ସମ୍ବଲପୁର : ସମ୍ବଲପୁର ଧମା ଥାନା ଅନ୍ତର୍ଗତ ଗୁଣ୍ଡେରପୁରରେ ସଡ଼କ ଦୁର୍ଘଟଣା । ଜଣେ ମହିଳାଙ୍କ ମୃତ୍ୟୁ ହୋଇଛି । ୯ ଜଣ ମହିଳା ଶ୍ରମିକଙ୍କୁ ନେଇ ଯାଉଥିବା ଗୋଟିଏ ଅଟୋ ସର୍ଗିପାଲି ନିକଟରେ ଭାରସାମ୍ୟ ହରାଇ ଓଲଟି ପଡ଼ିଛି । ଏହି ଘଟଣାରେ ଜଣେ ମହିଳା ଶ୍ରମିକଙ୍କ ମୃତ୍ୟୁ ହୋଇଥିବା ବେଳେ ଅନ୍ୟମାନେ ଆହତ ହୋଇଛନ୍ତି। ସମସ୍ତଙ୍କୁ ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଛି।
ସୂଚନା ଅନୁସାରେ ଅଟୋଟି ମହିଳା ଶ୍ରମିକମାନଙ୍କୁ ନେଇ ଗୁଣ୍ଡେରପୁର ଫାଣ୍ଡି ଅଧୀନରେ ଥିବା ସର୍ଗିପାଲି ଅତିକ୍ରମ କରୁଥିଲା । ଏହି ସମୟରେ ରାସ୍ତା କଡ଼ରେ କିଛି ପାଉଁଶ ଗଦା ହୋଇଥିଲା । ଅଟୋର ବେଗ ଅଧିକ ଥିବାରୁ ଏହାର ଚକ ପାଉଁଶରେ ସ୍ଲିପ କରାଯାଇଥିଲା । ଫଳରେ ଡ୍ରାଇଭର ଗାଡ଼ି ଉପରକୁ ନିୟନ୍ତ୍ର ହରାଇଥିଲେ। ଅଟୋଟି ମଧ୍ୟ ସିଧା ରାସ୍ତାରେ ଓଲଟି ପଡ଼ିଥିଲା । ସେଥିରେ ବସିଥିବା ମହିଳାମାନେ ଏଣେ ତେଣେ ଛିଟିକି ପଡ଼ିଥିଲେ। ଜଣେ ମହିଳା ରାସ୍ତା ଉପରେ ପଡ଼ି ଯିବାରୁ ତାଙ୍କ ମୁଣ୍ତ ପିଟି ହୋଇଯାଇଥିଲା । ଏଥିଯୋଗୁ ତାଙ୍କର ମୃତ୍ୟୁ ଘଟିଛି । ଅନ୍ୟ ଆହତ ମାନଙ୍କୁ ତୁରନ୍ତ ସମ୍ବଲପୁର ଜ଼ିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି । ସେପଟେ ଦୁର୍ଘଟଣା ସ୍ଥଳକୁ ଧମା ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି ।