କେନାଲରେ ପଶିଗଲା କାର୍, ଦୁର୍ଘଟଣାରେ ଚାଳକଙ୍କର ମୃତ୍ୟୁ
କଟକ : କେନାଲ ଭିତରେ ପଶିଗଲା କାର, ଡ୍ରାଇଭର ମୃତ । କଟକ ସଦର ଥାନା ଅନ୍ତର୍ଗତ ବମ୍ଫକୁଦ ଅଞ୍ଚଳରେ ଏହି ଦୁର୍ଘଟଣା ଘଟିଛି । ମୃତକ ଜଣକ ବମ୍ଫକୁଦ ଗାଁର କାହ୍ନା ଜେନା । ଗତକାଲି ରାତିରେ କାହ୍ନା ଘରକୁ ଫେରିନଥିଲେ। ଆଜି ସକାଳୁ କେନାଲ ଭିତରେ ଏକ କାର ପଶି ରହିଥିବା ସ୍ଥାନୀୟ ଲୋକେ ଦେଖିବାକୁ ପାଇଥିଲେ । ଅଗ୍ନିଶମ ବିଭାଗକୁ ଖବର ଦିଆଯିବା ପରେ କେନାଲରୁ କାରକୁ ଉଦ୍ଧାର କରାଯାଇଥିଲା । ଆଉ ଏହା ଭିତରୁ କାହ୍ନାଙ୍କ ମୃତଦେହ ଉଦ୍ଧାର କରାଯାଇଥିଲା । ଭାରସାମ୍ୟ ହରାଇ କାରଟି କେନାଲ ଭିତରକୁ ଖସିପଡିଥିବା ସନ୍ଦେହ କରାଯାଉଛି । ପୋଲିସ ମୃତଦେହ ଜବତ କରି ତଦନ୍ତ କରୁଛି ।
