କାଠ କବାଟକୁ ଜାଳି ଘର ଭିତରେ ପଶି ସବୁ ଲୁଟି ନେଲେ ଚୋର
ଉଦଳା : ଘରେ କେହି ନ ଥିବାର ସୁଯୋଗ ନେଇ ଛାତ ଦେଇ ଘର ଭିତରକୁ ପଶିଲେ । ହେଲେ ବାଧକ ସାଜିଲା କାଠ କବାଟ । ଏମିତି ବୁଦ୍ଧି ଖଟାଇଲେ ଯେ, ସିଧା କାଠ କବାଟକୁ ଜାଳି ଘର ଭିତରେ ପଶିଲେ ଆଉ ଆଖି ପିଛୁଳାକେ ଘରୁ ସବୁ ଲୁଟି ନେଇଗଲେ । ଏଭଳି ଘଟଣା ଘଟିଛି କପ୍ତିପଦା ଥାନା ନୂଆସାହି ଗ୍ରାମରେ।
ନୂଆ ନୂଆ ତିଆରି ହେଲା ଭଳି ଲାଗୁଥିବା ଏଇ ଘରର ଅବସ୍ଥା କଣ ହେଇଛି । ଚାଲିଆଡେ ପଡିଛି ପୋଡା ଅଙ୍ଗାର । କାନ୍ଥ ବାଡ ଚାରିଆଡେ କଳା ପଡିଯାଇଛି । ଛିନଛତ୍ର ହୋଇପଡିରହିଛି ସବୁ ଜିନିଷ ପତ୍ର । ଆଲମିରାରେ ଥିବା ଲୁଗାପଟା ସବୁ ବାହାରେ ପଡିଛି । ଆଉ ସବୁ ଅଳଙ୍କାର ଟଙ୍କା ପଇସା ନେଇ ଛୁ ମାରିଛନ୍ତି ଚୋର ।
ସତରେ ବେଳେବେଳେ ଏମିତି କିଛି ଘଟଣା ଘଟେ ଯାହା ବିଷୟରେ କେହି କେବେ କଳ୍ପନା ବି କରିନଥାନ୍ତି । ଆଉ ଏଭଳି ଖବର ଜାଣିବା ପରେ ରକ୍ତ ଗରମ ହୋଇଯାଏ । କଣ ଘର ଛାଡି ସୁରକ୍ଷିତ ଭାବେ କୁଆଡେ ବାହାରକୁ ଯିବା ଆଜିର ସମୟରେ ସମ୍ଭବ ନୁହେଁ? ଯାହାର ଉତ୍ତର ସମସ୍ତଙ୍କ ପାଖରେ ନାଁ ହିଁ ଥିବ ।
ତେବେ ଏମିତି କିଛି ଘଟିଛି ଗ୍ରାମର ଅଞ୍ଜନ ନାୟକ ଏବଂ ତାଙ୍କ ପତ୍ନୀଙ୍କ ସହ । ସୂଚନା ମୁତାବକ ଏହି ଦମ୍ପତି ନିଜ ଝିଅକୁ ଛାଡ଼ିବା ନିମନ୍ତେ ଫୁଲବାଣୀ ଯାଇଥିଲେ । ଦୁଇ ଦିନ ହେବ ସେ ଯାଇଥିବାବେଳେ ଗତକାଲି ବିଳମ୍ବିତ ରାତିରେ ଘରକୁ ଫେରିଥିଲେ । ତେବେ ଘରେ ପହଁଚି ଯାହା ଦେଖିଥିଲେ ସେମାନଙ୍କ ପାଦ ତଳୁ ମାଟି ଖସିଯାଇଥିଲା । ସେମାନେ ଜାଣିବାକୁ ପାଇଥିଲେ ଘରୁ ଲୁଟ୍ ହୋଇଛି । କିଏ ଘରର କାଠ କବାଟକୁ ପୋଡି ଦେଇ ସବୁ ଲୁଟି ନେଇଛି ।
ତୁରନ୍ତ ଏ ନେଇ କପ୍ତିପଦା ପୋଲିସକୁ ଖବର ଦେବା ପରେ ପୋଲିସ୍ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ସାଇଣ୍ଟିଫିକ ଟିମ୍ ସହାୟତାରେ ତଦନ୍ତକୁ ତ୍ୱରାନ୍ୱିତ କରିଛି ପୋଲିସ୍ । ତେବେ ଲୁଟେରାମାନେ ଘର ଭିତରକୁ ପଶିବା ପରେ ଘର କବାଟକୁ ପାରି କରିପାରିନଥିଲେ । ଯାହାଫଳରେ ଉକ୍ତ କାଠ କବାଟକୁ ଜାଳି ଦେଇଥିବା ପୋଲିସ୍ ପ୍ରାଥମିକ ତଦନ୍ତରୁ ଜାଣିବାକୁ ପାଇଛି ।
ଏବେ ସବୁଠି ଆତଙ୍କରାଜ୍ ଚଳାଇଛନ୍ତି ଏହି ଲୁଟେରା ଦଳ । ପୋଲିସ୍ ଆଖିରେ ଧୂଳି ଦେଇ ନିଜର କାୟା ବିସ୍ତାର କରୁଛନ୍ତି । ରାତିରେ ପୋଲିସ୍ ପେଟ୍ରୋଲିଂ ଠିକ ଭାବେ କଲେ ହୁଏତ ଏଭଳି ଚୋରି ହେବନି ବୋଲି ଅଞ୍ଚଳବାସୀ କହିଛନ୍ତି । ତେବେ ଏଭଳି ଘଟଣା ପରେ ସ୍ଥାନୀୟ ଲୋକେ ଏବେ ଭୟଭୀତ ଅବସ୍ଥାରେ ରହିଛନ୍ତି । ଏପଟେ ଉକ୍ତ ଦୁର୍ବୃତ୍ତମାନଙ୍କୁ କାବୁ କରିବାକୁ ଦାବି କରିଛି ପୀଡିତ ପରିବାର ।
