ଶୁଣିଲାନି ପ୍ରଶାସନ, ନିଜ ପାଇଁ ନିଜେ ରାସ୍ତା ତିଆରି କରି ଉଦାହରଣ ପାଲଟିଲେ ଦୁବୁଲାବେଡା ବାସିନ୍ଦା
ରାଇରଙ୍ଗପୁର: ଖଣ୍ଡିଏ ରାସ୍ତା ପାଇଁ ପ୍ରଶାସନକୁ ବାରମ୍ବାର ଗୁହାରୀ କରି କରି ଥକି ଯାଇଥିଲେ ଏହି ଗାଁ ଲୋକେ । ଶେଷରେ ପ୍ରଶାସନ ଉପରୁ ଭରଷା ତୁଟିଗଲା । ଆଉ ନିଜ ପାଇଁ ନିଜେ ରାସ୍ତା ତିଆରି କରିବାକୁ ଅଣ୍ଟା ଭିଡିଲେ। ମୟୁରଭଂଜ ଜିଲ୍ଲା ବହଳଦା ବ୍ଲକ ଦୁବୁଲାବେଡା ଗ୍ରାମରେ ଦେଖିବାକୁ ମିଳିଛି ଏଭଳି ଦୃଶ୍ଯ ।
ଆଦିବାସୀ ଅଧ୍ଯୁଷିତ ପାହାଡ଼ ବଣ ଘେରା ମୟୁରଭଞ୍ଜ ଜିଲ୍ଲା ବହଳଦା ବ୍ଲକର ଦୁବୁଲାବେଡା ଗାଁ । ଆଜି ଭି ମୌଳିକ ସୁବିଧା ସୁଯୋଗରୁ ବଞ୍ଚିତ ଏଠାକାର ଲୋକେ। ଗ୍ରାମକୁ ଭଲ ରାସ୍ତା ଖଣ୍ଡିଏ ନାହିଁ। ମାଟି ରାସ୍ତାରେ ରହିଛି ବିରାଟ ବିରାଟ ଖାଲ ଖମା । ଅସରାଏ ବର୍ଷା ହେଲେ ଆଣ୍ଠୁଏ ପାଣି ଜମା ହେଉଥିବା ବେଳେ ବର୍ଷ ତମାମ କାଦୁଅ ପଚ ପଚ। ପ୍ରତିଦିନ ହଜାର ହଜାର ଲୋକ ଯାତାୟତ କରୁଥିଲେ ମଧ୍ୟ ଭଲ ରାସ୍ତା ନ ଥିବାରୁ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି ଏଠାକାର ଲୋକେ। ରାସ୍ତାରେ ବଡ଼ ବଡ଼ ଖାଲ ଯୋଗୁ ଆମ୍ବୁଲାନ୍ସ ମଧ୍ୟ ଗାଁକୁ ପହଞ୍ଚି ପାରେ ନାହିଁ !
ସେଥିପାଇଁ ରୋଗୀଙ୍କୁ ହଳଦୀବଣୀ ଗ୍ରାମ ଡ୍ଯାମ ଛକ ପର୍ଯ୍ଯନ୍ତ ଦୁଇ କିଲୋମିଟର ଖଟିଆରେ ବୋହିବାକୁ ପଡେ । ବର୍ଷା ଦିନରେ ସାଇକେଲ ଓ ମୋଟରସାଇକେଲ ମଧ୍ୟ ଚଳାଚଳ ବନ୍ଦ ରହେ । ସ୍କୁଲକୁ ଯିବାକୁ ହେଲେ ଶିକ୍ଷକମାନଙ୍କୁ ଦୁଇ କିଲୋମିଟର ପୂର୍ବରୁ ଗାଡି ରଖି ଚାଲିଚାଲି ସ୍କୁଲକୁ ଯିବାକୁ ପଡିଥାଏ । ଛାତ୍ରଛାତ୍ରୀ ମାନେ ମଧ୍ୟ ବିଲ ହୀଡ଼ ରାସ୍ତା ଦେଇ ସ୍କୁଲ ଯାଇଥାନ୍ତି । ରାସ୍ତା ଖଣ୍ଡିଏ ପାଇଁ ପଞ୍ଚାୟତ ଠୁ ଆରମ୍ଭ କରି ବ୍ଲକ କାର୍ଯ୍ଯାଳୟ ପର୍ଯ୍ୟନ୍ତ ଦୌଡ଼ି ଦୌଡ଼ି ନୟାନ୍ତ ହୋଇଯାଇଥିଲେ ଗାଁ ଲୋକେ । ଯେତେ ଗୁହାରୀ କଲେ ମଧ୍ୟ କେବଳ ମିଳୁଥିଲା ପ୍ରତିଶ୍ରୁତି । ଶେଷରେ ଗାଁ ର ଉନ୍ନତି ପାଇଁ ଅଣ୍ଟା ଭିଡ଼ିଲେ ଗ୍ରାମବାସୀ । ଆଉ ହାତକୁ ହାତ ମିଳାଇ ମରାମତି କଲେ ଗାଁ ରାସ୍ତା । ଜେସିବି ଲଗାଇ ଟ୍ରାକ୍ଟରରେ ମୋରାମ ଓ ମାଟି ଆଣି ନିଜେ ଶ୍ରମଦାନ କରି ଗାଁ ପାଇଁ ରାସ୍ତା ତିଆରି କରି ଉଦାହରଣ ସୃଷ୍ଟି କରିଛନ୍ତି ଗାଁ ଲୋକେ।
ତେବେ ଏହି ରାସ୍ତା ତିଆରି କରିବା ପାଇଁ ପ୍ରତେକଙ୍କ ଘରୁ ୧୫୦୦ ଶହ ଟଙ୍କା ଲେଖାଏଁ ଚାନ୍ଦା ଉଠାଇ ଟ୍ରାକ୍ଟର ଓ ଜେସିବି ଲଗାଇ ନିଜେ ଶ୍ରମ ଦାନ କରି ଦୁଇ ଦିନରେ ସମ୍ପୂର୍ଣ୍ଣ କରି ଦେଖେଇଛନ୍ତି ଗାଁ ଲୋକେ। ଏକତା ହିଁ ବଳ କାହାକୁ କୁହାଯାଏ , ତାହା କାମରେ କରି ଦେଖାଇଛନ୍ତି । ରାସ୍ତା ମରାମତି ପରେ ଏବେ ଗାଁକୁ ଚାରି ଚକିଆ ଯାନ ଆସି ପାରୁଛି। ତେବେ ଏହି ମାଟି ରାସ୍ତା ବାରମ୍ବାର ଖରାପ ହେଉଥିବା ବେଳେ ସରକାରଙ୍କ ତରଫରୁ ଏକ କଂକ୍ରିଟ ରାସ୍ତା ନିର୍ମାଣ ନେଇ ଦାବି କରିଛନ୍ତି ଗ୍ରାମବାସୀ।
