ଚାଉଳ ଚୋରି ଅଭିଯୋଗରେ ପ୍ରଧାନ ଶିକ୍ଷକଙ୍କୁ ମାଡ଼ ମାରିଲେ ଅଭିଭାବକ, ଭିଡିଓ ଭାଇରାଲ

ଆଠଗଡ଼ (କେନ୍ୟୁଜ): ମଧ୍ୟାହ୍ନ ଚାଉଳ ହଡ଼ପ ଅଭିଯୋଗରେ ପ୍ରଧାନ ଶିକ୍ଷକଙ୍କୁ ମାଡ଼ । ସ୍କୁଲ ଭିତରେ ପ୍ରଧାନ ଶିକ୍ଷକଙ୍କୁ ଠେଲାପେଲା ସହ ଧକ୍କା ମାରି ସ୍କୁଲ ଗେଟ ବାହାରକୁ ବାହାର କଲେ ଅଭିଭାବକ । ଆଠଗଡ଼ ବ୍ଲକ୍ ଖୁଣ୍ଟୁଣୀ ରାଧାନାଥ ବିଦ୍ୟାପୀଠରେ ଦେଖିବାକୁ ମିଳିଛି ଏଭଳି ଦୃଶ୍ୟ । ଏହି ସମ୍ପୁର୍ଣ୍ଣ ଘଟଣା ସିସିଟିଭିରେ କଏଦ୍ ହୋଇଛି । ସ୍କୁଲ ଆସିଲେ ଜୀବନରୁ ମାରି ଦେବାକୁ ଧମକ ମଧ୍ୟ ଦେଇଛନ୍ତି ।

ସୂଚନା ଅନୁସାରେ ରାଧାନାଥ ବିଦ୍ୟାପୀଠରେ ଛାତ୍ରଛାତ୍ରୀଙ୍କ ପାଇଁ ଆସୁଥିବା ଚାଉଳକୁ ହଡ଼ପ କରୁଥିବା ଅଭିଯୋଗ ଆଣି ପ୍ରଧାନ ଶିକ୍ଷକଙ୍କୁ ଅଫିସ୍ ମଧ୍ୟରେ ଠେଲାପେଲା ସହିତ ମାଡ଼ ମାରିଛନ୍ତି ଦୁଇ ଜଣ ଅଭିଭାବକ। କିଛିଦିନ ହେବ ସ୍କୁଲକୁ ଆସୁଥିବା ଚାଉଳକୁ ସ୍କୁଲ୍ କର୍ତ୍ତୃପକ୍ଷ ଲୁଚାଇ ବିକୁଥିବା ଅଭିଯୋଗ ହେଉଥିବା ଜଣା ପଡ଼ିବା ପରେ ଆଗରୁ ଗଚ୍ଛିତ ଥିବା ଚାଉଳକୁ ତରବରିଆ ଭାବରେ ପିଲାଙ୍କ ବ୍ୟାଗରେ ପୁରାଇ ଦେଉଥିବା ଭିଜୁଆଲ ପଦାକୁ ଆସିଥିଲା । ଯାହାକୁ ନେଇ ଅସନ୍ତୋଷ ପ୍ରକାଶ କରିଥିଲେ ଅଭିଭାବକ । କିନ୍ତୁ ସେମିତି କିଛି ଘଟଣା ଘଟି ନଥିବା ସ୍କୁଲ୍ ପ୍ରଧାନ ଶିକ୍ଷକ କହିଥିଲେ। ଅପ୍ରେଲ ମାସରେ ଅତ୍ୟଧିକ ଖରା ପାଇଁ ସରକାର ସ୍କୁଲ୍ ଛୁଟି ଘୋଷଣା କରିଥିବାରୁ ସେହି ମାସର ଚାଉଳ ରହି ଯାଇଥିଲା ଓ ଗତ ଶନିବାର ଦିନ ପିଲା ମାନଙ୍କୁ ଦିଆ ଯାଇଥିଲା ବୋଲି ଆଠଗଡ଼ ବ୍ଲକ୍ ଶିକ୍ଷା ଅଧିକାରି କହିଥିଲେ ।