ତିନି ଦିନ ଭିତରେ ତାପମାତ୍ରା ଚାରିରୁ ପାଞ୍ଚ ଡିଗ୍ରୀ ଯାଏ କମିବ, ଗ୍ରୀଷ୍ମ ପ୍ରବାହରୁ ମିଳିବ ସାମାନ୍ୟ ଆଶ୍ୱସ୍ତି

କେନ୍ୟୁଜ୍(ବ୍ୟୁରୋ):ପ୍ରଚଣ୍ଡ ଗ୍ରୀଷ୍ମ ପ୍ରବାହରୁ ମିଳିଲା ସାମାନ୍ୟ ଆଶ୍ୱସ୍ତି। ଆସନ୍ତା ତିନି ଦିନ ଭିତରେ ତାପମାତ୍ରା ଚାରିରୁ ପାଞ୍ଚ ଡିଗ୍ରୀ ଯାଏ କମିବ । ଆଜି ଆଭ୍ୟନ୍ତରୀଣ ଓଡ଼ିଶାରେ ସକାଳ ସମୟରେ ୭ଟି ଜାଗାରେ ବିଜୁଳି ଓ ଘଡଘଡି ସହ ମେଘୁଆ ପାଗ ରହିଥିଲା । କୋରାପୁଟ କୋଟପାଡ଼ରେ ୧୫ମିଲିମିଟର ସର୍ବାଧିକ ବର୍ଷା ରେକର୍ଡ କରାଯାଇଛି। ରାଜ୍ୟର ଅନ୍ୟ ସ୍ଥାନରେ ହାଲୁକା ବର୍ଷା ରେକର୍ଡ କରାଯାଇଛି । ଆସନ୍ତା ୫ ଦିନରେ ମେଘୁଆ ପାଗ ସହ ଚାରିରୁ ପାଞ୍ଚ ଡିଗ୍ରୀ ପର୍ଯ୍ୟନ୍ତ ତାପମାତ୍ରା ଖସିବ ।

ଆଜି ବିଭିନ୍ନ ସ୍ଥାନରେ ପବନ ଓ ବର୍ଷା ଯୋଗୁଁ ତାତିରୁ କିଛି ପରିମାଣରେ ଆଶ୍ୱସ୍ତି ମିଳିଛି । ୨୨ ଓ ୨୩ ତାରିଖରେ କାଳବୈଶାଖୀ ପ୍ରଭାବ ରହିବ ବୋଲି ସୂଚନା ଦେଇଛି ପାଣିପାଗ କେନ୍ଦ୍ର । କିଛି ଜିଲ୍ଲାରେ ବିଜୁଳି ଘଡ଼ଘଡ଼ି ସହ କୁଆପଥର ବର୍ଷା ସମ୍ଭାବନା ରହିଛି । ଏହି ସମୟରେ ଘଣ୍ଟାପ୍ରତି ୪୦ରୁ ୫୦ କିଲୋମିଟର ବେଗରେ ପବନ ବହିବ । ଆଜି ଭୋରରୁ କଟକ, ମୟୂରଭଞ୍ଜ, ବଲାଙ୍ଗିର, ଟିଟିଲାଗଡ଼ ଓ କୋରାପୁଟରେ କାଳବୈଶାଖୀର ପ୍ରଭାବ ଦେଖିବାକୁ ମିଳିଛି । କଟକରେ ଝଡ଼ ପବନ ଯୋଗୁଁ ତାତିରୁ ସାମାନ୍ୟ ଆଶ୍ୱସ୍ତି ମିଳିଛି । ରାଜଧାନୀରେ ବି ସମାନ ସ୍ଥିତି ।