ମୁଖ୍ୟମନ୍ତ୍ରୀ ଶ୍ରୀ ନବିନ ପଟ୍ଟନାୟକ୍ ଆଜି ସଚିବାଳୟରେ ଉଭୟ ସହରାଞ୍ଚଳ ଏବଂ ଗ୍ରାମାଞ୍ଚଳ ପାନୀୟ ଜଳ ଯୋଗାଣ କାର୍ୟ୍ୟକ୍ରମ ସମୀକ୍ଷା କରି ୨୦୧୮ ଡିସେମ୍ବର ସୁଦ୍ଧା ପାନୀୟ ଜଳ ଯୋଗାଣର ନିର୍ଦ୍ଧାରିତ ଲକ୍ଷ୍ୟ ପୂରଣ କରିବାକୁ ନିର୍ଦ୍ଦେଶ ଦେଇଛିନ୍ତି । ଗ୍ରାମାଞ୍ଚଳରେ ପାନୀୟ ଜଳ ଭିତିଭୂମି ନିର୍ମାଣ ପାଇଁ ବର୍ଷକୁ ଅତି କମରେ ୩ ହଜାର କୋଟି ଟଙ୍କା ବିନିଯୋଗ କରିବା ପାଇଁ ମୁଖ୍ୟମନ୍ତ୍ରୀ ନିର୍ଦ୍ଧେଶ ଦେଇଥିଲେ ।
ବୈଠକର ସୂଚନା ଅନୁଯାଇ ସହରାଞ୍ଚଳରେ ସମସ୍ତଙ୍କୁ ପାଇପ୍ ପାଣି ଯୋଗାଣର ଲକ୍ଷ୍ୟ ଡିସେମ୍ବର ୨୦୧୮ ସୁନ୍ଧା ସଂପୂର୍ଣ୍ଣ ହେବ । ସହରାଞ୍ଚଳରେ ପାନୀୟ ଜଳ ଯୋଗାଣର ଦୈନିକ ଆବଶ୍ୟକତା ୧୦୮୫ ମିଲିୟମ୍ ଲିଟରର ଲକ୍ଷ୍ୟ ମଧ୍ୟ ୨୦୧୮-୧୯ରେ ପୂରଣ ହେବ । ଏହା ନିର୍ଦ୍ଧାରିତ ସମୟର ୪ ବର୍ଷ ପୂର୍ବରୁ ହିଁ ପୂରଣ କରାଯାଇଛି ।
ସେହିପରି ୨୦୧୮-୧୯ ସୁଦ୍ଧା ୧୧,୩୨୫ କିଲୋମିଟର Distribution Networkର ଲକ୍ଷ୍ୟ ପୂରଣ ହେବ । ଗତ ବର୍ଷ ଏହା ୭୩୯୧ କିଲୋମିଟର ଥିଲା । ସହରାଞ୍ଚଳର ପ୍ରତ୍ୟେକ ଘରକୁ ପାଇପ୍ ପାଣି ଯୋଗାଣ ଲକ୍ଷ୍ୟ ରାଜ୍ୟ ସରକାରଙ୍କର ପ୍ରାଥମିକତା । ତେଣୁ ଏହାକୁ ଖୁବ୍ ଶିଘ୍ର ସଂପୂର୍ଣ୍ଣ କରିବା ପାଇଁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଥିଲେ । ବୈଠକରେ ବସୁଧା ଏବଂ ଅନ୍ୟାନ୍ୟ ବୃହତ ପାନୀୟ ଜଳ ଯୋଗାଣ କାର୍ୟ୍ୟକ୍ରମ ସଂପର୍କରେ ଆଲୋଚନା ହୋଇଥିଲା ।
ଅତି କମରେ ଦୁଇଟି ଗାଁକୁ ପାଇପ୍ ପାଣି ପ୍ରକଳ୍ପର ସୁବିଧା ଲକ୍ଷ୍ୟ ପୂରଣ ପାଇଁ ମଧ୍ୟ କାର୍ୟ୍ୟକ୍ରମକୁ ତ୍ବରାନ୍ବିତ କରାଯାଇଛି । ବର୍ତ୍ତମାନ ସୁଦ୍ଧା ୫୬୯୦ଟି ପଞ୍ଚାୟତର ଦୁଇଟି ଗାଁକୁ ପାନୀୟ ଜଳର ସୁବିଧା କରାଯାଇପରିଛି । ଗ୍ରାମାଞ୍ଚଳରେ ପାନୀୟ ଜଳ ଯୋଗାଇବା ପାଇଁ ବର୍ଷକୁ ଅତି କମରେ ୩୦୦୦ କୋଟି ଟଙ୍କା ବିନିଯୋଗ କରିବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଥିଲେ । ୨୦୧୭-୧୮ ଓ ୨୦୧୮-୧୯ ପାଇଁ ନିର୍ଦ୍ଧାରିତ ସମସ୍ତ ବୃହତ ପାନୀୟ ଜଳ ପ୍ରକଳ୍ପ ଗୁଡିକୁ ମଧ୍ୟ ନିର୍ଦ୍ଦିଷ୍ଟ ସମୟ ମଧ୍ୟରେ ସଂପୂର୍ଣ୍ଣ କରିବା ପାଇଁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଥିଲେ ।
ଏହି ବୈଠକରେ ମୁଖ୍ୟ ଶାସନ ସଚିବ, ପଞ୍ଚାୟତିରାଜ ବିଭାଗର ପ୍ରମୁଖ ସଚିବ, ଗୃହ ନିର୍ମାଣ ଓ ନଗର ଉନ୍ନୟନ ବିଭାଗର ପ୍ରମୁଖ ସଚିବ ଓ ଅନ୍ୟ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ ।