ଭୁବନେଶ୍ବର : ନନ୍ଦନକାନନକୁ ଆସିଲେ ନୂଆ ଅତିଥି । ବାଘୁଣୀ ରୁପା ଜନ୍ମ ଦେଲା ୪ ଶାବକ । ତୃତୀୟ ଥର ପାଇଁ ମାଆ ହେଲା ଧଳା ବାଘୁଣୀ ରୁପା । ୪ ଶାବକଙ୍କ ମଧ୍ୟରେ ଗୋଟିଏ କଳାରଙ୍ଗର ଶାବକ ଥିବା ସୂଚନା ରହିଛି। ସିସିଟିଭି ଜରିଆରେ ମାଆ ଓ ୪ ଶାବକଙ୍କ ଉପରେ ରଖାଯାଇଛି ନଜର ।
ବାଘୁଣୀ ‘ରୁପା’ ପ୍ରଥମ ଥର ପାଇଁ ୨୦୨୨ ମାର୍ଚ୍ଚ ୧୧ ତାରିଖରେ ମା’ ହୋଇଥିଲା । ମହାବଳ ବାଘ ‘ରାଜେଶ’ ସହିତ ମିଳନ ଯୋଗୁ ୩ ଶାବକ ଜନ୍ମ ଦେଇଥିଲା ‘ରୁପା’ । ଏଥିରୁ ୨ଟି ଶାବକ ଏକ ମାସ ମଧ୍ୟରେ ମୃତ୍ୟୁ ହୋଇଥିଲା । କିନ୍ତୁ ତୃତୀୟ ଶାବକ ହିମାଂଶୀକୁ ଝାଡ଼ଖଣ୍ଡର ରାଞ୍ଚିର ଚକଲାସ୍ଥିତ ଭଗବାନ ବିର୍ସା ପ୍ରାଣୀ ଉଦ୍ୟାନକୁ ଗତ ଜୁଲାଇ ୯ ତାରିଖରେ ପଠାଯାଇଥିଲା ।
ଗତ ବର୍ଷ ଜାନୁଆରି ୬ ତାରିଖରେ ମା’ ହୋଇଥିଲା ରୁପା । ଦ୍ବିତୀୟ ଥର ପାଇଁ ମଧ୍ୟ ରାଜେଶ ସହିତ ମିଳନରୁ ମା’ ହୋଇଥିଲା ରୁପା । ଗତ ବର୍ଷ ରୁପା ଅମ୍ରିତା ଓ ଶିବା ଦୁଇ ଶାବକଙ୍କୁ ଜନ୍ମ ଦେଇଥିଲା । ବର୍ତ୍ତମାନ ଏହି ଦୁଇ ଶାବକ ନନ୍ଦନକାନନରେ ଅଛନ୍ତି ।