ଭୁବନେଶ୍ବର(କେନ୍ୟୁଜ୍): ବିଧାୟକ ପ୍ରଦୀପ ମହାରଥୀଙ୍କ ଜାମିନ ଆବେଦନ ଉପରେ ଆଜି ଶୁଣାଣି ହେବ । ଭୁବନେଶ୍ୱର ସ୍ୱତନ୍ତ୍ର ଏଡିଜେ କୋର୍ଟ ଏହି ଶୁଣାଣି କରିବେ । ଗତ ରବିବାର ଦିନ କୋର୍ଟ ଜାମିନ ଆବେଦନର ଶୁଣାଣିକୁ ସ୍ଥଗିତ ରଖିଥିଲେ । ଏହାପରେ ମହାରଥୀଙ୍କୁ ଭୁବନେଶ୍ୱର ଝାରପଡ଼ା ଜେଲକୁ ପଠାଇଦିଆଯାଇଥିଲା । ତେବେ ଅସୁସ୍ଥତା ଯୋଗୁଁ ଏବେ ସେ କ୍ୟାପିଟାଲ ହସପିଟାଲରେ ଚିକିତ୍ସାଧୀନ ଅଛନ୍ତି ।
ଗତ ରବିବାର ରାତିରେ ପିପିଲିରେ ନିର୍ବାଚନ ଫ୍ଲାଇଂ ସ୍କ୍ଵାଡ ଉପରେ ଆକ୍ରମଣ ଘଟଣାରେ ମହାରଥୀଙ୍କୁ ପୋଲିସ ଗିରଫ କରିଥିଲା । ଏଥିରେ ଫ୍ଲାଇଂ ସ୍କ୍ଵାଡ୍ ମାଜିଷ୍ଟ୍ରେଟ ରବିନାରାୟଣ ପାତ୍ରଙ୍କ ସମେତ ୫ ଜଣ ଆହତ ହୋଇଥିଲେ । ଏହି ମାମଲାରେ ଥାନାରେ ପଚରାଉଚରା ପରେ ମହାରଥୀଙ୍କୁ ଗିରଫ କରିଥିଲା ପୋଲିସ । ତାଙ୍କ ନାଁରେ ଆଇପିସି ଧାରା ୧୪୭, ୧୪୮, ୧୪୯, ୧୮୮, ୨୯୪, ୩୪୧, ୩୫୩, ୩୩୩, ୧୭୧ ବି, ୫୦୬, ୩୦୭ ସହ ଜନ ପ୍ରତିନିଧି ଆଇନର ଧାରା ୧୨୩ ଆଦି ଦଫା ଲାଗିଛି।
ଏ ଘଟଣାରେ ୧୧-୧୫ଜଣଙ୍କ ସଂପୃକ୍ତି ଅଛି। ଆକ୍ରମଣ ଘଟଣା ବେଳେ ମହାରଥୀ ଉପସ୍ଥିତ ଥିବା ନେଇ ପୋଲିସ ପାଖରେ ଅଭିଯୋଗ ହୋଇଛି। ଗିରଫ ପରେ ପ୍ରଥମେ ପିପିଲି କୋର୍ଟରେ ହାଜର କରାଯାଇଥିଲା । ତେବେ ଏହା ନିର୍ବାଚନ ସଂପର୍କିତ ମାମଲା ହୋଇଥିବାରୁ ତାଙ୍କୁ ଭୁବନେଶ୍ୱର ସ୍ୱତନ୍ତ୍ର ଏଡିଜେ କୋର୍ଟରେ ପୁଣି ହାଜର କରିଥିଲା ପୋଲିସ । ତାଙ୍କ ଜାମିନ ଆବେଦନ ଉପରେ ସ୍ୱତନ୍ତ୍ର ଏଡିଜେ କୋର୍ଟ ଶୁଣାଣିକୁ ସ୍ଥଗିତ ରଖିଥିବା ବେଳେ ଆଜି ପୁଣି ଶୁଣାଣି ହେବ ।