ବଦଳିଲା ମଶାଣିର ରୂପ, ଗାଁ ଶ୍ମଶାନକୁ ପାର୍କରେ ପରିଣତ କଲେ ଗ୍ରାମବାସୀ

ଗାଁ ମଶାଣି ପାଲଟିଲା ପାର୍କ। ଶବ ଦାହ ହେଉଥିବାରୁ ଦିନେ ଯେଉଁ ଜାଗାକୁ ଯିବାକୁ ଲୋକେ ଭୟ କରୁଥିଲେ ଏବେ ସେଠାରେ ଭିଡ଼ ଜମାଉଛନ୍ତି ଶହ ଶହ ଲୋକେ। କିଏ ସେଲଫି ନେଉଛି ତ ଆଉ କିଏ ବୁଲା ବୁଲି କରି ମଜା ନେଉଛି। ସେହିପରି ଆଉ କିଏ ଫୁଲ ଗଛରେ ପାଣି ଦେଉଛି ତ ଆଉ କିଏ ସାଜସଜ୍ଜାରେ ଲାଗିପଡ଼ିଛି, କିନ୍ତୁ ଏଥିପାଇଁ କେହି କୌଣସି ପାରିଶ୍ରମିକ ନେଉନାହାନ୍ତି। ଏହି ସୁନ୍ଦର ଜାଗାଟି ହେଉଛି ନୟାଗଡ଼ ଜିଲ୍ଲା ବିରୁଡା ଗ୍ରାମ ପଞ୍ଚାୟତ। ଗାଁର ଲୋକ ସଂଖ୍ଯା ଚାରି ହଜାରରୁ ଅଧିକ। କିନ୍ତୁ ଗାଁରେ ରହିଛି ଭାଇଚାରା।

ଗାଁ ଶ୍ମଶାନ ଭିତରେ ବିଭିନ ପ୍ରକାର ପୌରାଣିକ ବିଷୟ ବସ୍ତୁକୁ ନେଇ ଚିତ୍ର ସହ ମୂର୍ତ୍ତି ନିର୍ମାଣ କରାଯାଇଥିବା ବେଳେ ବିଭିନ୍ନ ପ୍ରକାରର ଫୁଲ ଗଛ ମଧ୍ୟ ଲଗାଯାଇଛି। ଏପରିକି ଗାଁର ଶ୍ରମିକମାନେ ଆଠ ଘଣ୍ଟା ଜାଗାରେ ବାର ଘଣ୍ଟା କାମ କରୁଛନ୍ତି, ସେ ପୁଣି ବିନା ପାରିଶ୍ରମିକରେ। ଏପରିକି ଛୋଟ ଛୋଟ ପିଲାମାନେ ଏବେ ଏହି ଶ୍ମଶାନ ଭିତରକୁ ଆସୁଛନ୍ତି, ଫୁଲ ଗଛରେ ପାଣି ଦେଉଛନ୍ତି, ବୁଲୁଛନ୍ତି ଓ ଡର ଲାଗୁନଥିବା କଥା କହିଛନ୍ତି, କେବଳ ଛୋଟ ଛୁଆ ନୁହେଁ ଗାଁର ଝିଅମାନେ ମଧ୍ୟ ଏଠାକୁ ଆସି ସ୍ୱଚ୍ଛନ୍ଦରେ ବୁଲାବୁଲି କରୁଛନ୍ତି। ନୟାଗଡ଼ ବିଧାୟକ ତଥା କୃଷି ଓ ଉଚ୍ଚ ଶିକ୍ଷାମନ୍ତ୍ରୀ ଅରୁଣ ସାହୁ ଏଥିପାଇଁ ଗ୍ରାମବାସୀଙ୍କୁ ପ୍ରେରଣା ଦେଇଥିବା ଗାଁ ଲୋକେ କହିଛନ୍ତି। ସେହିପରି ନୟାଗଡ ବ୍ଲକ ବିଡିଓ ମଧ୍ୟ ସହଯୋଗ କରିଥିବାରୁ ଗ୍ରାମବାସୀମାନେ ଧନ୍ଯବାଦ ଜଣାଇଛନ୍ତି।

ଏହି ଶ୍ମଶାନ ଘାଟ ପୁରୁଷ ପୁରୁଷ ଧରି ଏକ ଛୋଟ ପାହାଡ ତଳେ ଆବର୍ଜନା ଭିତରେ ପଡି ରହିଥିଲା। ମାତ୍ର ଗାଁ ଯୁବକ, ସରପଞ୍ଚ, ସମିତିସଭ୍ଯ ସମସ୍ତେ ମିଳିମିଶି ମାତ୍ର ତିନି ବର୍ଷ ଭିତରେ ଏହାକୁ ଏକ ସୁନ୍ଦର ପାର୍କ କରି ଗଢ଼ି ତୋଳି ପାରିଛନ୍ତି। ଏଥିପାଇଁ ଗ୍ରାମବାସୀ ସମସ୍ତେ ବହୁତ ଖୁସି ଅଛନ୍ତି। ଲକ୍ଷ୍ୟ ରଖିଛନ୍ତି, ନିଜ ଗାଁକୁ ଯେମିତି ଓଡ଼ିଶାରେ ଏକ ନମ୍ବର ଆଦର୍ଶ ଶ୍ମଶାନ ଘାଟରେ ପରିଣତ କରିବେ ଓ ଏକ ଆଦର୍ଶ ଗ୍ରାମପଞ୍ଚାୟତ ଗଠନ କରିବେ।