ନିରାଶ୍ରୟ ଓ ଅସହାୟ ମହିଳାଙ୍କୁ ଉପଯୁକ୍ତ ସମ୍ମାନ ବିନା ଉନ୍ନତି ହୋଇ ନପାରେ: ମହିଳା ଦିବସ ଉପଲକ୍ଷେ ଡ. ଅଚ୍ୟୁତ ସାମନ୍ତଙ୍କ ବାର୍ତ୍ତା

କେନ୍ୟୁଜ୍(ବ୍ୟୁରୋ):  କିଟ ଓ କିସ୍‌ ପକ୍ଷରୁ ଅନ୍ତର୍ଜାତୀୟ ମହିଳା ଦିବସ ପାଳିତ ହୋଇଯାଇଛି। ଏହି ଅବସରରେ ଚଳିତବର୍ଷର ବିଷୟବସ୍ତୁ ସ୍ଥାୟୀ ଭବିଷ୍ୟତ ପାଇଁ ଆଜିର ଲିଙ୍ଗଗତ ସମାନତା ଉପରେ ଏକ ଆଲୋଚନାଚକ୍ର ଅନୁଷ୍ଠିତ ହୋଇଥିଲା। କିଟ୍‌ ଓ କିସ୍‌ ପ୍ରତିଷ୍ଠାତା ଡ. ଅଚ୍ୟୁତ ସାମନ୍ତ କହିଲେ, ମହିଳା ସଶକ୍ତିକରଣ ପାଇଁ ଆମକୁ ପ୍ରଥମେ ସମାଜର ନିରାଶ୍ରୟ, ଅସହାୟ ମହିଳାଙ୍କୁ ସମ୍ମାନର ସହ ବଞ୍ଚିବା ପାଇଁ ପ୍ରେରଣା ଓ ସହାନୁଭୂତି ଯୋଗାଇବା ଉଚିତ। ଉପଯୁକ୍ତ ସମ୍ମାନ ବିନା ଉନ୍ନତି ହୋଇ ନ ପାରେ। ଯେଉଁ ଘରେ, ସମାଜ ଓ ଦେଶରେ ନାରୀଙ୍କ ପ୍ରତି ସମ୍ନାନ ନାହିଁ ସେଠାରେ ଉନ୍ନତି ସମ୍ଭବ ନୁହେଁ। କିଟ୍‌ ଓ କିସ୍‌ ସର୍ବଦା ମହିଳାଙ୍କୁ ସମ୍ମାନ ଦେବା ସହ ବିଭିନ୍ନ କ୍ଷେତ୍ରରେ ଅଗ୍ରାଧିକାର ଦେଇ ଆସୁଛି। ମହିଳାଙ୍କ ସଶକ୍ତିକରଣ ଓ ସେମାନଙ୍କୁ ସେମାନଙ୍କ ଦକ୍ଷତା ନେଇ ସଚେତନ କରାଇବା ଦିଗରେ କିଟ୍‌ ଓ କିସ୍‌ ପକ୍ଷରୁ କନ୍ୟାକିରଣ, କଳିଙ୍ଗ ଫେଲୋସିପ ଆଦି କାର୍ଯ୍ୟକ୍ରମ ହାତକୁ ନିଆଯାଇଛି ବୋଲି ଡ. ସାମନ୍ତ କହିଥିଲେ।

କିଟ୍‌ ବିଶ୍ୱବିଦ୍ୟାଳୟ କୁଳପତି ପ୍ରଫେସର ସସ୍ମିତାରାଣୀ ସାମନ୍ତ କହିଲେ, ମାତୃତ୍ୱ ହେଉଛି ସକଳ ଶକ୍ତିର ଆଧାର। ସମଗ୍ର ବିଶ୍ୱରେ ମହିଳାମାନେ ହେଉଛନ୍ତି ଶକ୍ତିର ଉତ୍ସ। ବିନା କୌଣସି ସାହାଯ୍ୟ ସହଯୋଗରେ ଜଣେ ମହିଳା ବହୁତ କିଛି କାର୍ଯ୍ୟ ସାଧିତ କରିପାରେ। ମହିଳାମାନେ ଶିକ୍ଷିତ ହେଲେ ସେମାନଙ୍କ ସାମର୍ଥ୍ୟ ଠାରୁ ଅଧିକ କାର୍ଯ୍ୟ ତୁଲାଇପାରିବେ। ସ୍ୱାମୀ ବିବେକାନନ୍ଦଙ୍କ ଭାଷାରେ ମହିଳାଙ୍କୁ ସେମାନଙ୍କ ନିଜ ଭାଗ୍ୟ ନିର୍ଦ୍ଧାରଣ ପାଇଁ ଛାଡ଼ିଦେବା ଉଚିତ ବୋଲି ସେ କହିଥିଲେ। କାର୍ଯ୍ୟକ୍ରମରେ କିମ୍‌ସର ଉପ କୁଳପତି ଡା. ସିବିକେ ମହାନ୍ତି ଯୋଗଦେଇ କହିଲେ, ମହିଳାମାନେ ସେମାନଙ୍କ ଅନ୍ତର୍ନିହିତ ଶକ୍ତିକୁ ଜାଗ୍ରତ କରାଇବା ଉଚିତ।

ମହିଳାମାନେ ସବୁବେଳେ ସଶକ୍ତ। ସେମାନେ ପୁରୁଷଙ୍କଠାରୁ କୌଣସି ଗୁଣରେ ଊଣା ନୁହନ୍ତି। ମହିଳାଙ୍କ ମଧ୍ୟରେ ଦକ୍ଷତା ରହିଛି, ମାତ୍ର ଏ ନେଇ ସେମାନଙ୍କୁ ସଚେତନ କରାଇବାର ଆବଶ୍ୟକତା ରହିଛି ବୋଲି ଡା. ମହାନ୍ତି କହିଥିଲେ। କିଟ୍‌ ବିଶ୍ୱବିଦ୍ୟାଳୟ ଉପକୁଳପତି ପ୍ରଫେସର ଶରଣଜିତ ସିଂହ ସ୍ୱାଗତ ଭାଷଣ ପ୍ରଦାନ କରିଥିବା ବେଳେ କୁଳସଚିବ ପ୍ରଫେସର ଜ୍ଞାନରଞ୍ଜନ ମହାନ୍ତି ଧନ୍ୟବାଦ ଅର୍ପଣ କରିଥିଲେ। ଏହି ଅବସରରେ କିଟ୍‌ ଓ କିସ୍‌ ମହିଳା କର୍ମଚାରୀଙ୍କୁ ନେଇ ଏକ ମହିଳା ଫୋରମର ଶୁଭାରମ୍ଭ ହୋଇଥିଲା ।