍କ ସଫଳତା, ସର୍ବାଧିକ ୪୦ ପଏଣ୍ଟ ହାସଲ କଲେ ଶ୍ୱେତା ମୋଡା

ଇଣ୍ଟରନ୍ୟାସନାଲ ବାକାଲରେଟ ଡିପ୍ଲୋମା ପ୍ରୋଗ୍ରାମ(ଆଇବିଡିପି) ପରୀକ୍ଷାରେ କିଟ ଇଣ୍ଟରନ୍ୟାସନାଲ ସ୍କୁଲର ଛାତ୍ରଛାତ୍ରୀମାନେ ବ୍ୟାପକ ସଫଳତା ପାଇଛନ୍ତି। ପରୀକ୍ଷାରେ ସ୍କୁଲର ଶ୍ୱେତା ମୋଡା ସର୍ବାଧିକ ୪୦ ପଏଣ୍ଟ ହାସଲ କରିଥିବା ବେଳେ ସିଦ୍ଧାନ୍ତ ସୁଆରଙ୍କ ସମେତ ଅଧିକାଂଶ ଛାତ୍ରଛାତ୍ରୀ ବ୍ୟକ୍ତିଗତ ଭାବେ ୭ ପଏଣ୍ଟ ହାସଲ କରି ଗ୍ରେଡ ଏ- ରେ ପାସ କରିଥିବା ଜଣାପଡ଼ିଛି। ଆଇବିଡିପି ପରୀକ୍ଷାରେ କୃତକାର‌୍ୟ୍ୟ ହେଉଥିବା ଛାତ୍ରଛାତ୍ରୀମାନେ ବିଶ୍ୱର ଯେ କୌଣସି ବିଶ୍ୱବିଦ୍ୟାଳୟରେ ସିଧାସଳଖ ନାମ ଲେଖାଇ ଉଚ୍ଚଶିକ୍ଷା ଲାଭ କରିପାରିବେ।

ଆଇବିଡିପିରେ ସଫଳତା ହାସଲ କରିଥିବା ଛାତ୍ରଛାତ୍ରୀମାନେ ଲଣ୍ଡନ ସ୍କୁଲ ଅଫ ଇକୋନେମିକସ, ୟୁନିଭର୍ସିଟି କଲେଜ ଲଣ୍ଡନ, ୟୁନିଭର୍ସିଟି ଅଫ ଟରୋଣ୍ଟୋ, ୱାରୱିକ ୟୁନିଭର୍ସିଟି, କିଙ୍ଗସ କଲେଜ ଲଣ୍ଡନ, ଅଷ୍ଟ୍ରେଲିଆନ ନ୍ୟାସନାଲ ୟୁନିଭରସିଟି, କାନ୍ସାସ୍ ୟୁନିଭର୍ସିଟି ଏବଂ ଅଷ୍ଟ୍ରେଲିଆର ଆରଏମଆଇଟି ଭଳି ଖ୍ୟାତିସଂପନ୍ନ ବିଶ୍ୱସ୍ତରୀୟ ବିଶ୍ୱବିଦ୍ୟାଳୟଗୁଡ଼ିକରେ ନାମ ଲେଖାଇ ପାରିବେ। କିଟ୍ ଇଣ୍ଟରନ୍ୟାସନାଲ ସ୍କୁଲ ସମଗ୍ର ଓଡ଼ିଶାରେ ଏକମାତ୍ର ସ୍କୁଲ ଭାବେ ଆଇବିଡିପି ପାଠ୍ୟକ୍ରମ ପ୍ରଦାନ କରୁଥିବା ବେଳେ ଛାତ୍ରଛାତ୍ରୀ ଏବଂ ଅଭିଭାବକଙ୍କ ବିଶ୍ୱାସଭାଜନ ହୋଇପାରିଛି।

ଏହି ସଫଳତା ପାଇଁ ପ୍ରତିଷ୍ଠାତା ଅଚ୍ୟୁତ ସାମନ୍ତ ସମସ୍ତ ଛାତ୍ରଛାତ୍ରୀଙ୍କୁ ଅଭିନନ୍ଦନ ଜଣାଇବା ସହ କିଟ ଇଣ୍ଟରନ୍ୟାସନାଲ ସ୍କୁଲର ଚେୟାରପର୍ସନ ଡ. ମୋନାଲିସା ବଳ, ଅଧ୍ୟକ୍ଷ ଡ. ସଞ୍ଜୟ ସୁଆର, ଆଇବିଡିପି ବିଭାଗର ସଂଯୋଜିକା ନନ୍ଦିତା ମିଶ୍ର ଓ ନିର୍ଦ୍ଦେଶକ ପ୍ରଦୀପ ଦାସ ସମସ୍ତ ଶିକ୍ଷକ, କର୍ମଚାରୀଙ୍କୁ ମଧ୍ୟ ଧନ୍ୟବାଦ ଜଣାଇଛନ୍ତି।